روطي الدجاج ( وصفة ماما الشهيرة )

[إلهام07]

البسملة1



مساء الخير طبايزاتي

هبلتوني على هذي الوصفة منين نحطها مع صور طياباتي تطلبوها وكتبتهالكم 77 مرة في رسائل خاصة وفي ردود بصح واقيلا ماشفتوهاش قلت نكتبها باش نهني راسي والله كرهت من المعاودة نتاعها .

توبة هاني مانسيتكش وهاهي الوصفة بالاكي ماديريهاش ضرك ماعندك حتى سبة




المقادير :

قطع دجاج حسب أفراد الأسرة( ياخي الجاجا راهو رخيس .. أبروفيتيو )
بصلة مقطعة شرائح
بطاطا حسب أفراد الأسرة
2 حبات جزر ( الجزر هنا ضروري ويعطي بنة تهبل إذا ماعندكش طبطبي على جارتك وسلفي عليها زوج حبات )
شوية زيت للتقلية ، 3 فصوص ثوم مقطعين ، أوراق رند ، فلفل أسود ، ثوم بودرة ومعدنوس فقط ماتزيدو تخربطو في الوصفة والو من عندكم بنتها في بساطتها .


الطريقة :

1- نقشر البطاطا ونقطعها دوائر وماتقطعوهاش رقيقة باش ماتتفتش قطعوها متوسطة السمك ونقليها عادي .
ملاحظة : الجزر أيضا تقطعوه دوائر وتقليوه مع البطاطا يجي يهبل بصح ماترميوهش من الاول في المقلاة كي طيب البطاطا نص طياب باش تلوحو الجزر لاخاطر يتحرق بسرعة لأنه حلو .
ملاحظة أخرى: البطاطا والجزر حمروهم في القليان باش يجيكم الطبق بنين لازم يتحمرو ( ماقلتش يتحرقو أهااااااه ماتقولوليش من بعد قريناها يتحرقو نونونونو قلت يتحمرو )

2- في الوقت اللي تقلي فيه البطاطا تكوني فحلة في الكوكوط تحطي شوية زيت وقطع الدجاج على نار متوسطة ( أنا نستعمل دائما الكانون الصغير نحب الحاجة طيب براحتها باش جي بنينة )
نقلي الدجاج بدون أي إضافات باش مايتحرقوش التوابل .

3- كي تشوفوه الجاج بدى يتحمر نضيف شرائح البصل والثوم ونبقى كل شوية نحرك باش مايتحرقش .

4- كي يتحمرو نضيف الملح والثوم بودرة والفلفل الأسود فقط ماديرو حتى توابل أخرى مفهوم ؟

5- نضيف الآن ماء ساخن ومانكثرش بزاف قيس مانغطي الدجاج هذا الطبق مايجيش فيه صوص بزاف ونزيد أوراق الرند.
ملاحظة: إذا حسيتي الجاج عندك قليل بزاف تقدري تضيفي مكعب مرق دجاج عموما الوصفة بنينة وماتحتاجش إضافة مكعب ماجي بصح إذا عادت الحالة مشومرة ....

6- نضيف أوراق الرند وسيقان نتاع معدنوس يكونو مربوطين باش نقدر ننزعهم فيما بعد ( اختياري إضافة السيقان ) نغلق الكوكوط ونحطها على نار قليلة طيب بعقلها .

7- كي يطيب نفتح الكوكوط وننزع سيقان المعدنوس ونضيف البطاطا والجزر المقليين طبعا يجيكم مستوى البطاطا قدقد مع الصوص مالازمش تنشف الصوص بزاف ( البطاطا كي تقليوها حطوها فوق ورق ماص باش مايجيش الطبق مزيت بزاف )

8- نغلق الكوكوط فقط 10د أو أقل على نار هادئة .

9- نطفي ونقدمها مع رشة بقدونس وراهو ضروري المعدنوس هنا ( إذا مالقيتيش عاودي طبطبي على جارتك خخخخ )


أحسن حاجة تتقدم مع روطي الدجاج هي السلطة الخضراء جي معاه روعة ( إذا ماعندكش ماكلاه تزيدي طبطبي على جارتك .. بزاف )

صدقوني إذا جربتوها إن شاء الله رايحين تعتمدوا الوصفة لأنو كل من ذاقها عجباتو وطلب الوصفة وراهو تسمى الطبق على اسم ماما يقولولو "الروطي نتاع ......." هههههه لاه تحوسو تعرفو اسم ماما ؟.... بركاو تقرعيج

