وصفات حراير الكوزينة الجزء الثاني

[ام احمدي]

سلطة الفواكه للمتالقة ليزابيل

بعد ما غسلت الفواكه لي عندي قشرتهم و قطعتهم قطع صغيرة شوية في سالاديي و و حطيت عليهم رشة فانيلا و قطرات مازهر و عصير البرتقال و خلطت بملعقة غير بالعقل و غطيتها و حطيتهاا فالثلاجة و مين نبغي نقدمها نحطها فالاكواب و نزينها بكريمة الشانتيي كنت طلعتها مع شوية حليب بااااارد نستعمل كيس الحلواني باش يجيني الشكل شباب و من فوق درت خطوط بالديكوجال و خلاااااص و طبعا التزيين كل وحدة و واش عدها
على فكرة انا درت التفاح الأحمر و الاخضر و الموز و البرتقال ،، و شهية طيبة

إضغط هنا لرؤية الصورة بحجمها الطبيعي.

[ام احمدي]

سلطة الفواكه على طريقة توتة 2010
نقطع الفوكه بعد التقشير طبعا ونحط فوقهم سكر وما الزهر ونغطيهم والى الثلاجة وعند التقديم نعملهم في كؤوس ونزينهم بالياغورت فراز
ملاحضة
الموز خليه حتى تحب تقديمهم ضفيه وخلطي بالعقل
باش ميسودش لونه

[ام احمدي]

الرز بالدجاج على طريقة ام ايمان
بعدما نظفت الدجاج تبلتو بالملح و الفلف ك و الكمون و الفلف الاحمر الحلو و الثوم و الزنجبيل والزيت و عصير القارص و حكيتهم مليح مع بعض و رشقتو بالثوم كامل و درت في صينة الفرن زيت و حطيت فيها الدجاج و درتهم في الفرن يطيبوا درجة الحرارة متوسطة
في هذه الاثناء قطعت البطاطا دوائر عريضة نوعا ما و زدت الفلف الحلو تاني و البصل دوائر كما البطاطاو الجزر و تبلتهم بالملح و فلفل ك و فلفل احمر حلو و زيت . وبعد نصف ساعة من طياب الدجاج جبدت البلا و درت فيه هذي الخضر مع هذاك الجاج و رجعتهم للفرن يطيبوا معا و نخليهم يطيبوا بعد مدة نعصر عصرة ليمون على الدجاج هو الي راح يعطيه طعم و قرمشة و لون رائع راح يتحمر و يطيب مع الخضر قد قد .
اما عن الارز نطيبوا وحدو نقلي بصل في شوية زبدة وندير التوابل كما تتبيل الدجاج و نقلي معاهم تاني الارز وهنا تضيفي الزعفران الطحون باش يعطيك اللون الاصفر و تزيدي المعدنوس و تمرقي كالمعتاد الما ضعف كمية الارز و كي يطيب و عند التقديم نحي من لاصوص تاع الجاج المحمر و نسقي بيه الارز يجي تقول طاب معاه .
و شهية طيبة اختي .

[khadouj_1985]

ماشاء الله يعطيكم الصحة

[أم ضياء عبد الرحيم]

وصفة الباذنجان ام ايمان 11
هاهي طريقة الباذنجان من عيوني
الوصفة هي الحق وصفة امي الحبيبة .
توجدي المرق ديري الزيت و البصل مقطع و التوم ملح و فلفل ك و فلفل احمر و كمون و عود قرفة و معدنوس و زنجبيل مطحون و كسبر والحمص تقليهم مليح بعدها تضيفي مغرفة طماطم مصبرة و تمرقي كي يغلي الما ترمي ديبول الجاج تاعك او اطراف دجاج او لحم كما تحبي و تخليهم يطيبوا .
من جهة اخرى وجدي الباذنجان تاعك قطعيها دوائر عريضة نوعا ما ملحيهم و رمديهم في البيض ثم في الدقيق اي السميد و اقليهم في الزيت حتى يطيبوا و يحمارو .
وكي يطيب المرق سقي بيه الباذنجان تاعك مليح حتى يتشرب و قدميه .و تمتعي بطبق بنييييين و بالصحة و الراحة .

