التوضيييح: هل هذه الطريقة شرعية للزواج ولا حرام؟

[مشكلتي]

قولولي كيفاه شبعتكم خرطي جيت نطلب النصح وليت محط للسخرية والاستهزاء !!!! ولا كون جاتكم قصة خطف او قتل او التعدي على الشرف تجيكم نورمال ؟؟ بصح في غلطتي هذه جاتكم حاجة بزاار وعلاه انا منخلطتش لست بملاك او من الاولياء الصالحين ؟طول حياتي وانا مستقيمة اللى ان وقعت في شباك الشيطان والانسان خطاااء مهما بلغ من ايمااان وانا اخطات من غير قصد او تعمد طلب مني هذا الصديق الزواج هل درت كبيرة من الكبائر واصلا جامي خليتو يتعادى ففي كلامو معي .....وكي لا انسى اشكر اخياتي الافاضل لي قدمولي رودود لائقة ومقنعة منطقيا بارك الله فيكم
نرجع نفهمكم في الوضعية كيف صارت ....
المهم عام الباك فتحت فيس بوك اول مرة في حياتي لاني كنت من معارضيه بشدة ولا حاجة به ابدا سوى مضيعة الوقت
الى ان انتهى بي المطاف ان اكون من مستخدميه عام الباك
دخلت في قروبات دراسة طلبت مساعدة فيما يخص دراستي فلم اجد الا هذا الشخص الذي ارسله لي على الخاص وساعدني في حاجتي ....واخبرني ان احتجت اي طلب فهو حاضر فسعدت كثيرا وقبلت به كصديق على الفيس استنجد به وقت الحاجة حتى اني كنت اكلمه بالعربية الفصحى ظننا مني انه نفس الشيء ما نفعله بالمنتديات عاادي كي نتكلم مع عضو في منتدى نفس الشيئ نتكلم على الفيس مع صديق وكنت منتبهة جدا في كلامي كي لا اخرج عن الحدود حتى الدارجة منهدرهاش..رايحين تقولو هادي بهلولة اشبعو ضحك عاادي لاني كنت جديدة في استعمالي للفيس فرقابة الله وحده تكفيني ..حتى اقربائي مكانوش معيا اصدقاء لانو نشوفهم في ارض واقع ومنهدرش معاهم بزااف واش ندير بيهم في الافتراضي نقبل غير الاساتذة بعض بنات جامعة كي نسحق ؤدرس ولا اي حاجة تخص الدراسة ..وماتقولوليش علاه لبنات مكانش باش تروحي لطفل ...لهطت ولهثت وكل واحد لاتي غير بروحو لا استجابة ابدا ....المهم انا اقر بخطئي وماحدث قد حدث تعلمت درس اني منقبلش طفل يالوكان على مصلحة نقعد بجهلي ومامنخالطش ....وقتلكم مكنتش متوقعة يطلب مني هذا الطلب ....ايه نسيت عمري 20

والان هاني وضحتلكم دبرو عليا يا ننسى الحكاية يا نقبل ؟

وكان جات حاجة تافهة قولولي نروح نغلق الفيس نهائيا ونتهنى

[زبدة ذايبة]

يابنيتي

من خلقنا ربي وحنايا نعرفوا أن الطفلة يخطبها الراجل من باباها

نقطة ونرجعوا للسطر

ماكاين حتى حاجة ثانية غير هذ الطريقة

ماعندك حتى إثبات أنه يريدك فعلا للزواج

مجرد كلمات مكتوبة من شخص وهمي

ماكاين حتى دليل يأكد أنه ذكر وأنه شاب وأنه غير متزوج وأنه صادق وأنه ......

يعني مجال الشك مفتوح بالنسبة ليك

اللي عاقلة ماتحطش روحها للتجريب

ماتحطي مشاعرك ، ماتحطي تفكيرك وحياتك محل التجريب

هذا وزعمة راكي تعسي في روحك ومنتبهة باش ماتغلطيش وجاتك الخطوبة من الفيسبوك كيما تجيك دعوة الصداقة

كوني واضحة مع نفسك وماتغلطيهاش

الأعضاء مهما كتبوا واحد مايقدر يدير الخطوات العملية سواك.

