تروسو الحنة لعرايسنا

fifiarch · 2013-01-16, 14:51

مساء الخير لبنات
نتمنى تكونو كامل بخير
هذا الموضوع حبيت ننزلو لاميرتي وكل العرايس الحلوات
حبيت نعاونكم في بعض الافكار لي نتمنى تفيدكم في تروسو الحنة
للاسف انا ماعنديش لا المواد الاولية ولا سبب في الوقت الحالي باه نخدم التروسو
لذا اذا حبيتو ورشة انا نساعدكم ونكون معكن فيها لكن مانقدرش نحطلكم عملي لانو كيما قلتلكم السبب من قبل
المهم كما هو معروف انو التروسو يتكون من عدة قطع
الصراحة احنا في جهتنا ماعندناش الكاسات في التروسو لكن زيادة الخير خيرين
نزيدو الكاسات للتروسو

المهم نبداو بعناصر التروسو وهذه الافكار والصور
اعتبرها تكملة لما قدمته سندوسة في الموضوع من افكار لتزيين الصينيات والكاسات وتانا ما قدمته اختي كيا من افكار لتزيين الشموع
مالا انا جبتلكم البقية لي مازال ماتطرقولهاش البنات

نبداو اولا بالصينيات
انا ننصح جميع العرايس باستعمال القماش يكون لامع ودبلة ودونتال يكونو لامعين بويسك مناسبة كيما هاذي لازم يكون كلش براق
العروس ولوازمها
ننصحكن بالساتان كقاعدة وقماش الاراجونزا او عش النحل اللامع فوقو دونتال ودبلة لامعين
طبعا الصينية قاعدتها تزين بهاذ الاقمشة والدونتال ندوروها بيه والدبلة نعملو ازهار وبابيونات نزينو بيها انصح هنا بلونين الابيض طبعا ولون اخر يكون متناغم مع لباس العروس
الابيض يرمز للفرح واللون الاخر يكون لكسر الابيض و اضفاء لمسة تجعل التروسو يتماشى مع لباس العروس تسمى كانو كلش طقم مع بعض
ممكن فكرة اخرى انك تزيني الصينية ببعض الورود المعمولة من الكروشي بخيط لامي اللامع والله تجي روعة وكلها من تحت يديك
وهنا بعض الصينيات واكيد الكثير من الافكار حطتهم سندوسة ارجعولهم

الان ننتقل للكؤوس هو احنا في جهتنا ماعندنا مانديرو بيهم الكؤوس مانعرف اذا في منطقتكم تحتاجوهم
المهم الكؤوس لازم تكون متماشية مع زينة الصينية نستعملو فيها الدونتال ورود وبابيونات دبلة او حتى ورود من الكروشي وممكن تانا نحطو بعض الاحجار للتزين

بعد الكؤوس تجي المخدة لي تحط فوقها العروس يديها هاذي تبانلي تخدمها من قماش الساتان وتزين اطرافها بالدبلة واحدة عريضة لماعة فضية واخرى رقيقة فوقها من نفس اللون الثانوي لي قلنا عليه قبل
صراحة انا عجبني هذا التزيين ولكن الحكم
تجي سامبل وزاد حلوة

بعدين ننتقل لاناء الحنة والشموع
هو الاناء لي يخلطو فيه حنة العروسة لازم يكون مزين هو تان
تبانلي تستعملي صحن صغير نتاع زجاج وتدوريه بالدونتال وكالعادة تزيني بورود دبلة او كروشي
اما الشموع نتاع كيا لي جابتهم طريقة تزيينهم هايلة شوفي منها

ماننساوش طبعا القفازات لي يتحطو في يد العروس بعد لا يحنيولها
كاين القفازات الكاملين تقدري تزيني جانبهم من الاسفل بورود كيما قلنا من قبل
او تعملي دائرة ساتان وتحشيها بلاواط مبعد تزينيها من فوق بالورود وتركبي فيها من اسفل خيط دبلة باه تربطيها في يدك

كاين تان فراش الحنة يفرشوه للعروس في حجرها باه ماتتوسخس لبستها بالحنة تعرفو في العرس ناس كامل داخلة في بعضها والفوضى ممكن تطيحلك حاجة من الحنة على لبستك وتخسرها
لازمك فراش الحنة والتزيين يكون يتماشى مع الحوايج السابقين خاصة المخدة والقفازات

