واش هي عاداتكم في محرم

[سَلْسَبِيّلْ]

مساكم فل هيا جاتني فكرة وهي تبادل العادات عند كل الجزايريين اي كل وحدة تقولنا واش يديرو للعشا في محرم
نسيت نقلكم كل عام والامة الاسلامية بالف خير
ضك نقلكم انا واش ندير حنا في سطيف نديرو لعشا كسكس او فرمسة او شخشوخة ونحتافلو بيه اما انا اليوم بدلت من لعجين درتلهم روطي وسلاطة وديسير وكسرة هيا كل وحدة تقولنا واش عشاها نتاع محرم اعاده الله علينا بالخير والبركة

[سَلْسَبِيّلْ]

وين راكم يا حراير

[~اسيل ريحانتي~]

شوفي حبيبتي حنا جماعة سيدي بلعباس نديرو الشخشوخة او البركوكس و الشرشم تاع القمح و كل محرم ونتي بخير حبيبتي

[أم ياسين الزهراء]

اهنا في باتنة نديرو الشخشوخة وكاين اللي يدير الرشتة او الطعام او شخشوخة الظفر او الرشتة وانال درت الشخشوخة وكل عام واحنا بخير

[نور الجنة س]

7na fi wilayat ain defla ndiro koskos aw rachta aw barkokas
wa ana rani la7adh ano 3adat ta9rib matchabha fi gharb aw wasat aw char9 aw janob
rabi ya7fadhna
wa kol 3am wa antom bikhayr

[oum rahma19]

Puisk hado homa les plats traditionnel lma3roufin w li nhabohom kamel ,
Surement rayeh ykoun wahed man hado
Ya couscous, ya feremssa , ya chakhchoukh
Rabi yhanina w ykana3
Inchalah

[mimiamarmora]

hna fi constantine ndirou les pates ana dert chakhchoukhet dfar w dessert w jat 3andna la famille w t3achina kaml kifkif kol 3am wantouma bkhir

[12snv0007]

حنا في العاصمة نديروا التليتلي بالجاج او الرشتة بالجاج

[malek1608]

أحنا في تيسمسيلت نديرو كسكس و الشرشم بالقمح واش هي الفرمسة
كل عام و اﻷمة اﻹسلامية بخير و صلاح

[سَلْسَبِيّلْ]

لفرمسة هي الرقاق او لمسمن

[tiaretia]

كل عام ونتما بالف خير هنا في جهتنا نديرو طعام ب داند

[hom2003]

احنا في الجلفة نديرو الطعام او الشخشوخة باللحم

[ayasirine]

الرشتة و التليتلي و الطعام و كل الاطباق المعجنة هما اللي يطبعوا المواسم

[سَلْسَبِيّلْ]

الله الله ربي يهنيكم جميع عادات الجزائرييين براسك نفسها بصح حرت غير في الشرشم حنا في سطيف نديروه للاطفال كنبتو سنانهم اول مرة نموت على الشرشم

[ayasirine]

احنا ثاني كي يسنن الصغير نديرو الشرشم و نزيدو السفنج باش يكون تسنانو خفيف