قبل ما نخليكم مع الصور حبيت نوصيك تبعثي صحن لجارتك آآآآآآآآآآآآآو الزرودية من عندها والمعدنوس وبلاك الجاج والبطاطا ثاني بزاف كثرتي ....باش تبقى تسلفلك مرة أخرى ..سياسة













وهذا تطبيقي أنا للوصفة ( وااي أنا الأولى هههه)
نضحك برك ، طبعا تعلمتو من سنين لازم الميراث نتاع ماما واحد مانخليه يديه قبلي

هذي في عزيمة




نسيت نقوللكم باللي ماما كي يطيب الجاج تنحيه من المرق وتقطرو مليح وتعاود تحمرو في المقلاة في شوية زيت أو زبدة


هيا تصبحو على خير ....

[RIMA.87]

السلام عليكم
بارك الله فيك و في أمك و ربي يحفظك
و يحفظلك أمك و يجعل ما تقدمينه في ميزان حسناتك .

[ام هدول]

واالله يا الهام فكرتيني في ماما لعزيزة نفس الطريقة فقط مانقلوش الجزر ..وفي بعض الاحيان نكملوه في الفرن ..
سلميلي على ماماك وربي يحفضها خلاتلك صنعت ييدك لي هي الطياب ....كلو يشهي من تخت ييدك ..ربي يعطيك ولد لحلالال لي يتهلى فيك .....

[nihal159]

يا سلام على البنة؛ من شكله يشهي؛ يعطيك الصحة و ربي يحفظلك ماماك.
أكيد نجربها؛وصفاتك مضمونة نجرب و عينيا مغمضين؛ بارك الله فيك و ربي يعطيك ماتتمناي.

[nihal159]

يا سلام على البنة؛ من شكله يشهي؛ يعطيك الصحة و ربي يحفظلك ماماك.
أكيد نجربها؛وصفاتك مضمونة نجرب و عينيا مغمضين؛ بارك الله فيك و ربي يعطيك ماتتمناي.

[*توبــــة*]

امممممممممم واممممممممممم والف اممممممممممممممم
واخيييرا شفت وصفت ماماتك الغالية
ربي يخليهالكم يا لهلوووبة يا غالية ويعطيك ما تتمناي
ورايحة ندير بنصائحك غير نحمرهم ماتخافيش خخخخخخخخخخخخخ
مي اللي اطبق الوصفة ربي يعين جارتها عليها ههههههههه :d
ديكور السلطات راااااااائع ماشاء الله
شوفي اسم مامتك انا سميتها مامات اللهلوبة وهك نسمي الوصفة خخخخخخخخخ
وتطبيق اكثر من راااائع تسلم ايديك

مرسي بزااااااااااف الهاااموووووووو وربي يجعل كل نصيحة ووصفة من عندك
في ميزااان حسناتك يااااااااااااارب

[غفران 2]

اهلاوسهلا لهلوبةوالله توحشناك وتوحشنا اطباقك المميزة

نفس طريقة امي ربي يحفظها فقط زرودية ماتقليهاش
يعطيك الصحة ويسلم دوك اليدين

[حياة نور الدين]

اهلااا الهام الزينة يعطيك الصحة على الوصفة حقا روووووعة وتهبل ربي يطةل في عمر ماماك ويحفظهالكم يا رب ويفرحك انت حبيبتي باحلى ...........،،ههههههت

[شمس الملوك]

بارك الله فيك

[اسيل الباتول]

اممممممم تشهي اختي الهام يعطيك الصحة نتي وماماك وربي يطوللها في عمرها
حابة نسقسيك برك لون هذاك الجاج بعدما طفي عليه الكوكوت تعاودي تحمريه وحدوا في الفور ولا المقلة ولا هذاك لونو بعدما تقليه مليح في الكوكوت قبل مانزيدلوا البصل والتوابل؟؟؟؟؟؟

[انتي بلون الورد]

امممممممممممممممممممم باينة تهبل انا تان نديرها بهاد الطريقة منديرش الجزر برك .يعطيك الصحة علي للوصفة والصور لي تشهي

[crono]

يعطيك الصحة ربي يطول في عمر ماماك ويحفظهالكم يا رب

[الرجاء الاماني المجد]

روعة يعطيك الصحة اختي الهام ان شاء الله نجربها

[اميريم19]

يعطيك الصحة تشهي جربت الكثير من وصفاتك وكلها كانت رائعة وان شاء الله نجرب هذي ايضا وربي يحفظ امك وامهاتنا اجمعين

[melissat]

طبق شهي امممم ربي يحفظك و يخليلك الوالدة الكريمة