ارشدوني ...واش نديييير

[مشكلتي]

سلام عليكم عانوني خاوتي ....انا 25 متزوجة وساكنة مع عزوجتي واخوة زوجي شباب و والده ...راجليي قبل ما نتزوجو طلب مني نسكنو مع دارهم لانه حاب اني نساعد امه في اعمال البيت راهي تتعب ومنها ندو دعوة الخير و يفرح والديه....قبلت لان راجلي طيب جدا...مهم سكنت معاهم ولت نقوم بكل ي اعمال بيت ...فاتت الايام مرة جاو بناتها ناضت بكري نئفت معملت كل اعمال البيت وكي هبطت كعادتي باش ندير شغل الدار لقيتها دارت كلش وكي جا بناتها نسمع فيها تقلهم عييت من شغل وظهري و و تشنفو عليا بناتها في بالهم راني كل يوم مخليتها تخدم وهي والله ماكاينة منها ...فوتها معليش نهار اخر كي خرجت انا من كوزينة وطلعت لغرفتي جاء راجلي راحت وقفت في كوزينة ودارت روحها تخدم قالت لراجلي ظهري وعني من وقفة جاء قالي ربي يحفظك عودي عاوني امي راهي من قبيل اقفة ف كوزينة ...فوتها معليش مرة زوج ثلاثة ربعة كرههههت ...يعني انا نتعب وكل شي وهي تكدب عليا ربي يهدي وخلاص
تشوف راجلي يضحك معايا تتشنف ...تشوفه هدر معايا تتشنف عليا وعليه باليومين حتئ عاد يقولي ما تضحكيش معايا حداها ...حسيت روحي م متزوجة والله ...راجلي خدام من صباح للعشية كي يجي عية نحب نقعد شوية معاه نحكي تبدا هي تعيطلو من لتحت ارواح وصلني لدار فلان ارواح اشري الخبز للعشاء ارواح فليكسيلي مهم ما يقعدش معايا طوول مع انه عندها اربع شباب عزاب وكبار ما تبعثهم ما تنوضهم تعيط لراجلي من شمبرته باش يدير هاد الامور...معليش راني نفوت ونسكت وراجلي راه يشوف فيها ويقولي اصبري عليها تغير عليا ... بصح توصل انه تتشنف عليا باللاربع ايام علجال شافت راجلي يضحك معايا وقالي حداها واش تسحقي نجيب...ياودي تغميت يا ناس انا موالفة في دارنا الضحك والفرحة ومرت خويا كيما ختي ما نتحاسبو ما نتشنفو ما نزعفو من بعض والله غير في دار بابا غير البهجة والفرحةجيت نلقا غير التشناف والزعاف بلا سبب والمشكل راني انا وياها نهار كامل مع بعض انا ساكتة وهي ساكتة وكي يجي راجلي تعيطلو ما نشوفوش غير في اليل يا ناس ...راني عروسة عندي 6 اشهر متوحشة راجلي وهو معايا لا نضحكو لا نهدرو لا نقصرو ولا لازم النهار كامل نفوتوه معاهم نتغداو وننتعشاو وكل شئ معاهم والا تزعف ! عييت

[سجل أنا جزائري]

يظهرلي ان هذي الأم عندها مشكل معك لذلك لا تحبك لسبب ما و لا اعتقد انها غيرة بمأن زوجك ليس وحدها و خاصة كما قلتي انك الوحيدة الي تعاونيها في شغل ...

في رأيي حاول تعرفي سبب عدم حبها لك حتى تلقاي الحل اذا كان ليس هناك سبب غيري اسلوب تعاملك معها بحث تحسسها انها في مقام أمك و لا تعاملها كأنها ند لك ايضا حاولي مرة على مرة تهدي لها هدية "تهادو تحابو" حتى تكسبي قلبها ثاني شيء تناقشي مع زوجك لهذا المشكل لكي يقترح عليك حلول فهو أدرى بأهله منك لكن بدون بطريقة لينة و ليس كما يفعل بعض زوجات لا يتددن في اهانة اهل زوج حتى يمل الرجل
و ديري في حسابك ثاني أن هذي فترة هي مؤقتة يأتي وقت يتزوج اخوتها الأصغر و بالتي تستطعون تسكنو وحدكم

[أم عبد الكريم]

باينة بلي هذا عامك الاول نتاع الزواج....نصيحة اخدمي لوجه ربي الشيء لي قدرتي عليه و لا تنتظري جزاءا او شكورا ....

