شخشوخة السيار على اصولها و بالخطوات المصورة

[nada 94]

السلام عليكم و رحمة الله تعالى وبركاته

كيفكم الاخوات

بما انو بدا موسم الشخشوخة في دارنا ( حكمتنا ماما قبل ما نهربولها للجامعة ) نتعاونو في 4 ايام ولا 5 نديرو شكارة تاع 25 كلغ

قلت ما خساراش فيكم نصورلكم الطريقة وان شاء الله تستفادو

هي شخشوخة السيار و خاصة بناس الشرق وبالخصوص ناس ميلة نديروها للدار وفي المناسبات

للعجينة نحتاجو سميد + ملح + ماء





نعجنوها مليح

هنا ماما عجنتها فالليل و خلاتها لغدوا باش كي تنوض صباح تلقاها واجدة


ما يبقالها غير تقرصها


وتطرحها

ملاحظة هنا الشخشوخة لازم تكون رقيقة و الماشينة ما تصلحش فيها جربناها و ماجاتش مليحة جات خشينة ومش مريشة الوغ ماما تطرحها رقيقة خلاص وتحطها فوق درا نظيف وتغطيها باش ما تشيحش (ما تنشفش )

نجو للطياب

هذا هو الطاجين لي نطيبوه فوقها شوفوه كيفاش

نحاولو نحطوها قدقد مش مطبقة

وشوفو كيفااش تتنفخ وهادا هو سرها باش تجي خفيفة ومريشة


كي تطيب ومالازمش تحمار نحطوها فوق هذا السيار

نخرجو منها الهوا وحداري يكون سخون

نفتتوها بيدينا شوية

ونجوزوا فالسيار


وهاي ليكم كيفاه تخرج



من بعد نحطوها تنشف نوزعوها هكدا في مكان مهوي وتضرب فيه الشمس
ونخبوها



وكي نسحقوها نجبدوها ونطيبوها حنا مازال ما درناهاش كي نديروها ان شاء الله نحطلكم موضوع
هي ساهلة كيما نديرو البربوشة ما نجمروهاش حنا نسقيوها نورمال
تعبت بزاف في تنسيق هذا الموضوع

فكلمة شكر ودعوة خير ليا ولعائلتي تكفي