دولمة عصرية من مطبخ لهلوبة

[إلهام07]

البسملة1


مساء الخير حبيباتي وصحة فطوركم


على عكس ما ظن البعض انني نحط الصور ونهرب ونبخل بالوصفات والله يا أخواتي من يوم حطيت الموضوع وطلبتو الروابط كل يوم نحاول نحطهم لكن ما حبوش يفوتو الروابط حطيت البعض فقط اللي قدرت
على العموم اللي عندها طلب وصفة معينة تطلبها ونعطيها الرابط ، معظم الطلبات كانت عامة وانا مانقدرش نقرى الافكار ونعرف واش من وصفة تحوسو أطلبو الوصفات بالاسم باش نجاوبكم




قبل مانحط الوصفة لازم نذكر مجددا أن الوصفة ليست لي ولكن للأخت المبدعة لجين أخذتها من الفايس ولكن أخذت الفكرة فقط وغيرت الوصفة تماما ( هاه لازم نغير الوصفة وإلا مانسماش من عضوات الجلفة شعارنا التحريف خخخخ ) ..................... تابعوها وإن شاء الله تعجبكم كيما عجبت عائلتي :


المقادير للمرق :
- حوالي 5 أو 6 حبات بطاطا ولكن لازم الحبات يكونو صغار أنا كل البطاطا اللي كانت عندي كبيرة ، كل ماتكون صغيرة يكون الشكل أجمل
- ملعقة كبيرة زبدة + 4 ملاعق زيت للتقلية
- 3 فصوص ثوم
- قطعة صدر دجاج إذا توفر ( انا ماكنش عندي عوضتو بقطعة ماجي نكهة دجاج )
- حبة بصل متوسطة
- 3 اوراق رند
- باقة مشكلة ( انا هنا استعملت سيقان المعدنوس باش ما نرميهش ) اللي ماعندهاش ممكن تحط معدنوس مقطع انا حبيت الصوص تبقى خالية من الشوائب .
- فطر
- كرام فراش حوالي 4 ملاعق معمرة مليح
- ملعقة كبيرة فرينة
- جبن مبشور أي نوع تحبو
- التوابل : ملح ، فلفل أسود ، ثوم بودرة ، زنجبيل بودرة ، مكعب مرق دجاج ماجي
- للحم المفروم : لحم مفروم ، ملح ، فلفل أسود ، 3 فصوص ثوم ، ثوم بودرة ، شوية بصل مرحي ، زوج ملاعق شابلير ( خبز مرحي ) ، بياض بيضة ، معدنوس مقطع رقيق ، قطعة صغيرة زبدة للطراوة .



الطريقة :

- أولا : نقشر البطاطا ونقطع كل حبة إلى دوائر ماتكونش خشينة ونملحها ومالازمش نخلط الحبات مع بعض خليهم كل واحدة على حدة .
- نقلي كل مرة في الزيت بالحبة باش مايتخلطوش الدوائر ونحطها تقطر من الزيت .
- ثانيا : نخلي البطاطا تبرد ونوجد اللحم المفروم نخلط كل المكونات مع بعض ونعجنها مليح .
- ثالثا : نأخذ أعواد الشواء ونحط مثل الصورة دائرة بطاطا ثم دائرة تكون شوية سميكة لحم مفروم ( لأنها رايحة تنكمش ) وهكذا حتى نكمل .
- نصفف الحبات في صينية الفرن
- الكمية المتبقية من اللحم المفروم نعملها كريات ونخليها في الثلاجة على جنب .
-رابعا : نوجد المرق
- نقلي في الزبدة والزيت البصل ثم نضيف صدر الدجاج إذا توفر و الثوم والفطر والرند وأعواد المعدنوس ونقلي شوية
- نضيف الملح والتوابل ونقلي شوية برك ونمرق بحوالي ثلاثة كؤوس ماء ساخن ونضيف مكعب مرق الدجاج
- كي يغلي المرق نرمي كريات اللحم المفروم ونضيف لاكرام فراش وملعقة فرينة نذوبها مليح في نصف كاس ماء بارد + جبن مبشور ( أنا حطيت جبن مبشور وزدت شوية جبن أبيض وشوية كامومبير )
- كي تعقد الصلصة نصبها فوق البطاطا وندخل الصينية للفرن حتى تتشرب البطاطا الصوص ويطيب اللحم ( حوالي نصف ساعة ).
- نخرجها ونقدمها مع رشة معدنوس وجبن مبشور والله يابنات طبق لذيذ جدا جدا ويحمر الوجه خاصة قدام الضياف في عرضات رمضان





هذا الطبق راهو زاكي يعني تبان الكمية قليلة ولكنه يشبع من الجبن والكرام فراش اللي في الصوص مممممممممممم والله بنين يهبل جربوه ماتندموش














قدموها مع سلطة خضراء جي معاها هايلة


ماتحسبونيش ناس ملاح كي حطيت الوصفة نونونونو

راني طامعة في دعاوي الخير في هذا رمضان وماتنساوش صاحبة الوصفة


تحياتي للجميع

[&ام ايوب&]

مممممم تشهي
ربي يحفظك ويرزقك الفردوس الاعلى
مشكورة الهام

[marwa rose]

واااااو ماشاء الله تهبببببببببل بصحتكم
سلمت يدااااااااااكِ

[goraya]

سلام اختي الهام صحه رمضانك وكل عام وانتي بالف خير اشكرك جزيل الشكر على كل المجهودات التي تبذيلينها من اجلنا كل وصفاتك رائعه اطبقها بكل ثقه بارك الله فيك دمتي لنا وفيه

[mama kika]

بارك الله فيك فكرة رائعة

[زينب 83]

اهلا و سهلا الهام توحشنا ابداعاتك حبيبتي
ربي يبارك فيك و في رزقك و يحفظ كل عزيز و غالي على قلبك
يثبت الموضوع

[ام منيب]

رمضانك بالصحة الهام
و الله غير دهشني الطبق و سيغتو طريقة تقديمه
ربي يبارك فيك

[melissat]

ياي يشهي ربي يبارك في هدوك اليدين توحشناك حبيبتي الهام وتوحشنا وصفاتك ربي يجعلها في ميزان حسناتك

[حياتي نبع امل]

اهلا لهلوبة هاذي غيبة وشراكي
يعطيك الصحة ع الطبق وربي يجازيك عنا احسن الجزاء

[اريج 07]

ربي يعطيك واش متمنية و يعطيك على قد قلبك
ولا ةنسى صاحبة الوصفة الشكر موصول لها
دمتي متالقة

[أ م ساجد وسيم]

هاذ لوصفة دوخ لواحد ديراكت اممممممممم راني نتخيل بنتها امممممممم
ربي يفرحك راهي تشهي لازم نجربها

[أ م ساجد وسيم]

هاذ لوصفة دوخ لواحد ديراكت اممممممممم راني نتخيل بنتها امممممممم
ربي يفرحك راهي تشهي لازم نجربها

[المتألقة]

الله يعطيك الصحة

[حياتي كلها امل]

ربي يعطيك ماتتمنايه انتي وصاحبة الوصفة

[أم ضياء عبد الرحيم]

يا سلام عليك لهومة فنانة و أطباقك رائعة كروعتك
ربي يعطيك ما تتمناي عاجلا غير أجل و يفرحك و يهنيك