[نجاة^^]

السلام عليكم
اختي ساعفيها واصبري عليها ،واش حابتها تفرح من قلبها ،هي راهي حاسة وليدها اللي تعبت عليه ووووو كيما يقولو هوما راح من يدها ،وخاصة كي تشوفو فرحان معاك نقدرو نقولو غيرة ...المهم الحل كيما قالك زوجك متضحكوش حذاها وكي تروحي لاهلك اضحكي وافرحي هههه،وشغل الدار ربي يعينك فيه ،اصبري وربي يفرج عليكم.

[عثمان الجزائري.]

ما دام تشنافها على حاجة باينة و عارفينها أنت و زوجك فلا تكبري الأمر في رأسك، المهم لا يوجد مشكل كبير و الأهم أن زوجك يعلم ان أمه هي المخطئة يعني إذا كان هو في صفك و قالك أصبري عليها ما عندك حتى حل أصبري على وجهوا و خلاص

[هـــدوء]

بفرض الرواية صحيحة أنت هي الطيبة مش هو
كيفاه تفرحي والديه على حسابك ؟!
جامي تخدمي وحدك و إذا حابة تخدمي روحي لدار باباك اخدمي هوما أولى بيك أما دار حماتك يجيو بناتها يخدموها هوما مسؤولين عليها.
ضك وش قالوا وش تقول هي و ش يقولوا مايهمش كلام تاع نساء.
المهم نتي ديري واجبك كفرد من الأسرة مش كخادمة للأسرة.
الواجب نديروه مش بش يشكرونا عليها. الواجب نديروه خاطر لازم علينا نديروه.
أصلا زوجك صارحك من البداية بلي جابك تعاوني يماه ونتي بكل سذاجة قبلتي...
يعني وش راكي متوقعة و هوما جابوك بموافقتك أنك تخدمي !

[الواثق]

راكي موسوسة وعايشة في المنامات فقط........اذا كنت تشوفي في زوجك في الليل فقط......فماذا لي زوجها يخدم بالاسابيع والاشهر وهو مغترب عن اهله......ان كانت امه تحتاجه لقضاء حوائجها وتنكرين هذا فاين كنت عندما كانت تسهر عليه السنوات الطوال من اكله ومن مايخرج منه ؟.....هذه امه ....وان كان زوجك يعلم بمجهودك فمايضيرك تصرف امه بانكار عملك..................اي زمن هذا تذكر البنت ماكانت عليه في بيتها وتقارنه بحال بيت زوجها..............ابحثي عن الحلول ........كوني سببا في تزويج اخوته.........حتى ينقص التركيز عليك.............الله المستعان

[بناتي نور العين]

حاولي تتقربي منها كأن تشتري لها هدابا و قابلي السيئة بالحسنة و ربي يطيب بيناتكم

[nilly]

لمادا تخلقون المشاكل من راسكم ثم تشتكون واش فيها ادا تعيط لوليدها يشريلها نورمال واش فيها ادا قالت هكداك لبناتها علاه تزعفي لاشياء تافهة

لو كان امك ماتزعفيش علاه راكم متكرهبين على عجايزكم مساكن وانا متاكدة بلي هي تشكي كيما راكي تشكي انتي المشكل كله في سوء تفاهم حتى واحد مايفهم الاخر حاولي تفهميها علاه تدير هكدا وغادي تلقاي سبب تافه حاجة طبيعي ان عجوزتك تغير منك بالاول وهدا كل عجوزة تحس بيه بصح عندهم حق ماتنسيش هدا وليدها كان ليها يدللها هي ومبعد يجيب اخرى ويصير وقته يمدله لمراته طبيعي انها تغير بصح انتي ملزمش تزعفي منها لانكي كي تكبري ويجب ولدك عروسة غادي تدير هكدا لازم تتقربي منها وتولي صديقتك وزوجك تخليه يمد وقته حتى لماماه ماشي برك ليك انتي
وانتيا علاش كل يوم جالسة فدار هادي شوكتني
واد مراكيش مرتاحة علاه تسكني معها هادا درها هي خلي زوجك يشتري لك بيت وتعيشين فيه كل الحلول في يدك لا يوجد صعب في الحياة اد راكي تعيسة فانتي لحبيتي تكوني تعيسة ها اختيراكي انتي فلا تلومين زوجك او امه

