دورة صيفية جديدة

[أمّ عبد الله]

شكرا جزيلا على الترحيب
راني وليت متابعة وفية لهاذ المضوع ....أختي " ابني نور عيني" عجبتيني بزاف كي قلتي نفوت نهتم بالجانب الجمالي ههههه

[crono]

السلام عليكم وصبحكم الله بكل خير
اللهم بك اصبحنا وبك امسيناوبك نحيا وبك نموت واليك النشور

**أكثري من الإستغفار و أنت تعملين


عند قيامك بتنظيف غرفة ما :


*احملي معك كل ادوات التنظيف اللازمة لك في سله لها مقبض لسهولة حملها ( فيها فوطة لمسح الاتربة ,فوطة أخرى لمسح المرايا , فرشاة نظيفة لتنظيف الاتربة من الطاولات المغبرة و الشبابيك قبل غسلها، قفازات، منظف الزجاج، منظف الخشب )

*قومي بجمع أي قمامة مبعثرة إن وجدت وضعيها في سلة القمامة او في كيس صغير
ثم ضعي كل شئ ليس له علاقة بالغرفة ملابس , لعب , متعلقات .. الخ, إجمعيها كلها في سلة إحمليها معك عند دخول غرفة تعمها الفوضى ( جمعي الاشياء المتشابهة التي ستذهب في نفس المكان مع بعضها اولا في مجموعات ثم ابدئي في اخراجها مجموعة مجموعة سيوفر عليك هذا الكثير من الوقت والمجهود حتى لا تبقي رايحة جاية لأخذ كل شيء إلى مكانه فتتعبي و تضيعي الوقت )

[ام هزار]

ما شاء الله الدورة منورة بالاحبة اهلا بيكم جميعا
راني نكتب في الردود من البارح و من بعد الميكرو يطفى حتى كرهت من الكتبة
الاخت ابني نور عيني راني جاوبتك البارح و لكن الاخت ام شمسو راهي وفات و كفات فقط عندي تحفظ على اللعب بالدقيق و الروز
اختي كرونو شكرا على متابعة الدورة بارك الله فيك

[ام هزار]

انا البارح جاوني عمال الترصيص و خدمو قداه من حاجة نضت بكري قبل ما يجيو رتبت المنزل و ديت بنتي تقرى و رجعت حضرت الغدا درت بربوشة بالجاج و سلطة و هوما جاو في 10 صباحا من هديك و انا مخزونة في الغرفة غير خرجت من اجل احضار بنتي و تقديم الغدا و من بعد رجعت للغرفة حتى روحو في العشية خلاااااااااااااص لميت الحالة راكم تعرفو و سيقت و طحت سبتة
اليوم رتبت المنزل و سيقت الحوش و سقيت بياتاتي و نظفت المرحاض اكرمكم الله تنظيف عميييييييييييييق و حضرت الغدا بيري و سلطة و غسلت شوية قش بيدي و خلاص راني تعبانة شوية

[ام هزار]

عفوا شكرا اختي ابني نور عيني على الماسك رايحة نجربو بادن الله انا بشرتي مختلطة ما نعرف الا يصلحلها

[رندة.]

مساء الخير عليكم
شكرا كرونو على الدورة الصيفية هاذي، ربي يجازيك خير على الدورة وعلى كل التدابير إلي تقدمّي فيها بكل سرور ونشاط.
الشكر موصول لكل الفراشات كل وحدة بإسمها على التواصل والتجاوب والنشاط والأفكار إلي يساهمو بيها في إثراء هاذي الدورة وفي مساعدة ربّات البيوت حسب تجاربهن وخبراتهن في شؤون البيت عموما.
ربي يوفقكم ويحفظكم ويبارك في أوقاتكم ان شاء الله.

[ام هزار]

اهلاااااااااااااااااا بالاخت العزيزة رندة هادي غيبة واش راكي واش احوالك ان شاء الله في اتم الصحة و العافية امين يا رب
ما تزيديش تغيبي علينا

[جهينة اليقين]

اهلا فراشات توحشتكم اسمحو لي ما رانيش ندخل ما عنديش الوقت لعراس والضغط تاع الخياطة وكذلك الضياف تاع الصيف ومطولين شوي ما يبقى لا نظام ولا هم يحزنون المهم نستمتعو معاهم وخلاص ومرة على مرة راني نطل

[رندة.]

أصبحنا وأصبح الملك لله و لا اله الا الله وحده لا شريك له، له الملك وله الحمد وهو على كل شيء قدير.