[ام ايمان 11]

كروكي المتالقة ام محمد تاج
3 بيضات كاس قازوز سكر وبنفس الكاس زيت وفاني ورشة ملح وبشور زوج برتقاﻻت وباكي خميرة والفرينة تلمي بيها ﻻزم تجيك يابسة شوي على خاطر الطرية تسيحلك في الطياب والشكل شكل العسﻻية حطاتو في وصفاة لحراير وبسسسسسسس

[ام سراج وملاك]

المحشي oum yousra


المحشي ديزوسيت الجيgو و داويتو و حشيتو بالفيونداشي و رولي تو و ربطته امليح و زدت داويتو من برا و درتو في الفور والصور توضح أكثر.

داويتو ذوبت الزبدة و نحط فيها الملح و الفلفل اسود و ثوم كثري و دبشة و فقط انا مانحبش التوابل بزاف خاطر تودر البنة نتاع اللحم و كل واحد واش يحب نداوي امليح اللحم و من بعد نحط فوقو الفيونداشي و هي تاني نديرلها الملح وفلفل و ثوم و دبشة و حبة بيض و نعجنها مليح و الوقت ماحسبتكش بصح حوالي 3 ساعات لأنو يأخذ شويا وقت في الطياب

[ام سراج وملاك]

بسبوسة قمر77

كاس و نصف دقيق متوسط نصف كاس نواد كوكو اواي مكسرات نصف كاس سكر ثلاث ارباع كاس زيت كاس حليب فانيلا واحد خمارة
خلطي كلش و طيبي
شاربات زوج كيسان ما كاس ونصف سكر
تجي خفيفة و هايلة تعجبني خير ون نتاع البيض و اذواق
ملاحظة : و قبل ما تطيب خليها ترتاح نص ساعة

[مونيا غنية]

كلش 44444444444444444444 ربي يحفظكم كامل

[idron0]

الملوخية ناهدوران

حطي في لكوكوت لحم بقري +بصلة + توم + القليل من الملح + حبة طماطم + مغرفة انتاع اكل طماطم مصبرة + ملعقة توابل + 2ورق رند + 3ملاعق زيت ونحط غوندال انتاع القارص ونقليها مليح
في صحن غاوص انحط الملوخية مع كاس زيت ونحرك حتى تولي سائل
بعد ماتتقلى مليح انحطها فوق اللحم ونحرك ونمرق بالماء الساخن جدا ونحرك نحرك حتى تروح هداك الغليان ونقفل عليها وندلل النار لمدة 20 دقيقة مبعد نفتح عليها غوندال انتاع القارص باه ماتيحيش تقهم .

[idron0]

قلوب بذوق الفراز kakinova
250 غ زبدة
100 غ سكر رطب
ملعقة كبيرة فاني
ملعقة كبيرة فلان الفراز او اثنين
ملعقة كبيرة لارو تاع فراولة احسن ماركة هندجس
كاس نشاء
نصف باكي خميرة
2 صفار وحدة بيضة كاملة
رشة ملح
اقل من نصف كيلوغرام فرينة
العجينة تكون طرية نعمل كويرات نفس الوزن
تعدلها فالمول و تطهى ذهبية اللون ما نحمرهاش حتى تكون طرية و باهية الشكل
لما تبرد نقلبها في بلاطو و نعمر الفراغ بمربى فراز او مربى برتقال مخلط مع ملون احمر و لاروم تاع الفراولة و نخلط مليح و نحطو في كيس جوتابل و نربطو و نقص ثقبة صغيرة حتى لما نضغط على المربى ما يشلفناش و يوسخلنا الحواشي و تجي خدمة نضيفة
ثم ترشي الحبيبات الفضية و تتركيه ينشف ليلة كامل او يوم كامل حتى المربى ينشف قليلا و يعمل قشرة من فوق .
ملاحظة : قوالب السيليكون تطهى فيها الحلوى في حرارة ااقصى حد 200 درجة

إضغط هنا لرؤية الصورة بحجمها الطبيعي.

