أنا الوحيد في العائلة انجدوني أرجوكم

[مشكلتي]

السلام عليكم .. أنا الوحيد في العائلة متزوج ولدي ابنة وأبي وأمي على قيد الحياة .. تحدث مشاكل يومية بين زوجتي وأمي حتى وصلت لدرجة أنني أكره الدخول للمنزل .. تعبت ذهنيا فيزيولوجيا .. أردت الاستقلالية وحدي .. ولكنني خفت من العصيان ومن العقوق .. سؤالي هو هل عند خروجي أصبح عاقا ؟ علما أن أمي مريضة قليلا ولدي أختي تدرس 2 ثانوي وأبي مستقدر ماليا .. أعينوني راني كرهت ساعدوني واش ندير

[khelifa09]

راني كيفك. ياريت تقولنا نوع المشاكل . أخي أصبر ولا تترك أمك. وحاول تفهم زوجتك أن لا تحتك بأمك كثيرا وفهمها أن هته أمك وأنها يجب أن تصبر.

ربي يفرج عليك وعلى كل المومنين

[toulay]

وعليكم السلام ورحمة الله وبركاته
السكن المستقل راهو حق مشروووووووووووووووووع ومكانش كيما الاستقلالية الانسان يربح راحة باله وصحته ويتهنى من المشاكل اللامتناهية بين العجوز وكنتها
بالنسبة ليا عادي جدا ماكش عاق بالعكس من المفروض يفرحولك ويشجعوك باش تسكن وحدك
كاين عائلات حتى لو يسكنوا في قصر نهار ولدها يحب يتزوج ديرلوا داره وحده متسكنوش معاها تفاديا للمشاكل
والديك احترمهم وخلي لقدر بيناتكم بصح بنت الناس تاني راهي امانة عندك ومجاتش عندك باش تحمل الذل والاهانة كون هكذا بقات عند اهلها معززة مكرمة مثل الاميرات وتاكل الشيء لكتب الله
خليك صارم والديك في بلاصتهم وهي في بلاصتها
بالتوفيق

[زبدة ذايبة]

حاول مع زوجتك تخفف من المعارك اللي راه في الدار.

بما أنهما (في زوج) يظلو يداوسو*

هذا يعني أن وحدة فيهم ماتسمح للثانية.

وأن الصراع بينهما على السلطة.

حاول مع زوجتك* تعطي الطوع لأمك.

ماعندها علاه دير راسها براس لعحوزة.

تحاول تحسنلها ما استطاعت.

وماتنساش أنها في دارها.

هذ الدار اللي الناس يتقاتلو عليها.

أمك في يوم ما كانت هي سيدة البيت ومدبرة شؤونه.

واليوم جبتلها إمرأة تنافسها وتصارعها في دارها.

كل زاوية في البيت أمك عندها فيها حكاية.

باش تحي في الأخير زوجتك تحاول تنسف كل هذه الذكريات

وتنسف السلطة المطلقة اللي في يد أمك.

حاول تقنعها ترخي لحبل لأنه مامن فائدة ستجنيها.

أمك غير مرناحة معها.

والحمد لله ماقاتلكش طلقها.

عندك زوجتك أحكم فيها.

أمك ماراحش تعيش قد ما عاشت*

على الأقل أحسنلها.*

وكونلها والدا بارا.

وكيما دير مع أمك رح تلقاه في أولادك.

ماتنتظرش منهم ينفاهمو*

لكن يقدرو ينقصوا من المشاكل.

وابدأ من زوجتك.

واستعن بالله وسبوفقك الله.

[raouf07boy]

الاستقلالية هي احسن شيء للزوجة والام هكدا تنقص المشاكل بينهما ,,,,, كي تستقل لازمك اكيد تزور الام من حين لاخر وتطمئن عليها وعلى اخوتك وتشوف ادا خاصهوم حاجة ,,,,يعني لازمك تكون عادل مابين زوجتك واهلك,,,, بالتوفيق

[ابو سليمان10]

انا اعتبر المراة قاصر ممهما بلغ عمرها..ما الذي تبغينه من افتعال المشاكل

[قدور بن عاشور]

زير روحك صاحبي و اوقف مع الوالدة في العلن و مع الزوجة في الخفاء.