[نجوم الأمنيات*]

ربي يصبرك اختي
المهم انتي امشي بالمليحة وخلي الباقي على المولى عز وجل ولن يخيبك ربي يفرحك

[نبض قلبي]

اختي بدلي معاها الطريقة
مثلا ماتبينيش اي حاجة قذدامها ماتكثريش هدرة مع الزوج تاعك قدامها حتى توالف
ماعندك ماديري راها ام راجلك في مقام امك
و بالنسبة للمعاونة عاونيها تدي اجر قبل كل شي
ربي يكون معاك

[أمة الرحمان رقيّة]

سلام

اختي مادام زوجك قالك ما نضحكوش امامامي معناها راو عمبالو ان امه مخطئة

وهو راو في وضع محرج اذا انه مايقدرش يوقف معاك ضد امه حتى لو كانت ظالم
واش نقولك؟
انساي المشاكل هذو وحاولي تتجاهلي واكثري من الاستغفار وادعي ربي يرزقك بسكن وحدك
المهم ما تخليش الشيطان يوسوسلك حتى تدخلي في المشاكل ويطيح القدر

ديما ديري روحك ماشفتي ماسمعتي

علبالي بلي نفسك مجروحة

لكن هذه هي السكنة مع العجوزة

ديما شوفي النساء لي راهم يعانيو صح مع العجوزة ووصل بيها الامر انها تحاوز كنتها من الدار ولا تقول لابنها يا انا يا زوجتك

اذا كانت عجوزتك ماتحبكش تعاملي معاها بما يرضي الله واحتسبي الاجر

ربي يهنيكم

[محمد جديدي التبسي]

لا يعتبر الأمر مشكلة مادام زوجك معاك وفاهمك اصبري وخلاص
اي رد فعل منك سيفاقم الأمر وستظهر مشاكل حقيقية أكبر ويدخل زوجك في مشكلة مع أمه
كبري عقلك ووسعي بالك فترة وتفوت كاين لي عايشين مشاكل اكبر وصابرين.

[زبدة ذايبة]

ماتوهميش نفسك وزوجك وأهل زوجك بأنك إمرأة خارقة.

على كل شيء تقدرين.

روحي غير بالشوية.

اخدمي الشي اللي تقدري عليه بالقدر اللازم والضروري.

ماتكلفيش نفسك فوق طاقتها

بالقدر الذي تستطيعين وفقط.

ماتتعامليش معاهم على خلفية

كلما شنفو عليك كلما خدمتي أكثر.

وماتبنيش علاقتك بزوجك على أساس شغل البيت.

أنت من النهار الأول جابك زوجك على هذ الأساس.

لازم تغيري من طريقة تفكيرك.

وتحاولي تقدمي الأفضل من غير شغل الدار.

حتى تكون علاقتك بزوجك مبنية على أساس متين.

شغل البيت جزء بسيط من الحياة الزوجية وليس هو الحياة الزوجية.

لازم تعرفي حقوقك وواجباتك.

ولازم تعرفي حدودك وحدود غيرك.

الموافقة والتوافق بين البشر بالمعروف.

لا إفراط ولاتفريط.

وبالنسبة لجزئية أن زوجك أمه تستدعيه لأجل طلباتها

فهذا عادي جدا

ماعندك علاه تكبري الموضوع.

إذا عرفتي كيفاش تعيشي معاه

تولي حتى تكرهي منو وتتمناي تعيطلو يديها باش تلقاي الوقت لنفسك.

وأخيرا

حاولي تتخلصي من دور البونيشة

وهذا لايعني أنك ماتخدميش الشغل ولكن تخدمي لأنك فرد في الأسرة عندك واجبات.

وماتخدميش مقابل أن يكون هنائك وراحة بالك واستقرارك في حياتك الزوجية مقابل غسيل المواعن و التسياق في الدار.

أتمنى لك التوفيق

[saydek xxo]

الزواج في الجزائر مش زواج ...يجيبو بنت الناس ومايخافوش ربي فيها ...ويقلك علاه المرأة تفضل العمل على الزواج ...ببساطة لانه الزواج انعدم من ادنى شروط الزواج ..دك الطفلة هاذي واش ذنبها عندها عجوزة كيما هك هي تزوجت الراجل ولا لعجوزة ...حسبنا الله ونعم الوكيل