اروع و اسهل مقروط مضمون و ناجح 100 في 100

oum ibrahim · 2013-08-02, 16:47

السلام عليكم اخواتي
اليوم جبتلكم وصفة مقروط بطريقة جديدة غير عن الطريقة التقليدية و مضمونة و ناجحة يعني حتى المبتدئات الي يخدموه لاول مرة ينجحلهم
نبدا على بركة الله
المقادير
الكيلة المستعملة انت و حسب الكمية الي تحبيها اذا صغرتي الكيلة تحصلي على كمية صغيرة اما اذا حبيتي كمية كبيرة كبري الكيلة نتاعك
كيلة سمن ذايب بارد
كيلة زيت
كيلة ماء معطربماء الزهر
2كيلات فرينة
قرصة ملح
جلجلان غير محمص
سميد متوسط حسب الحاجة( لكن انا كيلتو تقريبا 4 كيلات )
الحشو
غرس منقي و مرحي
قرفة
قرنفل
جلجلان محمص
ملعقة زبدة
ماء الزهر

التحضير
نخلط السوائل مع بعض السمن و الزيت و ماء الزهر مع قرصة الملح و نضيف 2 كيلات فرينة و نخلط و الجلجلان

نبدا نضيف السميد بالشوية انا نضيف بالكيلة حتى نوصل الكيلة 4 نضيفها غير بالشوية حتى يحكم روحو ما يكون طري بزاف ما يكون ناشف بزاف لانو راح يمتص السميد ليدام و انت على حساب نوع السميد نتاعك انا استعملت سيم

نغطيه و نخليه يرتاح ليلة او تقدري تديريه الصباح و في الليل تخدميه
في الصباح كي تجي تخدميه ادا لقيتيه امتص ليدام نتاعو وولى ناشف رشيه بشوي مازهر و حركيه ماتعجنيش
ناتي الان للحشو
الغرس نتاعك نقيه و جوزيه في الرحاية نتاع اللحم التقليدية باه يتعجن مليح و يطرا و يتنحاو الخيوط الي فيه
زيديلو مغرفة صغيرة قرفة ونص قرنفل و جلجلان محمص ديري كمية مليحة تعطيلو بنة هايلة و زيدي معاهم الزبدة و اعجنيه و رشي شوية ماء الزهر باه يطرى

خذي كمية من العجين شكليها على شكل حربوش عريض اعملي حفرة في وسطو و حطي فيه حربوش التمر و اغلقي

رققي الحربوش نتاعك و اعدليه مليح و اطبعي بالطابع نتاع المقروط و اعدلي الجوانب نتاعو ثم قطعي حبات المقروط

حطيهم في صينية الفرن متلاسقين باه الغرس ما ييبسش وطيبيه

ياخذ تحميرة خفيفة من تحت و من فوق يولي لونو وردي خرجيه و خليه يبرد تماما و نحيه من البلاتو لانو كان تنحيه و هو سخون راح يتفتت
و النتيجة النهائية مقروط هشيش يذوب في الفم رووووعة

لما تكوني رايحة تقدميه عسليه و تقدري تحتفظي بيه في علبة و ديريه في المجمد و لما تحبي تقدميه خرجيه قبل بوقت و عسليه و بصحتك

نتمنى تجربوه و يعجبكم
دعوة صغيرة ليا معاكم في العشر الاواخر ربي يجعلنا من عتقاء النار يا رب و لكم بالمثل
في امان الله

لينا11 · 2013-08-02, 16:50

مممممممممممممم باين يذوب فالفم رغم اني نحب اكثر المقلي

ربي يحقق لك ماتتمناي ويغفر لك وليا وللجميع يارب

maskouta · 2013-08-02, 16:53

chahtini hani sra9t habba malla net9ahwa biha mb3ad , yaatik el sa7a okhti

omo mazen · 2013-08-02, 16:58

يعطيك الصحة انا نموت علي المقروظ المشكل معنديش الغرس باه انديرو اهنا في انيويورك اصعيب نلقاوه ميش مشكل ندي هدا الي اخدمتيه و انت زيدي ديري هههههههههه

طهراوي ياسين · 2013-08-02, 17:00

الله يعطيك الصحه

ساندي 28 · 2013-08-02, 17:01

يعطيك الصحه حبيبتى والله روعه وباين هشيش وعجبتنى طريقه خلط المكونات جديده شكرا ليك حنونه وربي يجعلها في ميزان حسناتك

أم ماجد · 2013-08-02, 17:01

يعطيك الصحة ام ابراهيم 44444444444444444
باين هشوش نعرف خدمتك حبيبتي

المستغفرة · 2013-08-02, 17:05

يعطيك الصحة يشبه لتاعي بصح انا نبيتوش
والا نقدر ندلو ديكور تاع مقروض الشهدة
وربي يجعلها في ميزان حسناتك
لوكان تعطيني طريقة قاطو الملفاية معرفتش الطريقة

الصوامعية · 2013-08-02, 17:13

واااااااااااو رائع عزيزتي ام ابراهيم
مقروط وعليه الكلام راهو يبان مذكر
بصح قوليلي من الصور يبان ماهوش معسل ولا راني غالطة

مرام 1987 · 2013-08-02, 17:14

Wawwwwwwwwww om barhom dkholt 3la jal nhatlak rad puisque nabak nmouuuuuuuut 3lik mn galbi wallah
Makroud ta3ak foooooor hakda nhabo ana kima takhadmo mama wallah tgoul ta3ha hada howa makroud 3la osolo ya3tik saha hanona w saha ftorak