كارثة كارثة

[مشكلتي]

يا اخواني واش نقول واش نهدر

عندي خويا خاطب وحدة بنت فاميليا من الاقارب

نحبوهم بزاف ويحبونا

وخويا خاطب بنتهم في عمرها 20 سنة

متفاهمين على العرس فالصيف الجاي والمهر اعطيناهم 10 ملايين تسبيق باش تجهز روحها

والدهب يشتريه خويا عندما يقترب العرس

لان خويا عايش في المانيا وقد جاء مؤخرا في العطلة

ومن ايام دخل علينا للدار قاللنا بطلت الزواج

أمي من شدة الصدمة مرضت

ووالدي قريب يضارب مع أخي قالو هاذا مشي لعب دراري

معرفناش واش هيا المشكلة

حتى جاو مواليها عندنا للدار

وعرفنا المشكلة

وهي ان البنت راحت لعرس خالتها وصورها واحد معرفناهش وقال لخويا انها كانت ترقص مع واحد ابن خالها

يعني الفيديو فيه البنت ترقص فالعرس

معرفناش شكون هاد الي دار هاد الفتنة واعطى خويا الفيديوا

ولما هدرنا مع خونا ومع البنت قالت امها ان خويا اعطاها الادن باش تروح للعرس

وكي هدرنا مع خويا قاللنا ان قلتلها روحي للعرس مع امك وقعدي مع امك وما قلتلهاش ارقصي مع الرجال

وامها تحلف وتصحف انها ما رقصتش غي مع وليد فاميلتها صغير عندو 15 سنة

ما فهمنا والو

وخويا قاللنا وحلف بالله ان ما يتزوجهاش

وبابا قال لأهل الفتاة صبرو عليه راهو مقلق وغاضب وراح يتهدى بعد أيام

خويا ماراهش معانا فالدار راهو عند واحد صاحبو وقاللنا في 10 سيتمبر يروح لالمان وما يزيدش يولي والله يسمح فالعشر ملايين

واش نديروا معاه

هادي غلطة وصرات والطفلة نعرفوها غلطت بصح ماشي قاع يدير هاكا

يارجال واش رايكم ويا نسا واش رايكم رانا حايريين

[ع.عيسى]

صراحة صعيبة بزاف انو الراجل يشوف مرتو ترقص مع واحد في عرس .رايح تدخلوا الشكوك والوساوس ......ربي يصلح الاحوال

[ابن الجزائر11]

ردة فعل الأخ ردة طبيعية وأقل ما يفعله يفسخ الخطبة
رآها ترقص مع شخص ما بغض النظر عن قربه لها

عن طريق فيديو

العجب العجاب
وهل تنتظرون من الأخ أن يقبل رجلها مثلا ؟

في نظري لا تلوموا الأخ فهو من حقه

بل لوموا من قام بتصويرها ليبطل الخطبة لأغراض شخصية

الله أعلم

متى تتأدب النساء في الأعراس وتبطل الاختلاط والخرافات ويمنعن الهواتف والكاميرات

[المُهَاجر]

الرجل على صواب، المشكل فيكم!
سبحان الله، أصبح صاحب الحق في غربة...

[نجاة^^]

غير ريحو رواحتيكم مشكيتش يولي في كلامو موقف الرجال في هذه الحالات راو معروف .

[خالد عنابي]

عندو الحق
هذه هي نتيجة انتشار الانحلال الاخلاقي في مجتمعنا حتى اصبحت هذه الامور عادية
وخاصة النساء في الاعراس وكأن هناك قاعدة تبيح في الاعراس ما يحضر خارجها !
مليح خلي كل وحدة تتأدب وتعرف حدودها
راجل يعطيه الصحة

[عثمان الجزائري.]

أسأل الله السلامة و العافية، صعب أن تقنع إمرأة بخطورة الأعراس رغم إمتلاء اليوتيوب و مواقع التواصل الإجتماعي بمثل هذه الفضائح، الآن هن أمام خيارين لا ثالث لهما، إما أن تذهب و تحتشم و تجلس في مكانها دون ان تثق في أحد، أو تخاطر و تتحمل العواقب خصوصا مع إنتشار التكنولوجيا بشكل رهيب، عودة إلى الموضوع أخوك له كل الحق و لا يمكن لأحد أن يلومه و الزوجة هي المخطئة و عليها أن تتحمل المسؤولية...فلا احد يحتمل ان يرى زوجته ترقص في الفيديوهات و لو كانت وحدها فما بالك مع شخص آخر....ربي يعفو بينا و يستر بناتنا و نساءنا*

