جرحي لا يشفى وسببه زوجي

[مشكلتي]

سلام الله عليكم
مشكلتي زوجي يكره بكائي عندما يصرا مشكل بيناتنا بسبب لا مبالاته وناسي اني نبكي باش نصيطر على غضبي وباش منغلطش في راجلي
والحمد لله من نهار زوجت عمري لاسبيته او هنته
لكن هدا ميقدروش
توقف عن العمل في شركة تاع بنوك وقال تهنيت وكنت نشجع فيه ووراها حب يرجع مجرد كلام بيناتنا قتله مترجعسش ونديرو مشروع نسترزقو حلال احسن من الحرام واش عملي ...تلفظ بلفظ غير اخلاقي مفادته انا فسدتله حياته لفظ يقولوه تاع الشارع في هاديك الدقيقة قتلني قتل كلش وليت نحس روحي حقيرة ...سكت وبكيت وقتله اعمل واش تحب في لحظتها قررت نطلق رغم انه عندري ولد ....ومرت الفترة وحبس وكنت نصبر فيه بالرغم من جرحي انه ربي رح يرزقه وبالفعل جاه منصب عمل والحمد لله
قبل المنصب جاته وحد الحالة عاد دائم النوم لا صلاة لا والو والياس والهم حبيت نوضه هدرت معاه مفادش تشجته مفادش جبت حكاية تشبه لحكايته وخليته يشوفها وكتبتها في قسم مشكلتي باش يتحرك بالفعل تحرك لدرجة انه هاني وسبني وقالي معندكش كرامة كي راني واقفة معاه هادي كانت الضربة التانية اللي قسمت ظهري انا منملكش في الدنيا غير كرامتي وهو قتلني في هاديك الدقيقة
الان راه ناب عليه ربي بالخدمة لانه مرجعش للخدمة تاع لحرام
نجي ننصحه يقلب وجهه يعني ملاحظت حتا حاجة مقدرتش نفهمه نفسيته
اما نفسيتي محطمة كلش نديره يتقلب عليا ساعات نقول نستاهل مكانش حد يستاهل الحب من غير ربي
مقدرتش ننسا الشي اللي دارلي ساعات نقول ممكن انا مقلقته نخليه يعيش حياته مع الاسف معنديش الزهر لا مع الزوج ولا مع اهله ولا مع اهلي حتا مع الناس البرانية وليت نحس هاد الدنيا حبس كبير

[kacimo.samy]

السلام عليكم
طلاق لا تفكري فيه
وزوجك ماتخفيش راح يتسقم ان شاء الله
وكاين ناس لي صح تخلط الهدرة في وقت الغضب و اليأس
وانت نصحتيه ودرتي لي عليه ....جربي تضربي نح ما تسمعي حتى هدرة تقيسك...
مليح السكوت ..
لواحد يوصل المرحلة غير اخطيك منو نصائح تاعك احكمها عندك
لانه ذاق ذرعا ....
مرة انا جا واحد يواسي فيا بالايات وامثلة وووو انا ثما جبدتلو كل شئ ...
اي حاجة تاع مواسات جبدتهالو وقتلو نعرف وحبستلو موخو
ثم سكت وقالي معاك الحق...
هذا واش نقلك مواسات بزاف تعيي اخطوه وخالوه ..
الواحد اعطوه الحل موش مواسات فقط والبنادم يكره
حاجة برك هي كثري دعاء ليه وصلي الفجر
كي يشوفك هكذا وحدو يتريقل معاك ويطلب الصفح
ربي يفرج عليكم
طلاق ليس حل لكل المشاكل

[mohamed nadim]

ربي وليدك بالاك تلقاي الخير فيه

على حساب ما راكي تحكي بالاك ماشي سور

[قدور بن عاشور]

بدل أن تكوني حزينة يجب أن تفخري بما قمت به.
أخرجت زوجك و العائلة بأكملها من الحرام إلى الحلال
بعض النساء لا يهمها رزق زوجها حلال أم حرام، المهم القفة
بارك الله فيك، و تجاوزي عن أخطاء زوجك فلا كرامة تفرق بينك و بين زوجك كما لا توجد كرامة مع والديك

[sudo]

الرجل بطبعه لا يحب المساعدة من المرأة إلا إذا طلبها منها ، بالاك انتي كي تنصحيه يفهمها بأنك تقللين من شأنه ، حاولي تنصحيه بطريقة غير مباشرة غيري الأسلوب مثلا ... طبعا لست أدافع عن زوجك و لا اقصد بأن الغلطة راهي فيك و لكن للمعلومة فقط أو للتذكير . أما بالنسبة لكي حاولي تكوني في الوسط ما تفرطيش في زوجك و في نفس الوقت ما تفرطيش تاني في نفسك عيشي حياتك و تمتعي بوقتك .

