لا أدري ماذا أفعل

[مشكلتي]

ندخل مباشرة أنا فتاة عمري 22 سنة , قرييت للباك و حبست , المهم حوست على خدمة و لقيتها تاع عقود التشغيل , خدمت نورمال و الكل يشهد لي بحسن الأخلاق و التربية , ندخل نخدم و نخرج منحكي منقصر مع حتى واحد , المهم واحد المرة طفلة تخدم ثما قاعدة تقصر و دارتني مضحكة و الكل ضحك عليا مع اعلم اني محكيت معاها منعرفها هكاا واحدها دارت الجاست هذا , انا قلقت و رحتلها قلتلها بهدوء متعاودش التصرف هذا , و هي معرف وش صرالها و بدات تسب و طيح في الكلام و راح تضربني و منا ( هي معروف انها وقحة و نزقة جدااا) المهم كي شفت هكاك انا عندي سمعتي قلت نروح خير ما ديرلنا فضيحة , انا رحت قريب نخرج و نلقاها قدامي و بدات تعيط و تسب و تكفر ربي سكت عليها و خليتها و من داك النهار و انا نتحاشاها . القصة هذي فات عليها شهرين الان و البارح كنت نخدم تلاقيتها ثما بدات تسمعني كلام و تهين فيا امام زميلاتها ,قلت نروح نجبدها من الشعر و لي يصرا يصرا منبعد استغفرت ربي لانو الخدمة هذي بسيف ما لقيتها و منيش حابة نخسرها و منعديش حل اخر و عفست ععلى قلبي و تجاهلتها , المشكلة الان اني كرهت الخدمة و كرهت الطفلة هذي و كل ما نروح نخدم نروح خايفة و مقلقة و كاني رايحة للموت قولولي كيفاش ندير هل نروح نضربها و لا نتجاهل و لا واش بالضبط راني مش نرقد و الله و حاسة روحي ضعيفة الشخصية امامها .

[نور الفجر02]

عادي اختي تحاشيها أفضل هذا كله غيرة بينيلها بلي انت خيرمنها وكي تشوفك ماتعبريهاش راح تسكت وحدها

[فارس وجواد]

السلام عليكم :
كان الله في عونك اختي الكريم , فهذا النوع من الفتيات المسترجلات , نحن الرجال أحيانا نعجز أمامهن , فما بالك بفتاة مسكينة , لأنهن ببساطة ما عندهمش حياء و ما عندهم علاه يحشموا ,
لذا أنصحك بتجاهلها فقط و إياك أن تجرك الى افعالها .

[just do it]

البنت كي تكون خارجة الطريق رغم انها تظهر انها على سعادة ولكن في قرارة نفسها تكون نادمة وتتمنى تكون كيما دوك العاقلات كيما نتي ولكنها لا تستطيع فتغار وتسعى جاهدة لتسويد حياتك حتى تصليها بالشتم وتبرهن هي انك لست متخلقة ومتربية
لذلك اختي انصحك ونقولك خلي الكلب ينبح حتى يسكت
وقراي وحد الابيات للامام الشافعي رحمه الله كنت دائما استدل بها ولكن في المدة الاخيرة نسيتها هههههه معناها
اذا خاطبك السفيه بكل حمق فخير من اجابته السكوت
يزداد سفاهة فازداد صبرا كعود زاده الاحراق طيبا
قصيدة طويلة
وكما قال الاخ والله كاين شي بنات مسترجلات حنا نحصلو فيهم ميصلحلها غي تسوطها بصح يقولو بنت وحقرها

[نورسين.داية]

أنا لو في مكانك نحكمها في الطريق قدام الناس و نكسرلها فمها حتى تندم على اليوم الذي فكرت فيه الإستهزاء بي ....صدقيني هذا النوع لا يليق معهم إلا هذا الأسلوب
وحتى لو أبلغت الشرطة قوللهم هي لي تعدات عليها لفضيا ثم جسديا .....نورمال

[lachiche]

اشتكي للمدير هو يقدر يديرلك حل

[mrmilano1984]

لاحول ولا قوة الا بالله مش متربية طوللللللللللللل حسبي الله ونعم الكيل باينة مش متربية وعديمة الاخلاق نعم تجاهليها او شوفي خدمة من غير خدمة هادي تتهناي من جدها

[خالد عنابي2]

حرشي عليها واحد يحكمها فالطريق يسرقها ويعطيها طريحة تع كلاب

[رانيا 1990]

لوكان شديتيها من شعرها و تهنيتي

[the_leader]

هذون ال"بنات" ماحشمو ماهم رايحين يحشمو
وادا مادرتيلهاش حد رايحة تكمل معاك وهكذا وبالاك تروح لابعد من هاك
نصيحة إذا تقدري تحبسيها عند حدها واش تستناي والا ماتمشيش واحدك مع خوك صاحبتك بنت عمك ....

[مجرّد إنسان]

أنصحك من قلبي أن تتركي العمل نهائيا خاصة إذا لم تكن حاجتك إليه ملحّة
فالمرأة العفيفة مكانها المناسب هو بيت أهلها أو بيت زوجها لكي تحافظ على شرفها وعلى أنوثتها
كوني في بيتك كالدرّة المصونة وتركي العمل للرجال الذين خُلقوا لضروف العمل القاسية
الرجال قوامون على النساء
والرازق هو الله

[Golden Princess]

خير ما فعلتي اختي و لا تقولي اك ضعيفة الشخصة بل بالعكس اتي قوية و قدرتك على تجاهل وقاحتها خير دليل

تاملي جمال معاني هده الابيات للامام الشافعي حمه الله

يخاطبني السفيه بكل قبح ..... فأكره أن أكون له مجيبا
يزيد سفاهة فأزيد حلما ..... كعود زاده الإحراق طيبـــا
اذا خاطبك السفيه فلا تجبه .....فخير من اجابته السكوت

ويقول

لما عفوت ولم أحقد على أحد ..... أرحت نفسي من هم العداوات
إني أحيي عدوي عند رؤيته ..... لأدفع الشر عني بالتحيــــــــــات
وأظهر البشر للإنسان أبغضه ..... كما إن قد حشى قلبي مــودات

ويقول

قالوا سكت وقد خوصمت قلت لهم ..... إن الجواب لباب الشر مفتـــــــــــاح
والصمت عن جاهل أو أحمق شرف ..... وفيه أيضا لصون العرض إصلاح
أما ترى الأسد تخشى وهي صامتة ..... والكلب يخشى لعمري وهو نبـــــاح

إذا رمت أن تحيا سليما من الردى ..... ودينك موفور وعرضك صــين
فلا ينطقن منك اللسان بسوأة ..... فكلك سوءات وللناس ألســـــــــــــن
وعيناك إن أبدت إليك معائبا ..... فدعها وقل يا عين للناس أعــــــــــين
وعاشر بمعروف وسامح من اعتدى ..... ودافع ولكن بالتي هي أحسن


لا تأسف على غدر الزمان فلطالما رقصت على جثث الأسود كلاب …
لا تحسبن برقصها تعلو على أسيادها … تبقى الأسود أسودا والكلاب كلاب

من اجمل ما قرات للامام الشافعي

اختي كيما نقولو العبيلها على المورال و خليها ماتديهاش فيها و اجرك على الله و ماتنسايش ادعي ربي يبعدها عليك

اتأسف لبعض الردود من الاخوة الكرام ما هدا ؟؟؟ أحن في حرب ؟؟ اين نحن من أخلاق رسول الله صلى الله عليه و سلم اليس هو من نهانى ان رد الاساءة بالاساءة؟؟؟
الله يهدي ما خلق