~¤ô¦¦§¦¦ô¤~ بيتك جنتك و رضاء ربك مبتغاك 6 ~¤ô¦¦§¦¦ô¤~

[أم شيماءْ]

مساء الخيرات وشراكم
اختي سمراء كنت نستنى في الدورة بفارغ الصبر والله استفدت منكم بزاف بزاف ربي يجعلها في ميزان حسناتك
اما عن التطبيقات صلاة الفجر والله راني مقصرة تعرفي بنتي صغيرة 9اشهر مهبلتني تبات تبكي يعني كي نضوض على 7 نصلي اليوم غسلت غرفت البنات ورتبتها وسيقت الدار وعجنت المطلوع ودرت عدس للغداء وبالطبع بنتي لاصقة فيا وتبكي هههههههههههههه

[سمراء الدنيا]

عندي طلب من كل وحدة باغيا تشارك في الدورة انها تكتب جدول ليومها كيفاه يمر ...... باش نعرفو الاخطاء الموجودة فيه و نحاولو نصلحوها ... و نخرجو بجدول مثالي نمشو عليه كلنا

جدولي اليومي

5/45د................. الصلاة و تجهيز الفطور

7/00........................نفطر و ندير لغدا يطيب على نار هاديا

8/00 ......................نشعل لميكرو مرة نتصفحو و مرة نلم الدار

9/30..................... اذا عندي غسيل نغسل و اذا عندي تسياق نسيق

ساعة من الصباح تروحلي في التيليفون ..... و غالبا الباب و الداخل و الخارج

نتغدو و نتوكى شويا و نوض نصلي و نغسل لماعين
3/00 ................. اما نحضر حاجة لقهوة عشية اما نخيط في الماشينة
4/30................... اذا ماجاني حتى واحد نقعد في النت حتى يجو الاولاد من المدارس
6/00................... نصلي لمغرب و ندرس الاولاد لانو لعشا غالبا حاجة خفيفة او سلطات
8/00.................. نتعشو و نلم المطبخ و ندور على الدار نلمها

هاذ البرنامج ما راهش عاجبني و عندي اصرار اني نغيرو

[ام منيب]

باسم الله و الصلاة و السلام على حبيب الله
طلباتك اوامر يا سمراء
جبتلكم جدول يومياتي ....
مادام دخل الشتا يساعدني توقيت الفجر ....نتوضا ونصلي و ندعي كي تلحق السابعة نوض لولاد مع هذيك الفوضى لي يديروها الصباح يا لطيف ...كي يخرجو و يعم الصمت نتلهى بصوالحي نحط الحوايج في المشينة تاع الغسيل و نلم الشنابر و من بعد نرمي الفطور و نكمل بالتسياق
المشكل الكبيييير لي نعاني منو النت....يديلي وقتي و نلقا روحي هايمة فيه سيختو الصباح منين تكون النت خفيفة شوية
تعلمت من الدورات السابقة نخمل البيوت في الليل و نغسل الماعن و نقص قد مانقدر باش الصباح ينقص عليا الظغط و الدوااار
الغسيل مانخليش الحوايج يتلمو باش ما نتعبش بزاف
مانحبش الكي من جذوره
نفسي ندير قيلولة محرومة منها

[الأمنيات]

السلام عليكم
راني صليت الفجر وقريت حزبين واذكار الصباح الحمد لله راني مع بنتي نراجع معاها تربيه اسلاميه ومدنيه عندها فروض
كي نكمل نشرب قهوتي ونروح نبدا شغلي
البارح سيقت يعني اليوم ماكانش اشغال بزاف عندي دجاج نظفه جابه لي وندير الغدا وراح ندير طارط ولا قاطو
نغسل مواعين ونظف المطبخ هدا هو اليوم واش ندير مره على مره ندخل من تابلات نحطها في كوزنه مرات ههههههه
سمراء الجانب الجمالي راني جبت لكم وصفه جربتها لوجهي
مليحه للوجه الدهني والجاف
ملعقتين حمص مطحون مع ملعقتين حليب واخرى ماء ورد ولا ماء زهر انا درت ماء زهر
تخلطيهم وتحطيهم قناع على وجهك وخليهم عشرين دقيقه ومن بعد غسلي بالماء دافي ادا بشرتك دهنيه عادي نشفي وخليها
وادا جافه دهنيها بزيت اللوز

