حائر في باريس

[مشكلتي]

السلام خوتي
أنا شاب فعمري 24 سنة ...نقرى ماستر 1 ...المهم أنا الان راني في عطلة بمدينة باريس
و لكن راني نخمم باش نحرقها الفيزا و نقعد مع العلم أنني عند خويا و ديجا عندي فيزا و قادر نطلع في أي وقت لأن عندي 2 خوتي فباريس يخدمولي ليبارجومو ..زعما ساهلة نقدر ندي الفيزا
أريد نصيحة إدا نولي للبلاد و لا لا .. لأني خايف و كان نحرقها غادي يجي نهار نطيح في كونطرول ولا و نعشي مرحليني و منزيدش نكحل على أوروبا

[سيرين راجي]

واش صبت في باريس الانحراف ولا تقوى الله
ارجع لبلادك لا يجوز الاقامة في بلاد الكفار الا للضرورة

[عثمان الجزائري.]

يا أخي مادامك تحصلت على الفيزا ما تحرقهاش، دير كي الجماعة أبقى طالع هابط و عاود دوموندي حتى تولي تدي 6 شهور في عام، و من بعد دومندي visa de circulation، الدنيا ماش ساهلة صديقي، دائما يجب أن يكون عندك خيارين بلادك و تلك البلاد... الكثير ممن لديهم حتى الإقامة هناك تجدهم مقيمين في الجزائر و خلاو فرنسا للتجارة أو السياحة فقط ماهيش بلاد تاع معيشة.

[هـــدوء]

ماخممتش أنك راح تكون عبء على خاوتك إذا ما قررت البقاء هناك؟
على الأقل كمل الماستر تاعك و منبعد خمم في الأمور هذي.

[موح الحراشي]

ولي كمل دراستك .دير فيزا دراسة و بذلك تقدر تقعد سنتين وتشوف الاحوال و تقرر حسب الظروف

[رندة.]

الأولوية الآن لقرايتك، أرجع كمّل الماستر تاعك وامبعد ساهل الحال.

[bibicha]

ماننصحكش تحرع¨ لفيزا رايح تعقدها على روحك
ارجع جوز TCF et tef و دير فيزا الدراسة رايحة تسهلك افضل و انك تقدر تستقر لانه القوانين تبدلت خاصة مع ماكرون

[محارب الحمق]

أكبر غلطة ديرها هي تحرق الفيزا. شوف ماراحش نهدرلك على النظرة الشرعية للعيش في بلاد الكفر, اللي نقدر نقولهولك, انوا راك غالط اذا حرقت الفيزا, راح تندم صدقني

[kacimo.samy]

ربي يعينك ....

[محارب الحمق]

https://ferkous.com/home/?q=art-mois-85

[amina.77]

لا افضل هد العمل
لانو اصلا حرام عليك تعيش مع الكفار ادا لم تواجه ظلما او مشاكلا في بلادك -يعني الا ادا دعت الضرورة -
و انت حر

[amina.77]

https://m.you tube.com/watch?v=U3s4_KiTLi0

[ربي اغفرلي]

المشاركة الأصلية كتبت بواسطة مشكلتي

السلام خوتي
أنا شاب فعمري 24 سنة ...نقرى ماستر 1 ...المهم أنا الان راني في عطلة بمدينة باريس
و لكن راني نخمم باش نحرقها الفيزا و نقعد مع العلم أنني عند خويا و ديجا عندي فيزا و قادر نطلع في أي وقت لأن عندي 2 خوتي فباريس يخدمولي ليبارجومو ..زعما ساهلة نقدر ندي الفيزا
أريد نصيحة إدا نولي للبلاد و لا لا .. لأني خايف و كان نحرقها غادي يجي نهار نطيح في كونطرول ولا و نعشي مرحليني و منزيدش نكحل على أوروبا

ادخل للبلاد ولا تحرق الفيزا انا ساكنة هنا بباريس الكنترول كاين في اي وقت واصبح كثيرا
يا سيدي الاوراق مش سهلة الا اذا وتزوجت واحدة مولودة هنا بفرنسا اتحصل عن الاوراق
ادخخخخخل الحين للبلاد كمل اقرايتك وشد في يدك حاجة انتاع مستقبل باش اتعول به الدنيا فيا ياااسر يا اخي لا اتغبط الهجرة من الان ربي معك

[toulay]

وعليكم السلام ورحمة الله وبركاته
لا لا متحرقش الفيزا ارجع لبلادك ومبعد اذا تحب دير فيزا تاع الدراسة راهم يمدوها بسهولة
وانت تاني زعمة خوتك راح يقبلوا بيك هوما بلاك راهم حاصلين في ارواحهم صح يتحملوك سمانة زوج بصح باش تبقى اكثر عندهم وبلا خدمة وهوما يصرفوا عليك منظنش
راك تشوف في بلادنا واذا جاو الضياف ويطولوا يقولوا هاذو ميفهموش رواحهم علابالهم كل شيء غالي وين في بلاد الغربة
بالتوفيق

[{ حديث الوجدان }]

احرق الفيزا وزيد ادفنها واعفس عليها 10 عفسات واخطيك من العرب وجوه الشر والميزيرية
اقعد ثما ويرمرمد كافر مايعرفش ربي خير من خوك مسلم يشبعك لمرار في بلادك