رفضوه في الخطبة

[مشكلتي]

بسم الله الرحمن الرحيم ،
أضع المشكل بين أيديكم لعلي أجد بعض الإجابات و الأفكار، عندي صديق مقرب جدا، تقدم لخطبة فتاة مع أبوه و خاله و تكلموا معه حول نيتهم في خطبة البنت، المهم تم اللقاء و بعد شهر إتصل بهم قالهم مافيهاش مكتوب، المشكل أن صديقي متمسك بالفتاة و للعلم أنهم كانوا على إتصال، يعني من الأخير بالمعنى العامي الماتش مبيوع، أسباب الرفض ليست واضحة بالنسبة لصديقي و واضحة بالنسبة لي، فعقلية الأب الجزائري تتطلب أت يكون الزوج خدام بصفة دائمة و لديه منزل، الشيئ الذي يعتبر مستحيل في وقتنا و الذي يصعب تحقيقه حتى و لو كان مرتبك يفوق الخمس ملايين، المهم هذه القصة فات عليها بضعة شهور ، الآن كلمني و طلب مني مرافقته للتكلم مجددا مع والدها...و حقيقة لو كان الأمر متعلق بي لعرفت واش نقول أما و الأمر متعلق به فإحترت، لأني شخصيا لا أرجع للخطبة مرة ثانية لو رفضت المرة الأولى لكني راعيت شعوره و رغبته في زواج هذه الفتاة بعد أن أخبرني أن هذا الشعور متبادل بينهما...أعينوني بارك الله فيكم فهو بريد العفاف و يعلم جيدا أن الإتصال الذي بينهما محرم لهذا يريد أن يكون كل شيئ في الحلال... فكرت في الإستعانة بإمام مسجد ... أنيرونا بأفكاركم.

[زبدة ذايبة]

لكن ما رأي المعنية بالأمر؟؟؟؟؟

بما أنها تهدر معاه كان من المفروض تعطيه الأسباب التي رفض لأجلها.

هذا رايح يستفسر عن الأسباب أو هو رايح يخطب؟؟؟؟

وإذا كان أبوه وخاله ماقدرو يديرو فيها والو أنت الصديق ماعندك ماتقضي.

وعلى مايبدو أن الرفض من خلال دوافع معينة.

بالنسية لي هذه محاولة فاشلة.

إذا كان رايح يحاول ماعليه سوى بوالدته.

تقدر هي تروح وتجيبلو الصح من أم البنت.

أما انك تروح بصفة الصديق حاجة مارح تتحصلو عليها.

لأنه الظاهر والله أعلم أن الأب يطمح ويطمع للأفضل لهذه الفتاة.

وممكن كاين اللي هدر عليها وماهي إلا مسألة وقت فقط.

هذا رأيي الشخصي في انتظار باقي آراء الأعضاء.

[سيرين راجي]

في االحقيقة لا يستطيع فعل شيء الامر راه بيد ولي الفتاة
اكيد الاب راه خايف على مستقبل بنتوا ربما لظروفه كما قلت
لكن صديقك راه دار الي عليه وتقدم للفتاة لازم يزيد يحاول مع ابوها
حنا عندنا في هذي الحالة اهل الطفل يدوا معاهم ناس عزاز عى ولي الطفلةاوكبار يقدرهم
كيما نقولوا حنا (جاهة) يحاولوا معاه بلاك يقبل وفي حالة ماقبلش ننصحوا يبعد عليها ويرضى بقسمة الله
وربي يعوض عليه ولا داعي للتفكير في حلول اخرى الي رايحة تزيد تعقد الامر اكثر
نتمنى تتحل الامور ويوافقوا عليه

[رندة.]

يزيد يعاود يبعث الوالدة تاعو تخطبلو و تشوف واش يقولولها، وإذا رفضوه هاذي المرة ثاني خلاص يرضى بمكتوب ربي. وربي يرزقه الزوجة الصالحة ان شاء الله

[طالبة لها هدف]

والله انا نشوفها نورمال كي يرجع الراجل مرة اخرى لدار الطفلة باش يعاود يطلبها احيانا قلب الاب يحن لما يرى ارجل ملح على البنت و يغير شروطه و يقبل
ربي يهنيه و يجعلها من نصيبوا

[mohfor2]

لازم عقد دار مكتوب باسمو.....ادا متشرطش الطفلة يشرطو مواليها

[محمد جديدي التبسي]

الأفضل ان الفتاة تخبر والدتها وهي تسعى لاقناع الوالد اما أن يتقدم دون ضمانات للقبول فهو يحرج نفسه فقط

[kacimo.samy]

سلام عليكم
الحل سهل
تكون هي قابلة بيه وتكون مرا فحلة ما تزوجش ...لي يجي يتقدم ليها تردوو
وهكذا ... يخافو تموتلهم كيما دوبل سيس (قطعة في دومينو كل نخافو تبقى عندنا) حتى هم يتنازلو و يعطوها ليه
وهو ثاني يكون راجل يبقى يستناها

[أم عبد الكريم]

عادي يعاود يخطبها كاين ناس ممدوش بناتهم من المرة الاولى و كي يرجع الخاطب يعطوهالوا .......من الافضل ان يستخير و ان شاء الله يكون القبول و يسهلوا ربي في الحلال

[الباحث السعيد]

بدل المراح تستراح

[تَـجــارِبْ ♪ ɷ]

بسم الله والصلاة والسلام على رسول الله

السلام عليكم ورحمة الله وبركاته
------------------------------------
-هذا الأمر يليق بالنساء
إذا والدته / أو حتى والدتك أنت
أو خالته مثلا...الخ

تحدثت مع أم الفتاة ممكن تلين
لأن الأم غالبا تكون لينة عكس الأب
-وأخبره أن يؤدي صلاة الإستخارة


وربي يجيب الخير

[nilly]

سبحان الله يعني لو كان يولي عمركم 80 سنة ولا 90 سنة لازم اتاخدو موافقة الاهل في كل الامور الصغيرة والكبيرة

هادي طفلة تروح تتزوج بك وماتشوفش لراي اهلها كونو على قد المسوؤلية وماتقولوش بابا وياما جحاح مزالكم تشفوا لاهلكم ادا قبلو ياخي

[قدور بن عاشور]

المشاركة الأصلية كتبت بواسطة nilly

سبحان الله يعني لو كان يولي عمركم 80 سنة ولا 90 سنة لازم اتاخدو موافقة الاهل في كل الامور الصغيرة والكبيرة

هادي طفلة تروح تتزوج بك وماتشوفش لراي اهلها كونو على قد المسوؤلية وماتقولوش بابا وياما جحاح مزالكم تشفوا لاهلكم ادا قبلو ياخي

من أنتم؟

الزواج شرعه الذي خلق الذكر و الأنثى سبحانه و تعالى

و حدد له شروطا

و من شروطه الولي بالنسبة للمرأة
و الذي لا يصح الزواج إلا بوجوده.