الذ لوبيا في العالم تع الزواليا

PIPITA FLEURE · 2014-09-17, 13:43

السلام عليكم انساتي سادتي اليوم اول موضوع ليا في هدا الركن اتمنى دوام الصحة والعافية للجميع اولا انا مخطوبة و قريب عرسي و بخصوص الطياب نعرف ماعلياش غير الحلويات الله المستعان مانعرف علاه مايصلحوليش بصح الطياب يجيني روعة الحمد لله خاصة الاطباق التقليدية و كل المرقات الان ناتي الى الوصفة الرائعة و مايجعلها اكثر روعة انها تع الناس كامل لي عندهم ولي ماعندهمش و تصلح في الحالات الطارئة كيما مايكونش عندك لحم ولا دجاج و هي اللوبيا درتها البارح في دارنا للغدا ماتوااااا عليها جات بنينة و حلوة تهبل و اسهل مايكون بشرط انها تطيب في لا كوكوط و تكون اللوبيا مشمخة من قبل و مكونجيليا الان المقادير بسم الله تجيبي لاكوكوط ترحي فيها حبة بصله و 4 سنات ثوم و 3 ملاعق صغيرة ملح و فلفل اكحل كثري شوية هو سر البنة و 3 ملاعق كبار طماطم مصبرة و شوية زيت نباتي باه تقلي المكونات و حطيها على النار و زيدي شوية ماء باه ما تتحرقش و حركي و غطيها و خليها تتقلى 10 دقايق هكاك منبعد كي تدبال البصلة و تتقلى حطي الماء لتر ونص و لا 2 على حسب لا كوكوط تاعك حركي مليح و غطيها منبعد كي تشوفيها ولات تغلي حطي اللوبيا مشمخة و كربوط فلفل حار خليه يطيب شوية للريحة برك منبعد نحيه اقفلي لاكوكوط مليح و خليها طيب ساعتين ولا نتي شوفي كي تحليها لاكان طابت طفيها لاكان لا زيديلها الماء و خليها تطيب مليح خير تجيخاترة و رايبة لون برتقالي روعة روعة عن تجربة

natacabell · 2014-09-17, 14:07

يعطيك الصحة ضاهر عليها بنينة و اكيد و نضمنلك لوكان تزيدي تكسري راسك مليح مع الحلويات تولي محترفة و احنا رانا هنا نتعلمو٠٠٠٠٠ وان شاء الله قبل متروحي لدارك تكوني الله الله عليك و مبروك عليك مزيان السعد عليك

مسلمة0 · 2014-09-17, 14:14

السلام عليكم.
علاش ما درتيش فيها حشاوش (كيما الكمون) وطماطم حب تجي خير! سر اللوبيا: الكمون

zamilio · 2014-09-17, 17:49

ربى يحفظك ومرحبابيك

lahna moka · 2014-09-17, 20:29

شكراااا حبيبتي على الوصفة
و عندي اضافة و هي السر في بنة اللوبيا "الكمون" يعطيها ذوق رهيييب و تاني انا نزيد فيها زرودية مقطعة شرائح دائرية يمي يمي

emie201 · 2014-09-18, 08:35

merci pour la r7

بنت مسلمة · 2014-09-18, 08:54

اللوبيا لم تعد طبق الزوالية لان الكيلو ب 30000

oumtamime07 · 2014-09-18, 09:03

والله صدقتي يااختي بنت مسلمة

maloo · 2014-09-18, 10:54

اقتباس:

المشاركة الأصلية كتبت بواسطة lahna moka

شكراااا حبيبتي على الوصفة
و عندي اضافة و هي السر في بنة اللوبيا "الكمون" يعطيها ذوق رهيييب و تاني انا نزيد فيها زرودية مقطعة شرائح دائرية يمي يمي

صدقت الكمون هو سر البنة في اللوبيا

PIPITA FLEURE · 2014-09-18, 21:50

اقتباس:

المشاركة الأصلية كتبت بواسطة بنت مسلمة

اللوبيا لم تعد طبق الزوالية لان الكيلو ب 30000

لاحول ولا قوة الا بالله اختي لكن قصدي تع الزواليا لانها بدون لحم و دجاج وليس عن سعر اللوبيا اي ست البيت تستطيع عملها في اي ظرف وفي اي يوم شاءت

ام ايمان16 · 2014-09-19, 12:17

يعطيك الصحة

أمنية غفران · 2014-09-19, 17:07

بارك الله فيك أختي ........... طريقة ساهلة و خفيفة صحيتي يا الفحلة ننتظر طلتك ديما

awam · 2014-11-18, 10:30

انا جربتها صح راهي بنينة وديمة الحاجة البسيطة احسن من المعقدة يعطيك الصحة و يبارك في يديك يا غالية

meriemmimi22 · 2014-11-18, 10:42

نفس طريقتنا أختي يعطيك الصحة و لكن كاضافة أنا ندير الكمون تجي تهبل و كيتبقالها شوية و تجهز ندير قصبر تجي روعة

ام نور الهدى 2014 · 2014-11-18, 12:28

امممم بصحتكم
و لكن كيما قالو الاخوات الوبيا بﻻ ثوم و كمون ماهيش كاملة هههههه
و عند التقديم و هي سخونة نظيفورها قطرات تاع خل امممممم شيء رهيب سورتو يامات الشتا و البرد