خبز الدار بالسميد ( وصفة ماما الشهيرة )

[إلهام07]

البسملة1

مساء الخير عليكم بطبوطات


كي قعدتوا عاقلين وما درتوش القباحة جبتلكم وصفة ماما نتاع خبز الدار بالسميد اللي طلبتوها مني بزاف مرات




شفتو بزاف وصفات لخبز الدار ولكن فيهم الفرينة مخلطة مع السميد أو ساعات تلقاو وصفات عنوانهم خبز بلا دليك ولكن يكون بالفرينة وطبعا حاجة الفرينة جي خفيفة وماتحتاجش عجن بزاف ولكن صراحة خبز الدار طعمو الأصلي والألذ كي يكون بالسميد
ماما تعملو بالسميد وحدو ( فقط ساعات كي تخاف من سميد جديد تزيد ملعقة وحدة فرينة وهذا نادرًا )

هذه الوصفة اللي يذوقها يطلب الطريقة وخاصة أنها بنينة وخفيفة وبالسميد فقط والأحلى ما تحتاجش عجن يعني بدون تعب وأيضا ما نسقيش الخبز نتاعنا بالماء أثناء العجن


ننصحكم جربوه لأن هذه الوصفة رائعة وماما معتمدتها منذ سنوات وصدقوني عمري لا عجبني خبز كيما خبز ماما وتعلمتو عليها وطبقتو كيما راكم تشوفو في الصور وساهل ويحمر الوجه



تابعوا الطريقة :

وهذي المقادير لقرصة وحدة :

الــــمـــقـــــاديـــــر :

صحن كبير سميد ، حطيت صورة الصحن اللي كيلت بيه (أو 2 صحن صغير سميد نوع جيد)
1 بياض بيضة
1 م ك سكر
1 م ص ملح
1 م ك خميرة خبز
1 فنجان صغير زيت،سينوج
زاست برتقال ( أو مندرين أو ليمون )وكثروا شوية يجي فيه ريحة تهبل
ماء دافئ للعجن
2 م ك زبدة طرية

للـــدهــن : صفار بيضة ، 1 م ص حليب ، جلجلان محمص

الطريقة :

1- نضع كل المكونات الموجودة في الصورة في قصعة ( ماعدا الزبدة ) ونخلطهم ثم نبدأ بإضافة الماء الدافئ ونخلط حتى نحصل على عجينة طرية ورخوة يعني جارية شوية ( لأنو ماراحش نزيد نسقي العجين فيما بعد )... مانعجنش فقط نخلط حتى تختلط جيدا و تتجانس المكونات .

2- نغطي العجين بكيس دافئ باش ماتنشفش العجين ونخليها في مكان دافئ حتى تختمر جيدًا .

3- بعد ما تختمر نعجن فقط حوالي 5د رايحين نلقاو العجين طرية وماتحتاجش بزاف عجن ( إذا محتاجة ماء ممكن نضيف فنجان ماء لكن عادة مانزيدوش الماء )

4- نطري شوية زبدة وندهن بيها الرخامة ونبدى نعجن حتى تدخل الزبدة في العجين ونحصل على عجينة طرية ومخملية ولا تلتصق( نضيف الزبدة على مرتين كل مرة ملعقة زبدة )

5- ندهن صينية الفرن بالزبدة (والأحسن تستعملوا الصواني الدائريين هذوك الثقال ملاح ماتتحرقش العجين بسرعة وجي العجينة أخف، هنا كنا في العيد الصواني نتاعنا مشغولين كنت ندير في القاطو )
ونضع كرة العجين ونخليها ترتاح 10د باش ما تعبناش كي نجيو نطرحوها .

6- نطرح العجين وندهنها بالبيض ونرشها بالجلجلان ونخليها تختمر في مكان دافئ ( في الفرن مثلا طبعا يكون طافي )

7- نطيبها في فرن مسخن مسبقا على 180° من تحت ونزيد نحمرها من فوق .

8- كي نخرجها من الفرن نخليها تبرد شوية ثم نقطعها ونقدمها مع قهوة أو حليب .


حنا نحبوه كي يكون طايب جديد نتهاوشو على الحواشي يجيو مقرمشين ولكن إذا تحبوه طري غطيوه بمنديل ونخليه حتى يبرد تماما .

ماما ديما دير كمية منو ولما يبرد تقطعو مربعات وتقسمو في اكياس وتحتفظ بيه في المجمد كي يجيك ضيف على غفلة مباشرة تسخنو شوية في الميكرووند أو حتى تخرجيه بمدة وتخليه يتنحالو التجمد والله كأنه جديد .


نسيت نقوللكم باللي ماما كانت ساعات تزيد فيه السكر دير حوالي 2 أو 3 ملاعق سكر وتحشيهولنا شوكولا وديرو كرات صغار وتدهنو بالبيض وترشو بالسكر من فوق يجي كيما البريوش بصح خفيف ومقرمش نشربو بيه الحليب او نديوه للمدرسة معانا لمجة رائع .













هنا تقدرو تعملو خطوط بسكين او شوكة للتزيين أنا كي كنت صغيرة كانت جدتي الله يرحمها تخلي حتى تكمل ماما تزيين الخبزة و وتحكم يدي وتطبعها خمسة في وسط الخبزة تقوللهم أحسن ديكور ههههه ماما طبعا تبدى تعيط ومن بعد تضحك








وهذا من داخل كيفاش يجي خفيف ماشاء الله




جربوه ما تتكاسلوش

تحياتي ... أنا لهلوبة