صباح الخير عليكم
أهلا أم هزار، أنا الحمد لله بخير، وبارك الله فيك على الترحيب

[ام هزار]

اهلا رندة نهارك معطر بدكر النبي عليه افضل الصلاة و التسلييم
جهينة ربي يعاونك و يكون معالك و البقية واش هو عدركم هيا نتفاعلو و نمشيو شوية الحالة راهي بردت في عز الصيف

[arwa alaa]

اهلا فراشات واش راكم تحية لكل واحدة باسمها
انا راني مع البروتينات اليومية لاني عند عجوزتي أن شاء الله نروح وتبدى معاكم الشغل

[ام شمسو محمد]

السلام عليكم
راكم منورات فراشاتنا المتالقات جهينة و ارروى و رندا و النشيطة ام هزار راني من ضرك متحيرة كي ترجعي للخدمة و تولي ماتقدريش تطلي بزاف..... والفناك ...و حضورك منشط الدورة و محفز لينا
رندا لك موفور الشكر على البوست التذكيري بصلاة الفجر و كل كلمة مذكورة فيه حق نسال الله ان يجعلنا من اهل الفجر الذين هم اهل الله و خاصته
جهينة ...هذاك تحديدا هو الصيف كي ماتكون حتى حاجة في بلاصتها لا الاوقات و لا الاماكن و لا الاشخاص ...مانقدروش نخلقو نظام معين و روتين ثابت الظروف هي اللي تتحكم فينا و الحالة الطارئة هي المسيطرة و هنا يمكن جمالو ...راني متصورة كون جات الايام كلها كيفكيف مملة ههههه..
اروى بصحتك العطلة عند عجوزتك و ياسر عليك الروتينات ريحي شوية اكيد مش راح تكوني مرتاحة كيما في دارك و لكن اذا كنتي مقيدة غير في الشغل معليهش هذي فرصة نادرة للتخلص من الاعمال المنزلية ههههه لانو بصراحة كي نزوروا عند امهاتنا مانقعدوش نجبدو الخدمة منين تكون ...بينما الحماة ماتحبش ...تفضل خصوصيتها مش كيما الام ....مالا نقولهالك ريحي معليهش مش مشكل ...

[فن و أناقة]

أضيف لك البدء بعد الصلاة والأذكار بقراءة الورد القرآني لأنه يضفي بركة عجيبة على الوقت.. عن تجربة

أنصح أيضا بتداخل المهام لاستغلال أفصل للوقت، مثلا أثناء أعمال المنزل استمعي لمحاضرات ودروس نافعة، وأثناء إرضاع صغيرك اقرإي صفحات من كتاب .. وكذلك أثناء التنقل في السيارة أو الحافلة وفي قاعات الانتظار وغير ذلك..
تداخل المهام يساعدك على استغلال وقتك بشكل جيد

[ام شمسو محمد]

المشاركة الأصلية كتبت بواسطة ام هزار

الاخت ابني نور عيني راني جاوبتك البارح و لكن الاخت ام شمسو راهي وفات و كفات فقط عندي تحفظ على اللعب بالدقيق و الروز

ام هزار تحفظك في محلو تماما و انا كان في نفسي حرج من صورة الطفلة الجالسة في الدقيق

و لكن فكرة اللعب بالدقيق او الروز منطلقة من مبدا عشق الاطفال للعب بالتراب و الرمل انا ولادي كي كانوا صغار يقعدوا بالساعات ما يملوش منهم و لكني كنت تلقى صعوبة في ادخال الحوايج لافواههم بما في ذلك الطعام ههههه....بينما كاينين اطفال يستكشفوا كلشي بافواههم و ماتقدريش تحطيهم في التراب وحدهم ياكلوه ...لذلك دارو هذي الفكرة تاع استبدال الرمل بالروز لانهم معليهش ياكلوهم...حنا نقدروا نطبقوا طبعا بالشرط لي يتوافق مع ثقافتنا كي تحطي النعمة في علبة كبيرة يلعبوا بلا ما يعفسو و تخزنيها يلعبو بيها مرات عديدة و كي تتلف حطيها للطيور مثلا ....

لطالما لعبنا في صغرنا بالعجين اذا تذكري هذا هو الطفل....الان يديرلولهم ملونات و يمدولهم يلعبوا بيهم باش تزيد متعتهم و في نفس الوقت المكونات امنة و قابلة للاكل..


الفكرة تنبع من العاب المونتيصوري و الصانصوري الرائجة جدا في المفهوم البداغوجي المعاصر لانهم في هذي المرحلة يحاولو يقدموا العاب تعليمية لاطفالهم باش يدركو بيها بُعدَيْ الزمان و المكان منذ الصغر و يستغلوا كل دقيقة من عمر الانسان في التعلم بالطريقة المناسبة للسن لانتاج نوعية افضل من البشر

[ام شمسو محمد]

اضافتك قيمة و في محلها اختي فن و اناقة...مرحبا بك