بالنسبة لي شخصيا مارانيش قادرة نعطيلك حتى رأي

الفيسبوك باب شر كبير فتح للناس

وباب فتنة عظيم

ضيع شباب المسلمين وشاباتهم

وضيع رجال كبار ببيوتهم وبأسرهم

هدم البيوت بدون استئذان وبدون سابق إنذار.

هذا الشخص عوض مايجي لأبوك

اختار الفيس أبوك

والفرق بينهما واسع وشاسع

أبوك الحقيقي اللي يجي لعندو ويهدر معاه

وليس (فيس) بوك الذي هو الوهم في الوهم

والضياع في الضياع

ماتبنيش حياتك على الأوهام وعلى الشك

وبنفس الطريقة اللي تبني بيها بيتك يبقى قائم

إذا بنيتيه على الحقيقة يبقى حقيقي

وإذا بنيتيه على الوهم يبقى وهم تذروه الرياح

شوفي أي الطرق أنسب وأصح للبقاء

ربي يهديك يويفقك

[سَامِيَة]

يا ختي ماتزعفيش منا اذا كنا قسينا عليك فالكلام علابانا بلي كامل معرضين للخطأ وكيما يقولو مكانش شجرة مايهزهاش الريح...برك النصيحة خطرات لازم تكون قاسية باه تعطي مفعولها لما توجع فالقلب.
....المشكلة راكي متأكدة من النية نتاعو؟ بلاك كي لقاك شادة روحك شوية قال هذي منقدرش نشدها معايا إلا إذا دخلتلها من باب الزواج!
....نصيحتي ختي لآخر مرة قوليلو يقصد الدار يحكي مع أهلك هوما أصحاب القرار....هاكا تضربي عصفورين بحجر من جهة تتاكدي من النية نتاعو فالزواج ومن جهة اخرى تبعدي على الحرام وماتنسايش بعد هذا تبلوكيه مباشرة دون أي تردد....إذا تساهلتي فالموضوع رايحين نباركو لابليس جاب واحدة مسقمة فالشبكة ونقولك رايحة تخطي خطوة تجي موراها خطوات باتجاه القاع اللي إذا طحتي فيه صعيب تخرجي منو. ...ماكلاه تولفي روحك لدعاوي الشر. .ياك راكي تقولي خاطيك. ...ورايي بعيد على النصيحة راه يحوس يجيب الوقت 22 سنة
....مسألة الشرف والكبرياء واعرة بزاف حاولي قد ما تقدري تحافظي عليها. ..ركزي مع قرايتك وكي تكملي إن شاء الله ربي يرزقك بالزوج الصالح. بالتوفيق.

[سَامِيَة]

ولا نقولك خليلو رسالة برك متزيديش تحكي معاه خاطر ماشي محال يكلخلك بالهدرة ويلعبلك بعقلك حتى ياثر عليك....وتولي كيما المخدرة ماكيش جايبة كامل خبر....اخطيك منو ومن أي رجل ممكن تعرفيه بطرق ملتوية.

[sohaibdz]

يا الاخت والله ماقصدي التجريح لكن كلامك في الموضوع الاول غير منطقي.... كيفاه يطلب منك الزواج و جامي شافك و ميعرفكش في الواقع ....و انتي منك بصح تخممي فيه و زيد تطلبي في حكم الشرع اذا حلال او حرام...اول حاجة حنا منقدروش نفتيولك لان الفتوى عندها اصحابها ...ثاني حاجة كيفاش نقدرو نحكمو على السيد هذا لكان كفء للزواج كيما راكي تقولي ولا لا يعني حنا نعلمو الغيب مثلا ?! ثالث حاجة اخطيك من الفايسبوك راني ننصحك كيما اختي

[majdi11]

يا الاخت اذا راكي حابة تربحي عرضك وصحتك أخطيك من الخرطي هذا

الشيطان يزين لك والنفس تاعك اذا اسمعتي لها راكي رايحة تضيعي

لأن الزواج عنده باب واحد ومعروف عند الكل

ومداخل الشيطان متعددة

استغفري الله واكثري من ذكره واطلبي منه ان يمدك بالرجل الصالح الذي تحلمين به

اما هذا اللي يريد يتزوجك قولي له تعال واخطبني كيما الرجال والسلام

[jirardo]

نحس مكاه جدية
كنتو تحكوا غير على لقرايا في فايسبوك
من بعد عرض عليك زواج
زواج بسهولة هده

[nihal159]