ربي يفرج عليك و كثري من الدعاء و الاستغفار .

[رندة.]

السلام عليكم ورحمة الله وبركاته

ردود فعل زوجك القاسية معاك كانت نتيجة اليأس الي كان فيه بعد ما توقف على العمل، وطوّل باش لقى خدمة، وثانيا لأنك باقية تقلقي فيه بالهدرة، هو عللابالو بالحالة الي راهو فيها مش محتاج تذكريه وتزيدي تعاودي. هكا راح يحس بلي راكي تضغطي عليه وما يقدرش يتحكم في غضبه ويتلفظ كلام ما يعجبكش.

بالتالي خليه على راحته، انتي اهتمي ببيتك وابنك وبيه هو ومتطلباته... خليه يدبر راسه وحده، الا اذا طلب منك رأيك او مساعدتك هنا ما تبخليش عليه.

ربي يوفقك ويسعدك مع زوجك ان شاء الله

[روح المي]

الطلاق ليس الحل فهو هروب لمشكلتك توجهي لنصح وان لم يجدي توجههي للخالق وحده سبحانه يمكنه ان يلين قلب زوجك ناحيتك
وحاولي متامريش راجلك يعني شوفي في يوتيوب كفاه تخليه بطريقه غير مباشرة باه ينفذ كلامك
هو غلط معاك في كلام من اول مرة نورمالمو متسمحيلوش واكيد بداها بشويا بشويا حتى تمادى يعني كلام محترم انت تفرضي عليه باسلوبك وكلامك اللبق لا اقصد مجاراته او معاندته ...والطلاق مجتمعنا لا يرحم وليس هناك سبب كبير لطلاق المشكلة الوحيدة التي اراها عدم الصلاة ركزي عنها ذكرييه بالله كثيرا ربما كان غافل ربما تمكن الشيطان منه لكن اي انت من كل هذا ظاهر في مشاكل اخرى بينكم انت ادرى بها

[لؤلؤة تلمسان]

عامليه اختي بالحسنى ، نصائح وكلام كثير قللي منه ، قومي بالواجب واحسني وفقط

سيهدأ وتهدا نفسه ، وادعي ربي ان يصلحه لك ويهديه لك ، وسترين الدعاء له عجااائب ، ربي يوفقك اختي ويبارك لك في ولدك ويهنيكم

[dounia vet]

السلام عليكم
ان شاء الله يشفى هاذ الجرح و يا ريت اختي لو تتخلي عن هاذ الكلام لانه تهويل من الشيطان لعنة الله عليه...هو يضخم لك الامور و يجعلك تفكرين انك ضحية.وووو...حسب روايتك واضح ان زوجك اخطا التصرف معك و من منا لا يخطيء...و ربما انت اخطات التصرف او بالاحرى لم تستعملي الطريقة المناسبة لتشدي ازر زوجك...انا اعني الطريقة الملائمة لزوجك بالذات..لان التعامل يتوقف على طبيعة الشخص الاخر اذا كان ممن لا يحب كثرة تحليل الامور و يميل الى السكوت او انسان عصبي...يجب ان تختاري الطريقة التي تتوافق مع شخصية زوجك... عموما اختي نصيحتي لك لكي تخرجي من هذه ااحالة اولا ان تهتمي بنفسك اكثر و بهواياتك و بابنك و اكيد اكيد بزوجك...غيري اسلوبك في التعامل...اقراي مواضيع عن كيفية التعامل و ارضاء الزوج في ديننا الحنيف...كيف تكوني امراة مميزة في نظر زوجك...كيفية الحوار البناء و الهادف مع الزوج...انت فقط من تستطيع بعد الله تغيير تعامله معك...اسال الله لك السعادة...اكثري الاستغفار و الدعاء ..السلام عليكم

[المكارم]

