شخشوخة بسكرية

[janna]

السلام عليكم

اليكي سيدتي طريقة تحضير الشخشوخة البسكرية.
المقادير:

دجاجة أو لحم خروف حسب الرغبة.
راس بصلة +سنات ثوم +زيت وسمن (مقدار كأس من الشاي).
3 أو 4 حبات طماطم تكون حمرة.
1 أو 2 ملاعق أكل طماطم مصبرة.
توابل +ملح و راس الحانوة(لفاح)+فلفل عكري مرحي أوحار.
1 أو2 فلفل أخضر حار.
بالنسبة للخضر:3 حبات بطاطةو مثلهم جريوات و لفت يكونو منضفين و مقطعين على 2 أو 4 اذا كانو الحبات كبار و حمص مشمخ.

التحضير:

أولا:ديري السميد في قصعت عود ضفيلو كمية من الملح بليه الماء حتى يولي عجينة غطيها و خليها ترتاح.
ثانيا:نضفي اللحم قطعيه حسب أفراد العائلة حطيه في قدر زيديلو السمن و الزيت و الملح قليه على نار قليلة أضيفي راس الحانوة(لفاح) و العكري و الطماطم المبشورة و المصبرة و الحمص المشمخ أمرقي بالماء و خلي كلش يغلي حتى يعود نص طياب منبعد لوحي الخضرة تكمل الطياب مع اللحم.
ثالثا:أعجني لعجينة الي رنختيها من قبل حتى تعود طرية يعني نتاع لفطير(لمسمن) كوريها كويرات صغيرة بالزيت لحيها ورقة بعد ورقة في طجين حديد ولا تنسي الرش بالزيت دائما حتى تخلاص لعجينة وفتيها طراف.
أخيرا:في 5 الدقائق الأخيرة لوحي الفلفل الحار في المرق يغلي شوية منبعد طفي النار على القدر. نحي اللحم من المرق وحمريح في الزيت.
تقديم الشخشوخة:حطي لفطير من الأحسن في قصعت عود سقيها بالمرق ساير داير زيني بالخضر و الحمص و الفلفل و اللحم من فوق يتجمعوا أفراد العائلة و كلوا بالصحة و الهناء.
ملاحظة: تقدري الطيبي لفطير يوم من قبل ولي يحب ليدام يزيد شوية سمن في القدر.

شهية طيبة نتمنى تعجبكم

[نينا الجزائرية]

بورك فيك
نحبها بزاف شخشوخة

[BACHIRA2]

بارك الله فيك اختي

[ام خديجة1]

بارك الله فيك اكلتها وكانت شهية جدا ولكن اللي اكلتها فيها الزبيب

[remadna]

الله يبارك
الشخشوخة البسكرية من اكلاتي المفضلة

["جُوهَرْ"]

أكلة رائعة ،بارك اللّه فيك
وشرح وافي كانني ارى الاكلة امامي
بانتظار وصفات أخرى ومزيد من التالق
جزاك اللّه خيرا اختيjana

[*شهد العسل*]

[mimicha1988]

بارك الله فيك والله هذه احسن اكلة عندنا في بسكرة والكل نحبوها وماكانش مناسبة بلا بيها

[samasima]

وين تغيب علينا الشخشوخة مستحيل والحار هههههههههههههه

[yasser17]

يطيك الصحة سخفتيني انا نعرف ندير شخشوخت الشرق الجزائر نجربها ان شاء الله

[janna]

شكرا على الردود و كاش ما تسحقو دزولي

[souna02]

انا نجربها ونردلك الخبر و اذا عجبتني نبعتلك حقك

[allmaza]

حنا في الشرق نسميوها المفرمسة

[janna]

شكرا أختي على الرد . . في منطقة سطيف يسموها المفرمسة . . . لكن كاين فرق بيناتهم

[hayette82]

44444444444444444444444444