وتستمر معاناتي مع غلاصاج الشيكولا

[كنت طفلة]

سلام لبنات
ممكن تعاونوني تقولولي كيفاش يجي القلاصاج تاع الشيكولا مليح وواش من شيكولا تديرو و الطريقة المضبوطة لأني نسوفري معاه جامي يخرج لي
انا حابة ندير الملفوف تاع ام اماني
نتمنى تنصحني هي او اي وحده يخرج لها القلاصاج تاع الشيكولا صحيح

[WAHM]

يفيدوكي الاعضضاء

[oum islem]

salem okhti ana nesta3mel zino nte3 lmizene ndewbha fi bain marie 3ala nar kalili nharkha mlih wa nakhdem biha manzidlha walou hata mina mliha

[أم محمد علي 25]

أختي الكريمة أنا نستعمل منى سوداء ، نذوبها في حمام مريم ونضيفلها شوية زيت هذه تعلمتها من مختصة في الحلويات تخرجلك روعة

[ikhlasse25]

اختي اضيفي للشوكولاطة قليل من الحليب والقليل من الزيت على حمام مائي

[تغرينية]

نصيحة ادا جراتلك الشيكولة اي ولات سائلة تقدري تضيفيلها الكاكاو

[wassila134]

تذوبي الشوكولا في حمام مريم وتزيديلها شوي زيت للمعان

[assil2]

أختي كما قالولك الأخوات ذوبي الشوكولا في حمام مائي
وزيديلها شوي زيت للمعان أما النوعية سمحيلي منيش
في البلاد أنا راني في فرنسا عندنا شوكولا قوامها ثقيل جدا
نزيدلها شوي حليب بصح قبل ماتدوب يعني حطيها هي والحليب
في حمام مائي وكي تدوب زيديها الزيت وكي تغلفي القاطو حطيه
فوق قرياج تاع الفور مثلا باش يقطر وممبعد تقدري تعاودي تستعمليها

[mystiq1]

السلام عليكم
انا كنت كيما انت حتى اليوم الي مد الشيف مصطفى هذا القلاصاج ، نمدلك الوصفة باش يستفاد الجميع
عصير نصف ليمونة
2 ملاعق كاكاو
2 ملاعق حليب
خلطيهم مليح ، ابداي تضيفي السكر قلاصي بالملعقة و راكي حاطة 2 علب من الشكولاطة تذوب في micro-onde ثم بمجرد تذوب ضيفيها على الخليط و من الاحسن في هذه المرحلة تستعملي الخلاط الكهربائي .و هذا هو القلاصاج اذا كان ناشف زيدي الحليب و في العكس السكر قلاصي .

[om malouka staifia]

مساء النور اختي ريحة نعطيك وصفة مضمونة انا نستعمل زينو و اياك تستعملي عجينة الطلي ماهيش مليحة ديري شيكولة زينو الطويلة ديريها في حمام مائي تذوب من بعد حطي شوية ماء يغلي و كي اتذوب الشيكولة بالفوي خلطي معاها شوية ماء غالي رايحة تطيك نتيجة مذهلة حتى اللون يولي غامق و ماتخافيش ابقاي تحركي حتان تولي النتيجة مليحة راني شفتها في قناة سميرة و جربتها و النتيجة هايلة انتظر الرد و طبقيها كيما مديتهالك

[كنت طفلة]

بارك الله فيكم يا لبنات
يعطيكم الصحة على النصائح
راح نزيد نجرب حتان ينجح لي الغلاصاج
و ان شاء الله تشوفو تطبيقي

[ام ايمان16]

كي ندير شوكولا بريمة تصلحلي بالصح ماتجيش بزااف
وكي ندير الشوكولا تاع لقلاساج تاع الميزان ماتصلحليش
مانعرف لاه

[ام اريام]

يا اختي الكريمة انا نحط الشكلاطة في حمام مائي يعني تجيبي طاوة فيها الماء نصفها فقط باش من بعد كي يولي يغلي ما يدخلش في الشكلاطة و نزيد شوية حليب قدر 3مغارف كبار وتخليها تذوب وحركيها لكان جاتك ثقيلة زيدي شوية حليب والله انا كي جيت للبلاد خدمت بيها في العيد وعجبتني استعملت وحدة اسمها كنزة وعجبتني اكثر الشكلاطة البيضاء رائعة تقولي طلية لخاطر هنا البيضاء ما تشيحش بالخف وتطلق كي شغل الزبدة بصح هدي عجبتني وننصحك بيها سواء البيضاء او السوداء وموفقة انشالله.