السلام عليكم ايها الاخوة والاخوات الكرام
راح نبدا مباشرة طرح مشكلت ونرجو تساعدوني بارائكم حسنا انا الاخت الكبرئ في البيت عمري 24 سنة ...من عمر 16 وانا اتولئ رعاية اخوتي لان امي مرضت في تلك الفترة واضطرت تسافر ولاية بعيدة لتعالج من سرطان الثدي عفانا وعفاكم الله ...المهم انا كنت صغيرة نوعا ما ولكن ربي الحمد لله عطاني القوة والنضج وكبرت بسرعة واصبحت ام لاخوتي خاصة انهم صغار عندي 3 بنات و شاب ...بعد 3 سنوات من المتابعة امي شفيت ولله الحمد و لكني اصبحت المسوولة حقيقة علئ كلش حتي والديا اصبحو يعتمدو عليا كثيرا واخوتي متعلقين بيا جدا و يسمعولي كلامي ويقدروني رغم ان الفرق بيني وبينهم مش كبير ...فاتت السنوات وحدث ان ابي وامي سافرو للحج وانا بطبيعة احال ايضا اصبحت المسوولة الاولي علي خاوتي نوكلهم نشربهم نطيب لهم نروح للجامعة نقرا ونرجع بسرعة لاجلهم والحمد لله ربي كان معايا ...كانت فترات صعيبة عليا وكنت بين الحين والاخر ننهار خاصة مع مرض امي وغيابها ووالدي كان معاها في وقت مرضها فكان كلش علئ راسي ....مهم تخطبت وتزوجت والحمد لله والان في منزل زوجي لا استطيع العيش قلبي عند اخوتي ...نحس بلي راهم ولادي وخليتهم مقدرتش نتعود ...طول مخنوقة وفي شوق مستمر ....طول نخمم عليهم طول نمرض ادا صراتلهم حاجة و نكتئب ما فهمتش واش راهي صاريلي ....نخمم علئ مستقبلهم اكثر من والديا و الله تعبت ...كي نروح لدارنا كل واحد من خاوتي يعيطلي وي حكيلي همومو مشاكلو ولازمني نلقالو حلول ولازمني نقويهم ويسمعولي صح بصح انا نرجع لداري مريضة حزينة لحزنهم او سعيدة لانهم سعداء ....خاوتي ياثرو في مشاعري بصفة كلية مثلا نكون في احسن حال نسمع حاجة صغيرة صرات لواحد فيهم نبقئ نخمم ليايلي وانا نطلع ونهبط ...مرضت يا خاوتي معرفتش كييفاش نبسط هاد المشاعر ونخفف منها داخلي ...سعات نقول انا مش طبيعية هل انا كدلك !!