اول رمضان في بيت زوجي.... ساعدوني

[imanebedd]

السلام عليكم رمضان مبارك للجميع هدا رمضان تاعي الاول في داري. حابة تعاونوني بافكاركم و و صفاتكم و نصائحكم في طريقة التنظيم و التقديم.........وما الى ذلك و خاصة راني حامل في الشهر الثامن و خفت مانتوفقش في تحضير مائدة الفطور شكرا لكم مقدما

[تقية1984]

ربي يتمم لك حملك بخير وعلى خير حنونة

ان شاء الله البنات اللي عندهم خبرة يفيدوك

[ام عبدو و ملاك]

يا اختي ما تفورسيش روحك الحمل راهو واعر سيرتو رمضان و زايد الشهر الثامن ديري واش قدرتي وان شاء الله كلش يجيك مليح و مازال الايام و كي تزيدي ان شاء الله و تريحي وريلهم شطارتك

[أثيلة]

أختي رمضان مش هو الوحيد لي تبيني فيه شطارتك و ربي يتمم حملك على خير و الفطور طيبيه على طريقتك أما عن التزيين تاع المائدة اذا كانو عندو خياتو تبعي عليهم و اذا كان ماكانش زينيها بطريقة خاصة بك و فرضيها عليهم و اكيد شيء لي تخدميه راح يكون شباب مثلك و حلو كيما حلاوتك يا عسل

[smoua1]

سلام اختي ..... راكي كيفك أول رمضان في بيت زوجي وحامل في شهر الثامن نصيحتي ليك انك تخففي على نفسك وحافظي على الحمل وربي يوفقنا في صيام وقيام ويتقبل منا و منكم

[شمس بريكة]

ربي يتمملك حملك اختي و تسلكي على خير

[أم ياسين الزهراء]

ربي يكملك على خير نصيحتي ليك ان وين شفت الوقت يساعد نوضي طيبي ادا توتيك خدمة الصباح نوضي الصباح وديري كلش كلش وهك تريحي لعشية ونصيحتي ايضا ماترقديش بزاف في الصباح يعني نوضي بكري وارقدي بكري وكلش يفوت بخير والله يعاونك

[أم ريتاج زهرة]

يا ختي فكرتيني برمضاني الأول نتاعي في داري و الله و حتا أنا كنت في الشهر الثامن و الله غير راكي خايفة قضي و ريحي و ماتخافيش كلش يفوت المهم صحتك و صحت البيبي و ربي يوفقك

[choroukguid]

ربي يقومك بالسلامة وتولدينا بيبي شاطر كي ماماه ماتعبيش روحك بزاف
خدمي قد طاقتك والمنتدى راه زاااخم بالاطباق شوفي اللي يعجبك وطبقيه ماتقلقي راسك ماوالو ورمضانك كريم

[omayoub2]

ربي يتمملك حملك اختي و تسلكي على خير

["أم بلقيس"]

أختي العزيزة
فكرتين بروحي في أول رمضان عند بيت شيخي الفرق الوحيد أن انا كنت في الشهرالثالث يعني وقت الوحم صراحة هذا الوقت حملت نفسي فوق طاقتها و عنيت الأمرين و الحمد الله خرجة سلامات
حاولي ما تضغطيش على روحك و صحتك و تهلاي في روحك و في البيبي لأن شهر الثامن لازملو راحة شوية
و رمضان ماشي راح يخلاص العام الجاي إن شاء الله وعوضيهم

[أم شروفة]

يا اختي اكلات رمضان نفسها في جميع الوطن .نقلك تجنبي انك تجربي اطباق جدييدة هههههههههههههه لانو ايام عرسي جاء رمضان وقلت نبين شطارتي لاهل زوجي .وجربت الغراتا وفي الاخير لم تنجح ............ومن يومها حلفت على الغراتا وعلى اني نجرب شيئ جديد

[الماسة النادرة]

حملك وهو الصح لاتولدي في الشهر الثامن وزيد راكي مدة وانتي معاهم يعني ذاقو طيابك

[عآشقة الجنة]

مام أنا رآني أول رمضان في بيت زوجي لفطور عليا ليوم و حايرة شوية بصح حا ندير كيما مالفة في دارنا لفريك و لبوراك و سلاطة و لحلوو طاجين زيتون ولا مثوم و سلطة الفواكه تاااني و غدوة راهي تجي الأفكار لفطور وحدهم لمهم حنا نكملو رمضان في طاعت ربي ربي يسلكك على خير مام أنا رآني في شهر السابع نستحفظو على روحنا حنونة و ربي يكون معااك
صحا فطوووركم <3

[imanebedd]

شكرا جزيلا لكن اخواتي جزاكن الله كل خير ساعمل بنصائحكن ......البارح تعبت بزاف حتى لفطور ماقدرتش نفطر ........ربي يعطينا الصحة و يحفظنا و يسهلنا امورنا