تان سلة الحنة لي راح تحطي فيها كل الحوايج السابقة تزين بنفس المواد لي حكينا عليهم من قبل وهاذم بعض الامثلة

نتمنى نكون افدتكن ولو بالقليل لبنات
ويكون شرحي اعطاكم بعض الافكار
فقط هذه صور ماخوذة من الانترنت لكن فيها عدة افكار
وشطارتكم هنا انكم تهزو الافكار وتخدمو كلش بنفس المواد
حتى يكون التناسق والعمل الجميل
بالتوفيق للجميع
والف مبروك لكل عرايسنا وربي يهنيكم كاملين يا رب

loudjeine2000 · 2013-01-16, 15:02

مشاء الله عليك يا اختي فيفي

biba.souma · 2013-01-16, 15:06

chabiin ya3tik sa7a

fifiarch · 2013-01-16, 15:14

مشكورين اخواتي على المرور الطيب

amira19 · 2013-01-16, 15:22

يا عمري درتي الورشة و انا لا خبر ربي يجازيك كل خير و كل الاخوات لي قدموا افكار رائعة

انا عن نفسي غدا لا كنا من الحيين نشري اللوازم و نبدا في العمل لاني متحمسة جدا

و ارجو ان تكبروا بالكم معايا لاني نسقسي بزاف ماعليش ساعفوني برك

amira19 · 2013-01-16, 15:23

بسم الله اني بديت الاسئلة نتوم في عوايدكم هاد السلة و مستلزماتها يجيبوها الحناية من اهل العريس او توجدهم العروس ؟؟؟؟؟؟

امان امين · 2013-01-16, 15:24

الله يبارك عليك يا اختي

fifiarch · 2013-01-16, 15:32

اهلين اميرتي
انت اشري الللوازم وانا معاك
كيما قلتلك انا ماعندي لواه نعملها
ههههه
نورمالمو احنا في عوايدنا اهل العريس هوما لي يجيبوها للعروس

amira19 · 2013-01-16, 15:37

justement راني خايفة نعملهم و من بعد يجيبولي وحد اخرين هههههههههههههههههههه

شوفي انا نعمل غير الصينيه تاع لي يشربو منها العريس و العروس كيما يشربها و هي تشربو هههههههههههههههه

ننعمل الصينية و الكاسات و الشموع و لي نغطي بيها يدي كي يحنيولي و الطباسا تاع لاتارت و خلاص

و هوما راهم يجيبو السلة لي فيها حوايج حنتهم ربي يسهل فيهم ههههههههههههههه

amira19 · 2013-01-16, 15:40

فيفي شوري عليا وش نشري و الميتراج راني ما نعرفش شوي

نحوس نشري االاورغونزا و نحوس نديرها في الروج لانو رايحة ندير لاغوب دو فيانساي في الروج كيما قلتي انت روج و بلون

قداه نشري ميترة تكفيني ؟؟؟؟؟؟؟ و الدبله عندي رولو احمر عريض

وش نحتاج تاني؟؟؟؟؟؟؟؟

mihra · 2013-01-16, 16:00

اني جيت اميرة
واوووووووووووو
جو هايل

amira19 · 2013-01-16, 16:35

اهلا بميهرا اهلا

مرحبا بيك تفضلي لاتاي و القشقشة و شمري على درعيك باه نبدااو بسم الله

حمدا لله كثير · 2013-01-16, 16:39

الله يبارك

fifiarch · 2013-01-16, 18:02

اااا اميرتي المهبولة
انت تغلطي فيا
انا حسبتك قلتي صينية الحنة

ماشي صينية الفيونساي

الفيونساي وين يدخل راجلك يلبسك الخاتم وتقصو لاطارت مع بعض تشربيه ويشربك يا ستوتة
هاذي لازم العروس لي تخدمها

انا حسبتك قصدت حنة العرس
وهاذيك اهل العريس هوما لي يجيبو اللوازم

هاذي يالالة انت لي تخدميها

fifiarch · 2013-01-16, 18:09

شمري على يديك وبداي

اولا اهل شيء اشري صينية وثلاث صحون زجاج وكؤوس طوال كيما نتاع لي يشربو فيهم في الافلام
ههههه

زوج سكاكين وزوج فراشط

اما الشموع اشري وحايد نتاع العرايس تلقايهم مزينين شوي واحنا نزيدوهم

هاذو الحوايج لازم هوما الاوائل

باه نشوفو شكلهم ومبعد نعرفو احسن شيء يصلح لتزيينهم