التفكير في أوقات الأزمات يختلف بين الرجل والمرأة فلكل واحد منهما تفكيره وأسلوبه الخاص
بإدارة الأزمات خصوصا المالية منها .. وعلى حسب ما أوضحت في مشكلتك بدأ سوء الفهم بينكما
بعد انقطاعه عن العمل وليس قبله ومن المحتمل أن تكون طريقتك المتبعة في مواساته ومساعدته باقتراح
حلول لمشاكله لا تناسب تفكيره أو شخصيته وهو ما يجعله عنيفا في ردة فعله على كل مقترح منك ...
غيري أسلوبك في تقديم الحلول ولا تحدثيه يوميا عن العمل ومشاكله لكي يجد فسحة كافية لمراجعة
حساباته وترتيب أفكاره ... وربي يفرج عليكما

[*حامل المسك*]

المراة هي اللي داءما تخلص ربي يفرج عليك عليك بالدعاء قراءة سورة البقرة يوميا فبها تسهل امور كثيرة

[هـــدوء]

ثبتي روحك عزيزتي كلمة زوج تقولي قتلني . هذا غير قالك كلام وليتي تبكي و حسيتي روحك حقيرة مالا نهار يعطيك طريحة وش ديري.

نتفاهمو سع على البكا تاعك. هذا لي تضالي تبكي ديما مشي حكاية معلومك المراة البكاية واحد ما يحبها .و البكاء تاعك يوصلو فكرة بلي أنت أضعف مما يجب يعني تخليه يحسك مسؤولية مضاعفة على عاتقه .يعني بدل ما تعاونيه تزيدي عليه. و المعاونة كيفاش تكون ؟ مش ضروري تمديلو دراهم و لا تشجعيه و لا تقوليلو كلام حلوالمعاونة أبسط شي تبينيلو بلي قادرة تتحملي .يعني مرأة فحلة ما تنكسرش بانكسار راجلها بالعكس كي ينكسر هي تهزو معنويا بالدرجة الأولى و ماديا ان اقتضى الأمر .

نروحو لكرامتك . كيفاش الانسان يحفظ كرامتو ؟ مشي بالبكاء و طلب الطلاق و التسيتيت . لا عزيزتي الكرامة تحفظ بالمواجهة واحد كي يغلط فيك واجهيه قال يا فلان عس كلامك . كلامك ماعجبنيش و هكذا . انت بالعكس رحتي تبكي و سكتي و قفلتي الموضوع و هذا هو لي مش راح يحفظلك كرامتك السكوت . و الدليل زاد قالك كلام مش مليح مرة أخرى. من جهة اخرى هو قال كلامو أكيد في لحظة غضب .

راجلك يخدم و يحبس يخدم و يحبس و هذا في حد ذاتو ضغط كبير و مسؤولية .راه ظرف يخليه يخمم بالساعات و متعب و مرهق نفسيا . و نتي فوق راسو تهدري عييتي تسكتي.و تشجعيه على حد قولك . في ظرف كيما هذا هو محتاج ينظم أفكاروا يدرس الفرص لي عندو و مابين ما يدير الشي هذا يحب يلقاك قايمة بالدار و يحسك ما تبدلتيش من ناحيتو أو أقل شي مش مأرقك الموضوع . أما أنتي يا تبكي يا دبري عليه يا تخمي في الطلاق!

راح تقولي خفتي على راجلك و حبيتي تعاوني . شوفي أي انسان كي يكون في أزمة مبدئيا يحب يحلها وحدو يقعد يحاول يحاول يحاول حتى يحلها و اذا عجز ساعتها يطلب المساعدة بش ما يتفاقمش الوضع. انت رحتي لفترة المحاولة تاعو و ماخليتيه لا يركز لا يحل زدتي دوختيه. نورمالمون تخليه براحتو و انت تكملي حياتك كشغل ماكان مشكل حتى يحلها هو من عندو . و اذا ما قدرش يحلها و عجز تماما ساعتها عاونيه واحد ما يحكمك.

او اخيرا الطلاق. يعني نتي كرامتك هاذي ما خممتش في الطلاق غير كي حبس راجلك الخدمة ؟ بالعكس في الفترة هاذي بالذات لي لازم تقوفي معاه .ماشي كي يكون لباس بيه ننساو كرامتنا كي طيح بيه نتفكروها.ردي بالك .الطلاق يكون في حالة استحالة الحياة الزوجية ركزي مليح استحااااالة . مش يقولك كلمة زوج خلاص .

الخلاصة نقصي البكاء و مادبريش عليه و تعلمي تتناقشي مع راجلك بهدوء و بعقلانية كي يكون جاهز للنقاش و كي يدير حاجة ضد رغبتك عبري قولي بلي راهي ضد رغبتك .
.