[oummalak]

السلام عليكم ورحمة الله وبركاته
الفرحة لاتوصف بجمعة الاحبة والله شعور رائع
عن نفسي ليامات الي فاتو تعبت مع الما صووات
ومازال باقيلي الابواب انتاع الكوزينة وليزيليمو ونكمل
الاحد نبدا معاكم بيت لولاد
حبيت نسقسيك سمراء واش حتى بيت لبنات نفس الاسبوع معاه باش نكون معاكم

[أم ياسين الزهراء]

صباح الانوار

طبعا راني عطلة مدفوعة الاجر هههههههههههههه

نوض دايما على 6.30 نونهبط للتحت بش نوجدلهم الفطور وفي عادة مانعرف مليحة ولا خايبة فطور الصباح نحبو وحدي هدي عيت نحيها نشرب حليبي وقهوتي على خاطري ونجي طبعا للميكرو وليدي يوجد روحو وحدي وكيهبط انا اللي نكمل معاه حتى يخرج انا مانحبش نصبح نطيب لكان نشم ريحة الطياب الصباح نبقى مقلقة بعد 9 انطلق وكيننطلق مانحبسش هدي هي مشكلتي والحمد لله

نخمل الدار ونفرزها ونروح نغسل مواعن العشاء ونوجد الفطور وبنتي الصغيرة ترجع تتكى وتتفرج الرسوم والماشينة نديرها تغسل وكيما اليوم مانسيقش تهنيت راحة يعني راح يبقالي وقت للميكرو تعرفو قد مافيه فايدة نضنو فيه مشكل نهار مايتحليش المنتدى ندير كلش حتى بناتي يقولولي باين الجلفة مبلوكي ههههههههههههههههه بصح وحدتي هنا هو اللي يخليني واقفة

مشكاتي وانا حابة نحيها نخدم مزروبة عيت نحيها والفة كيكنت نربي نزرب ونجري ولحد الان والو زوجي يضل ينهر في بصح انا ولو رغم اني بديت نعي صح والو

لبناتي نصيحتي ديرو كلش الصباح والمساء خلوه راحة هكى متعودة لعشية مايكونش عندي اشغال خاصة اعمال الماء راهو يضر الصحة الماء في المساء حافظو على صحتكم

[ماريا205]

االسلام عليكم ورحمة تعالى
سمراء الدنيا كل عبارات الشكر قليلة عليك تستاهلي كل خير يا اعز صديقة
ومجهوداتك ماجورة عليها ان شاء الله
ننظم اليكم في هده الدورة بادن الله برنامج التنظيف خفيف عجبني

[ام منيب]

لبنات صباحكم زين سامحوني على تكرار الرد .... عن بالي الرد تاع البارح مالحقش
ااااسفة

[~ حراير ~]

السلام عليكم و رحمة الله تعالى و بركاته
سمورة درتيلنا خدمة تاع لبروقرام هذا

انا نبدالكم من الليل
الكوزينة و الدوش و الطوالات يباتو نظاف و لو على جثتي هيهيهيه
5.00 ...............................نوض نصلي ركعتين و نطيب لفطور و نوجدلهم و نديرو في الترامس و نفطر "كيما ام ياسين نحب وحدي" ونصلي
6 .................................................. نوضهم و بكل صراحة نوقف عليهم باش ماينوضش لعياط "غسل وجه و اسنان و وضوء و صلاة و نخليهم يكملو يلبسو و يعدلو فراشهم "هاد الوقت انا نكون في الكوزينة ندوزن برك البرم تاع لغدا و تاع لعشا و نلوح القش في المشينة اذا عندي
6.45 .............................................نفطرو في جماعة "طبعا هوما و انا مقابلتهم كي الجدارمي هيهيهيهيه"
7.00 ...................................... يخرج الراجل نحط لبرم على النار و نروح للميكرو نقرا الجرنال "ديفو قديم" و نضرب طلة على المنتدى
7.30 ...................................... يطيرو عليا الهنود الحمر ليزاباش وجوه الـ ................ نكمل شوية مع الميكرو
8.00 ...............................................نوض نهوي البيوت و ننشر لفراشات على الشمس و نجوز النشاف على الدار كل
كيما درك راني مكملة و الحمدلله
راني رايحة نفرز خزانة اريج عارفتها موسوسة تجي تجريلها و هي عندها دفوارات خليني نهنيها