[sohaibdz]

خوك رجل و سيد الرجال و انتم في عوض ما تدعموه و توقفو معاه في القرار الصائب خذلتوه و قفتو في وجهو الله يهديكم

[noursm]

اذا كانت صح رقصت مع قريبها اللي في عمرو 15 سنة .
بالنسبة ليا هذا الامر لا يعتبر الا حجة فقط لكي يتخلص اخوك من خطيبته .
طفل صغير يزيد يغير منه ؟؟
كان من المفروض يروح اخوك يبهدل و يمرمد الراجل اللي راح منين النساء و يصور في بنت الناس.
واش داه للنساء اصلا ؟؟؟
خلاص هو وصل للهدف تاعو انه يفرق و يخرب بين زوج مخطوبين .
و اخوك و خطيبتو هاه تفركشت بيناتهم، ربي يصلح احوالهم.
ربي يلطف بينا

[محارب الحمق]

الأخ له كامل الحق. هذه الفتاة لا تصلح له. لا بنت فاميليا لا عمار بوزوار. لمن جات ولات بنت فاميليا عندكم. قرار الأخ صائب. عليكم أن تقفوا معه لا ضده. روحو حوسولو على بنت فاميليا تاع الصح

[زبدة ذايبة]

مدام دخل مول 15سنة حتى مول 20 سنة يدخل.

واللي يدخل واحد يدخل عشرة.

يعني إذا كانت الأسرة متساهلة رح تكون الأمور كلها تحت مظلة كلمة

عادي ، نورمال.

بما أن أخوك رافض هذا الأمر يعني إنتهى الأمر.

ومسألة مبدأ في حياته.

ولا أعتقد أن اللي عطالو الفيديو إمرأة

بالنسبة إليه هذه المرأة شافها من هب ودب يعني خلاص صارت لا تصلح للزواج.

الحمد لله أنه مازال كاين الرجال.

ظنيت أن الدياثة تضرب جيلا كاملا.

ربي يرزقه الزوجة الصالحة.

[soz soz]

الطفلة غلطت كي رقصت بالاختلاط يعني لو
نظرنا للسن نقولو صغير بصح كانت تدير حسابها لروحها ولراجلها
اما لي دار الفتنة ربي يهديه ولا يهديها كانو ينصحوها فقط
وكيما قالو الاعضاء واش دخل الطفل وسط النساء وربي يصلح الاحوال ويرزقهامن جهة اخرى ويرزقو هو تان فالنهاية نصيب ومكتوب ربي سبحانه

[Dinho]

من الأفضل له ان يتزوج ألمانية ويدخلها الاسلام

فالزواج في الجزائر هو اشبه بالقمار

يا تربح يا تخسر

[zineb zizi47]

هدا لي صورها قعد يستنى فيها تنوض ترقص و يستنا في اللقطة باش يحكمها مع واحد بلاك قع المصور و راجل لي تهموها رقصت معاه متفاهمين المهم هدا مخطط ليه و باغيين يفرقو بيناتهم ادا راكي نتي متفاهما معا خوك و يسمعلك هزي روحك و روحيلو و فهميه بلي هدا ملعووب باغيين يفرقو بيناتكم و ملازمش يعطيهالهم و الطفلة يعطيها فرصة وحدوخرا

[أبوإبراهيــم]

لا حول ولا قوة إلا بالله !! بعد أن انتشرت الدياثة في مجتمعنا أصبح أهل الرجولة في غربة !!

أين هي الكارثة !!! ما فعله أخوك هو الواجب وهو عين الصواب وإني لأعجب على تركيز البعض على مسألة أنها رقصت مع شاب صغير عمره 15 سنة وإنا لله وإنا إليه راجعون

المصيبة في رقصها أمام الرجال وفي مكان مختلط ولو رقصت وحدها والمصيبة الأكبر أنه تم تصويرها !!

سبحان الله كيف لبنت فاميليا أن ترقص أمام الرجال الاجانب !! لو كان حفلا نسائيا لقلنا لابأس أمام العرس المختلط ما كان يجب أن تحضره أصلا وأخطئ عندما أذن لها في ذلك

أصبحت أعراسنا مثل حفلات الملاهي الليلية والله المستعان

أخوك راجل ونص وربي يبارك له ويرزقه زوجة صالحة