إضغط هنا لرؤية الصورة بحجمها الطبيعي.

[idron0]

حلوة الخوخ omaymen


ديري عبار تاع لوز مرحي رقيق بزاف مع عبار تا ع سكر قلاصي,فاني وتلمي بالسيرو تكوني خدمتيه هذا هو السر اللي مايخليهاش تيبس 500غ سكرمع لتر تاع ماء وزيدي قطعي 2 ترونشات تاع القارص كيبدا يغلي احسبي 15 دقيقة وطفي
والحشو درت جنوار ورحيتها وزدتلها البندق مرحي ولميتها بالمعجون.

إضغط هنا لرؤية الصورة بحجمها الطبيعي.

[idron0]

تورتيا اسبانيا زوج awladi

من اختراع واعداد زوجي قطعي حبة بطاطا مكعبات رقيقة واقليها خليها بجهة اكون عندك بصل الاخضر قطعيه رقيق شوية ملح وحمسيه مليح من جهة كسري ثلاث حبات بيض على البطاطا وشوية بصل وحديهم في مقلى اطيبو كلي راح اديري فريت اوملات هذا هيا تورتيا الاسبانية وزوجي زاد فيها وجات امممممممممممممممحط وحدة تورتيا في طبسي ومن فوق شرائح سلاطة و شرائح طماطم وخدم الللحم مرحي شراه منسم انت نسميه واش تحبي ودارها على شكل قرصة كبيرة وشواها وحطها فوق الطماطم وعاود حط فوقهم تورتيا من فوق وقدميها قطعيها على واش تحبي وبالصحة والهناء .

إضغط هنا لرؤية الصورة بحجمها الطبيعي.

إضغط هنا لرؤية الصورة بحجمها الطبيعي.

إضغط هنا لرؤية الصورة بحجمها الطبيعي.

[idron0]

الطمينة كورات ام منيب

بعد ماتفوري الدقيق تاع الطمينة مايكونش خشين كما تاع القلب اللوز....خليه يبرد بجيه ....حمسيه في المقلى باستعمال مغيرفة خشبية حتى يسمر لونه .....خليه يبرد مليح و ارمي فيه قرصة ملح و قرصة حرور و شوية قرفة للنكهة
في كسرونة ذوبي الزبدة و العسل حتى الغليان .....كمية العسل تساوي كمية الزبدة و من بعد طفي و بعدي الكسرونة من على النار
ارمي الدقيق المدوزن في االعسل و الزبدة و حطي كمية تاع حلوة ترك محكوكة بين يديك و خلطي مليح لازم الخليط يبقى جاري
غطيه و خليه بجيه
كي تلقايه حكم روحو و راه قابل للتشكيل....كوري كرات حجم البيضة او اكبر و خليهم يزيدو ينشفو مليح....عاودي كوريهم
راح يحبوهم لولاد اكييييييييييييد.

[idron0]

قراتان تاع بسباس قمر 77

البسباس نطيبوا جواز عاديبالبصل و الثوم نقليهم مع صدر جاج او اقل و نمرق قليلا و نروي البسباس مقطع و نزيد الرند و الزعفران كي يطيب نخدم البيشاميل و نقطع الزيتون الاخضر فيها او الجاج نفتتو و ندير الفراميج تعطي بنة هايلة و نقلي شوية بطاطا و حط في البلا نتاع الفرن اولا البطاطا ثم البسباس ثم البيشاميل ونخليها تتحمر و نطفي لاخاطرش كلش طايب .