درك نجيكم للتوسويس
عندي سوسة تجواز النشاف خاصة خاصة الكوزينة و الدوش و الطوالات و الهول
الصباح شافة لعد لغدا نشافة كي يروح للقراية نشافة بعد القهوة نشافة و في الليل طبعا افففففففففففففففففففففففففف
الطوالات حاطتلهم الغسول السحري تاعي يخي تعرفوهم الي تخرج و ماتصبش منه و تصب من وراه الما هاداك وش عطاها ربي من عياط و شتيمة من عندي
لمراية تاع الدوش زوجي منين يتوضا قولي غير دوش و دوش لمراية مسكينة نهار كامل و انا من وراه بصح درك راني في خطة معاه كي تنجح نقولهالكم

درك الدباير نصيحة نهار الجمعة و السبت الويكاند حب يقول ماديرو والو عيشو حياتكم مع ازواجكم و وليداتكم انا من الكوزينة مانزيد والو

على هك عندي نهار الاحد نهز لفراش و نسيق مليح و ساير ليام تجواز نشاف

درك طلباتي
خياتي تاع المراهقين يعطوني دباير
انا في الحق الحمدلله راني في تحسن مع بناتي كل بصفة عامة "و ربي يخلي ندية و يعمر حجرها الي حلتلي عينيا و وراتلي بالبا و التا وش ندير يكثر خيرها"
لكن رغم هذا راني طماعة و بغيتكم تعطوني طرق باهية

[oum radja]

السلام عليكم
يعطيكم الصحة راكم ناشطين
حراير واصلي في طريقتك تاع النشاف هايلة حتى انا اختي الكبيرة هاكا وماتملش ابدا
وانا تمنيت نكون كيما هي
جبت ليكم باش تتقهو

[oum radja]

وصفة وتدبيرة
هاذا وقت السفرجل راه متوفر بكثرة
كاين لي يدير مربى وكاين لي يدير بيه طاجين
كي تقشر السفرجل ماترموش القشور و البدور
ديريهم في قدر صغير مع الما وخلوهم يغلو مليح من بعد صفو هاذاك الما وزيدو عليه نفس الكيلة تاع سكر و شريحة رقيقة تاع ليمون وخلوه فوق النار حتى يعقد مليح
وبهاذا رايحين تتحصلو على كمية مليحة تاع لاجولي ديروها في علبة وخلوها في الثلاجة او حتى في المجمد وهي ماتجمدش تبقى كيما هي
رايحين تلقوها في اي وقت باش تزينو الطورطات وتلمعو الفواكه وتستعملوها حتى في سلادوفروي امممممممممممم

[ام امجد14]

السلام عليكم انا يومى يفوت يجرى و نحس عندى اخطاء بزاف والله اعلم
الصباح صلات الفجر و دودودو مع الراجل الله غالب نحكمو غير مع الصباح ههههههه حتى لسبعة نجرى نوض الاولاد و لبس هيبة للمدرسة والله نحسها تدى كامل الوقت لانها اغلبها تنوض مشمخا و لازم نغسللها لازم نلقى حل لهته المشكلة انا ندور بهيبة و الاولاد يشربو القهوة ليه ليه حتى نلقاها 8 غير ربع نحس الفورة حكمتنى هههههه
يروحو الاولاد نرفد قهوتى الله غالب نموت عليها نشربها 2 مرات الاولى مع الراجل 2 كى يروحو الاولاد نطل على غرفة الاولاد طبعا نهرب ندى قهوتى و نقعد عند الميكرو ربع ساعة
نوض نبدا بغرفة الاولاد نخملها و من بعد نروح لغرفة البنات و نخلى رهف راقدة فى بلاصتها و نروح لشومبرتى نخملها نلم ما يجب ان نلمو من الهول راكم تعرفو الاولاد
ديراكت للكوزينة نغسل المواعن و ندير الفطور و نبدا التسياق انا عندى المشكلة تسياق كل يوم نشوفها 11 نهود نجرى للطابق الاول نفوت عليه النشاف الصالة و غرفة الشوابين و الاول و القراج نلقى هيبة خرجت نطلع معاها ندحى فى رجلى نحس روحى تعبااااانة نحط للشوابين يفطرو 12 غير ربع باش كى يجو الاولاد نفطرهم كى يفطرو الاولاد نتفكر روحى و نفطر نلم المواعن و نديرهم فى الحوض نطيب قهوة للراجل باش يقعد راسو و نروح نحبو لبلاصتى حتى لثانية زولا نوض نغسل الماعن و نطيب لاتاى للشوابين و ندير تعشوى للاولاد و من بعد نعجن المطلوع و ندير العشا و ندرس الاولاد و نعاود نغسل الماعن و ونروح نحبو لبلاصتى هههههههههههههههه