فرضا قبلتي عرض الزواج من هذ الرجل الخيال؛ من بعد كيفاش؟ كيفاش رايحة تخرجيه من الخيال إلى الواقع؟ تقوليلو منطقيا أرواح أخطبني من بابا.
كيفاش رايح يوصل لباباك؟ تمديلو عنوان بيتكم؟ شكون لي يضمنلك أنو هذ الإنسان راهو جاد في طلبو؟ ممكن بعد مايعرف عنوانك يفضحك و يشهّر بيك؟
فرضا هذ الإنسان ولد فاميلية؛ و خطبك صح؛ مادام راهو من ولاية أخرى؛ السؤال لي يطرحو باباك على الخاطب: شكون لي دلّك علينا؟ وأمك تسألك تقولك وين عرفتيه و وين شفتيه باش جا يخطبك؟
يعني حكايتك كلها على بعضها ماتركبش؛ لأن مابُني على باطل فهو باطل؛ و زيد هذ عريس الغفلة لي جاي من ولاية بعيدة من غير واسطة موثوق فيه؛ في بالك باباك رايح يقبل به بسهولة؟
أختي ماتزعفيش منا؛ رانا نهدرو في مصلحتك مالنا لاناقة و لاجمل .

[ايمان4]

22 سنة السيد مزال صغير و يحوس يتمسخر ... و زيد شوية مدخلتليش ف راسي تحكيو غير على لقرايا حتى جبدلك الزواج؟ رانا كامل شباب و نعرفو و نفهمو .... المهم منزيدش نسيء الظن ... انت و كا كيش عارفة اذا راه يتمشى بالنية معاك و حنا كيفاه باغيتنا نعرفو ؟

[linal]

بلعقل اختي
تفرج بربي ان شاء الله

[عسجدة]

بارك الله فيك

شوفي درك قوليلوا راني قابلة بالزواج ارواح تخطب .
علابالك واش يقلك :
يقلك انا منخطبش وحدة مانيش شايفها معليش نقدر نشوفك في
الفيبر او ال***** ولا بعثيلي صورتك
للفيسبوك .
يشوفك وتشوفيه ومبعد يقلك لازم
نتعرف على العقلية اكثر ولازم نعرف
واش تحبي واش ماتحبيش حتى يولي فرد من اسرتك الحبيبة .

ونهار يجيب نهار وعام يجيب عام

نهار يقلك غدوى نجي ومبعد يقلك
صراولي مشاكل خلي الشهر الجاي ومبعد خلي العام الجاي .

وهي هكذا حتى تكملوا. 05 سنيين
وانتيا تدي في الذنوب ومبعد يقلك
روحي بالسلامة شوفي كاش جايح
في الواقع يديك .

يارحم والديك بنات في الواقع ومع
شباب يعرفوهم وولاد الحومة وجابوا
بيهم 07 سنين ومبعد قالولهم باي
باي باي .

حتى انتيا هذا الشخص المجهول من
عالم الانترنت .

مزلتي تأمني بالغولة والغول .

افطني وبركاي من الجياحة وديري
عقلك في راسك .
معليش حنونتي ديري تجربة وقوليلوا راني قابلة الزواج بيك ياسي خونا المجهول الفيسبوكي وقوليلي واش يقلك برك ؟

اللي حاب يتزوج يجي باين .
سلام

[kacimo.samy]

سلام عليكم
لازم تسقي 22 سنة هذا مازال يقرا كيفاه يتزوجك ويقرا ؟؟
فوت لارمي؟؟
كاين ناس 32 وموش قادر على روحو وهذا 22 ؟؟ يا اختي راكي صغيرة والله خممي شوي
وعجبتني حاجة فيك نتي باينة انسانة مثقفة لانك وضعتي مشكلتك و سألتي اخوة
المهم راه دَيسَم بشري (ابن ذئب) وبلاك ذئب بشري عسي روحك منو والله
والله قادر يدمرلك حياتك
المهم نتي قوليلو داركم و ارواح تخطب ولا حط غير كلمة وكل يوم قوليهالو والله يليكديك بويسك جيتيه واعرة و فاهمة

[غزلانْ]

السلام عليكم

و ما عرضه الا ليكسب ثقتك فيه ظنا منك له أنه جدي فلتحذري و لتنسحبي أفضل لك
موفقة أختي