كعكة باردة إقتصادية خفيفة وبنينة بزاف

أم محمد علي · 2015-09-10, 14:52

سلام عليكم ورحمة الله وبركاته
كيف أحوالكم إن شاء الله تكونوا بخير وعافية
هذه كيكة باردة جربتها وعجبتهم بزاف قلت نفيدكم بيها

بسم الله
3بيض +8ملاعق كبارسكر +
8ملاعق كبارزيت +8ملاعق كبارفرينة+ملعقة صغيرة فاني +نصف خمارة نوارة (تع الحلوى)
خلطي كل المكونات وأدهني الصينية بالزيت
فرغي الخليط وطيبيه على نار هادئة .
من جهة أخرى :طيبي السيروا كأس سكر +2كيسان ماء يطيبوا على نار هادئة وعطريه بقليل من القهوة السائلة +ملعقة كبيرة عسيلة .
خرجي الكعكة وخليها تبرد والسيروا يكون دافئ شربيها مليح وهذه لها أهمية كبيرة باه متكونش يابسة في فمك.
في نصف لتر حليب +2ملاعق كبار ميزينة +علبة فلن شكولاطة (مثلا) خلطي المكونات وصفيهم بواسطة صفاية وضعيهم فوق النار وخلطي حتى تعقد خليها تبرد شوية (أنا شخصيا الكسرونة أضعها في بسينة ماء بارد مباشرة حتى تبرد بسرعة ونبقى نخلط لأنوا يجمد )فرغي خليطك فوق الكعكة وزينيه كيما تحبي (فرميسال بنية أو شكولاطة مربية )

خليها تبرد في الثلاجة وتقدم باردة

حقيقة واش نقولكم كعكة باردة تحبط على الخاطر وخفيفة وبنينة بزاف +أنها إقتصادية يعني غالب المكونات في الدار
وأعتذر عن الشرح المفصل وهذا دائما مراعاة للمبتدئات

ونتمنى تجربوها. عندي الصور وإن شاء الله ربي يوفقني باه نطلعهم
نسيت باه نقولكم :اليوم جربتها بمكونات أقل إذا خرجت بنينة نكتب تجربتي
نعم جربتها بمقادير أقل وجات خفيفة وبنينة وذوقها رائع
المكونات حبة بيض +8ملاعق كبار ماء دافئ +8ملاعق كبارسكر +
8ملاعق كبارزيت +8ملاعق كبارفرينة+ملعقة صغيرة فاني +نصف خمارة نوارة (تع الحلوى)راني نقصت البيض وأضفت الماء دافئ )

بصحتكم
ها هي الصورة إلي طلبتها
والمول إلي استعملت

tong2 · 2015-09-10, 17:25

الله يعطيك الصحة
شكرا على الشرح حبيبة

*سيرين نور عيني * · 2015-09-10, 20:05

شكرا حبيبتي ياريت تحطي الصور و خاصة الصينية

إكليل · 2015-09-10, 20:08

السلام عليكم و رحمة الله تعالى و بركاته.

أممممممممممممممم هايلة تسلمي على الوصفة اختي.

ام احمد اسامة · 2015-09-10, 21:24

جزاك الله كل خير

ام سراج وملاك · 2015-09-10, 22:19

مشكوووورة اختي على الوصفة

أم محمد علي · 2015-09-11, 00:07

وأنتم جزاكم الله خيرا
وبارك الله فيكم

raboha · 2015-09-11, 00:14

أنا من عندي متحطيش الصور راكي إممممممممم كتلتيني غير بالوصفة
بارك الله فيك و يعطيك الصحة و بالصحة على قلوبكم
بإذن الله نجربها و كيما قلتي مكوناتها كاينين