[afrimat]

راك رابح دنيا واخرة
اصبر اخي تصرف بذكاء . الام لا تعوض و الخت و الاب و الزوجة
وانت ايضا
كن محبا لهم جميعا والله المستعان

[❀حَـــ يآـــ هْ]

الله لم يخلقنا لتوقفنا مثل هذه الامور

الاستغفار ان شاء الله يحلها
قل: رب اغفر لي ولوالدي ولزوجتي وللمؤمنين
الاستغفار للغير يجعلهم ان شاء الله يتآلفون معك
فالارواح تألف من يستغفر لها

[زايدي أمحمد]

السلام عليكم أخي في الله احس لوضعيتك انك تريد تكون مطيعا لوالديك وترضي زوجتك وهذا لا يمكن الا ان تكون مستقل وهذا مالا تريده الحل سهل هو اذا كان لديك غرفة فوق منزل والديك عليك ان تستقل وحدك اي تجعل كوزينتك فوق وحدك لا مجال احتكاك زوجتك مع امك يعني مستقل وفي النفس الوقت في منزل والديك ... ربي يوفقك أخي

[عبق الزنبق]

راك قلت انو عندك اخت صغيرة
الوالد عايش و الحمد لله
مهما كان مرض الام راهي عندها اختك تعاونها
يعني كلمة وحيد ما عندهاش دخل لانك لو استقليت ماراحش تكون خليتهم وحدهم مادام باباك حي
من حق زوجتك السكن المستقل و من حق امك تعيش في ظارها كيما تحب
اذا راك مقتدر ماديا فالمشكل فيك انك عشت معاهم
و مادام البيت المستقل من حق الزوجة فلا عقوق انك تخرج بدارك هكذا تربحوا كامل راحتكم با لوكان تكري مثلا قريب من داركم و تطل ديما على اهلك و تقضي مصالحهم
و في نفس الوقت تتهنى من المشاكل
و اذا كانوا الوالدين معارضين خروجك عليك باقناعهم بالكلمة الطيبة حتى تلين قلبهم عليك
يا خويا حياتك راح تعيشها مرة وحدة علاه عليك القلق و الهم اللي جبتو لروحك و لزوجتك و لاهلك و ربي ما قالهاش بلي البر بالوالدين معناها تعيش معاهم بل انك تقيم بيهم و تهتم بواش يحتاجو
نتنمى نكون وصلتلك الفكرة
و ربي يوفق و يصلح الاحوال

[قمر الماس]

ربي يفرج عليك خويا و على جميع المكروبين والمهمومين

[أم داوود]

أقول لك جملة واحدة فقط
أبر بوالديك و أحسن لزوجتك ،، وكن لبيبا

[عماد الفقير]

السلام عليكم

شوف يا خويا لعزيز نهدرو حبّة حبّة
أوّلا طاعة الوالدين واجبة عليك و ماعندك حتى مبرّر مهما كان باش تعصي ربي فيهم ، فالحذر .
ثانيا ، في شرعنا الحنيف لا تُلزَم الزوجة على خدمة أبوي زوجها ، يعني ماتفرضش عليها تخدم والديك
(( لكن كما قال مشايخنا " ما تفعل بزوجة لا تقوم على طاعتك في برّ والديك ؟"))

ثالثا ، اذا كنت ممن يسّر الله لهم ماديّا ، دير دارك وحدك ، زوجتك و اولادك وحدهم ووالديك الكرام -ربي يحفظهم - وحدهم
و ديما كون مع والديك و كون في حاجتهم .
رابعا ، الجميع ينسى أمرًا مهمًا للغاية ، الدعاء يا أخي الدعاء مفتاح كل خير و مغلاق كل شر .

وفقك الله لكل خير

[أمة الرحمان رقيّة]

السلام عليكم



السكن المستقل حق للزوجة

اذا كنت تشوف المشاكل يوميا وما ديرش حل راك تؤثم

اذا كانت امك الظالمة تؤثم لانك جبت بنت الناس تعذبها وتخليها تتحمل امور ما وجبهمش عليها الشرع
اما اذا كانت زوجتك هي من تظلم امك فذلك العقوق بعينه انك تجيب مراة تتسلط على امك
اذن في كل الاحوال الحل تاعك في الابتعاد خاصة اذا كنت قادر ماديا