السلام عليكم؛ سيرين قريت موضوعك؛ حتى أنا عاملة و عندي تقريبا نفس مشاكلك؛ لكن قدرت نتغلّب عليهم و رايحة نعطيك شوية نصائح و تدابير؛
جربتهم و نفعوني.
بالنسبة لتهوية البيت؛ كي تنوضي الصباح حلي الطواقي؛ تكون النسمة باردة و منعشة و الدار تتهوّى روووووعة؛ و كي تعودي خارجة
للخدمة؛أغلقي الطواقي و خلي واحدة فقط مفتوحة للتهوية؛ أكيد أغلقي الشبابيك باش مايذخلوش الحشرات و الذباب و خلي الزجاج فقط مفتوح.
كي تعودي خارجة الصباح رشي في قنوات الصرف تاع الحمام و الكوزينة الجافيل؛ لأن الحال سخون و المجاري تنبعث منها ريحة كريهة؛ كي
تستعملي الجافيل ماتخرج حتى رائحة منها على ضمانتي.
ديري طاس صغير و حطي فيه top sol برائحة الورد أو الليمون؛ يقعد نهار كامل يبعث فالرائحة نتاعو فالجو.
بالنسبة للماعن؛ دبري راسك لازم ديري الكوراج و تغسليهم لأنهم سبب الروائح الكريهة؛ وباش مايتلموش عليك كل حاجة تخدمي بها أغسليها باش
مايتلموش فوق بعضهم؛ و هكذا كي يلحق وقت لعشاء تلقاي غير الصحن و المغرف لي كليتي بهم.
حاولي ماتفرشيش زرابى بزاف فالدار؛ باش هكذا كل يوم تكنسي دارك و ترشي شوية جافيل و تمسحي بالنشاف ؛ترجع دارك تشع بالنضافة.
بالنسبة للقمامة؛ خرجي سلة القمامة للبالكون أو أي مكان مهوي مليح و ماتخليهاش فالكوزينة؛ لأن المطبخ سخون ويزيد يساعد التعفن؛ و أرميها كل
يوم؛ و بالنسبة لزوجك؛ قوليلو راني درتها في زوج ساشيات و نرموها في أقرب سلة مهملات؛ كيما ندير أنا مع راجلي هههههه.
بالنسبة للملابس؛ مع تذخلي للدار حطيهم يتغسلو فالغسالة؛ الوقت لي تحضري فيه لعشا؛ يكونو يتغسلو؛ من بعد أنشريهم فالليل عادي.
أهم حاجة باش تنجحي في هذا الروتين؛ أنك تتوكلي على ربي؛ و كي تقومي بشغل الدار ماتخدميش فوق قلبك؛ حاولي تستمتعي باش جسمك يمتلأ
بالطاقة الإيجابية؛ وكل ماتكملي حاجة قولي الله يبارك ياربي قدرني نزيد نكمّل الدار كاملة و نتنعّم فالنضافة.
أنا ماشية بهذ الروتين وما تخافيش ماكسيموم 9 و نص تاع الليل تكملي كل شيء و يكون عندك الوقت باش تسهري مع زوجك و ديري واش
تحبي.
( تقرير عن مشاركة سيئة )، و الموجودة أسفل كل مشاركة .
2017-08-08, 13:46
العرض الشجري