طبعا نهار نسيق الطابق الاول و نهار نقعد غير الفوق باش نغسل الملابس و ما نهبطش التحت غير ادا كانو ضياف

[شوشو 11]

السلام عليكم
ماشاء الله والله يبارك فيك سمراء محبوبة الجماهير وربي يحفظك لينا رديتي الروح فينا ورجعتي اللمة كما بكري واحنا في امس الحاجة اليها....ودورة مباركة
ربي يحفظكم البنات على البصمات اللي حطيتوها ....وربي يعين الجميع
الحق انا سبقتكم بشوية حوايج مثلا المطبخ نظفتو في العطلة وتاني غرفة الاولاد وخزانتهم اما الروتين اليومي هدا اللي فيه مشاكل و ان شاء يدا بيد للخروج بنتيجة
سامحوني انا ابقى متابعة ومتدخلة احيانا حسب الضروف لانه عندي مشاكل في النت
شككككككككككككككرا لكن يااحلى واغلى صحبة

[نبض الفؤاد]

يا سلاااااااااااااااااااام....هلت الانوار....ودقت الطبول....
الكل موجود هنا.....الله يبارك فيك يا سمراء...وفي وليداتك....لميتي الشمل من جديد....
ما عندي ما نقول ...صح راني محتاجة هاذا الدورة ...جات في وقتها....سلامي لكل الحبيبات...راني نتبعكم بالفلاش ديسك...الى ان يحين اللقاء.....هههه
في امان الله.....

[الأمنيات]

السلام عليكم وجمعه مباركه
نصيحه لكم ما تخلوش المواعين تاع العشا للصباح حاولوا تغسلوهم في الليل احسن منها المطبخ الصباح تلقيه نظيف ويزيد ك همة ونشاط هههه
وتاني الزوج راه يلاحظ ان مطبخك ماشي مرتب ومعمر مواعين ما تخلوهمش يديروالكم ملاحظات هههههه
انا من راي الحراير الجمعه والسبت ما نحبش نظف خاصة الجمعه نديها عباده والترفيه مع زىجي واولادي نقعد معاهم نراجعوا ولا راني نلعب معاهم والزوج نتابع معاه حصصه المفضل ونتوانسوا هههههه خليه يوم. راحه لك ولعائلتك
ما تخلوش صلاة الفجر تفوتكم الحمد لله كاين وسائل الي تونضك البورتابل المنبه ،،،،،
اليوم نضت صليت الفجر وجدت قهوتي هي الاولى لانه زوجي سافر ربي يسهل له اموره من بعد قريت حزبين تاوعي مع اذكار الصباح وسورة اكهف
الغذا مرات نبرمجه في الليل ونكون عارفه واش ندير
عودي اولادك هما الي يعدلوا فراشهم وحوايجهم ويرتبوا غرفتهم حتى نتقصي على روحك شغل وعلميهم يساعدوك في التنظيف كل واحد اعطيه مهمه
انتي تبان لك راهم صغار بصح هما يعجبهم الحال ويحسوا انك مهتمه بيهم وراح تلاحظي الفرق اشغال حسب اعمارهم
هادا واش عندي اليوم
هاكا