ملف مفتوح عن التحليات و العصائر من مطبخ Toma

ilbeldelmondo · 2013-12-15, 19:08

السلام عليكم
في هذا الموضوع راح نحاول نحط كل التحليات و العصائر لي راح نديرهم و كل مرة نزيد الجديد

حلا مربعات الفنيلا

الطبقة 1:

3 بيضات
6 م ك سكر
6 م ك زيت
4 م ك فرينة
2 م ك كاكاو
م ص خميرة كيميائية
1/3 كاس حليب مع 1/3 كاس حليب محلى مركز

بالمضرب نخلط البيض مع قرصة ملح ثم نضيف السكر و الزيت تدريجيا
ننقص السرعة و نضيف الفرينة، الكاكاو و الخميرة
يخبز عل درجة 180 في قالب 25*30 سم باستعمال ورق طهي او ندهنه بالزبدة و الفرينة
عندما يبرد نبلل الحلوى بخليط الحليب المحلى
الطبقة 2:

نصف لتر حليب
150 غ نشاء
100 غ سكر
4 م ك فنيلا
7 م ك بودر كريمة الشونتي و 2 م ك فنيلا مخفوقة في كاس حليب
50 غ زبدة طرية

نذوب 1/4 حليب مع النشاء ثن نضيف الحليب الباقي و السكر و الفنيلا و نضعهم فوق نار هادئة مع الخلط المستمر حتى يتخثر الخليط و يصبح كريمي نتركه يبرد في الثلاجة
ثم نخلطه بالمضرب مع الشونتي و الزبدة و نضع هذه الكريمة فوق الطبقة الاولى و نسويها جيدا
الطبقة 3:

200 غ شكولاطة
4 م ك ماء
3 م ك كاكاو
1 م ك بياض بيض
نذوب الشكولا و نضيف باقي المكونات مع الخلط للحصول على خليط خاثر يمكن اضافة الماء ان لزم
و نغلف الحلا و نتركه في الثلاجة ليلة كاملة
يمكن تزينها بكريم شونتي كيما درت انا

كؤوس الشكولاطة سهلة و اقتصادية

الكميات حسب واش تحبو
كمية من كيك او مسكوتشو او مدلان بذوق شكولاطة نفتتهم
شكولاطة ذائبة و نظيفلها الماء و نخلط حتى الحصول على صوص شكولاطة
نطلع كمية من الكريم شونتي بالماء البارد
مكسرات حسب واش عندك و يمكن استبدالها بالموز

في كؤوس شفافة نضع طبقة من فتات الكيك و نسقيه بالصوص

نضع الكريمة ثم الفتات و نسقي بالصوص الشكولاطة ثم المكسرات و نكمل حتى يتعمر الكأس
نزين بالكريمة و نضع الكؤوس في الثلاجة مدة ساعتين

نرش الكاكاو من فوق و تقدم باردة

كاستال بالفول السوداني

طبقة الجينواز بالفول السوداني

من اجل مول 38*30 سم
ثلاث بيضات
رشة ملح
7 ملاعق كبيرة سكر
6 ملاعق كبيرة زيت
5 ملاعق كبيرة فول سوداني محمص و مرحي بالقشور
4 ملاعق كبيرة فرينة
ملعقة صغيرة خميرة كيميائية
ملعقة كبيرة معجون المشمش
فنيلا
نضرب البيض مع الملح ثم نضيف السكر الفنيلا ثم الزيت
نقص السرحة و نزيد الفرينة الفول السوداني و الخميرة و المعجون
نفرغ الخليط في المول مدهون بالزبدة و الفرينة او استعملي ورق الطهي
طيبيها في الفرن ساخن 180 درجة مدة عشر دقائق
نقسم الجينواز الى 2 لنتحصل على طبقتين
طبقة العجينة المورقة:

نفرد العجينة المورقة 250 غ بشكل مستطيل اكبر من مول لي استعملناه في الجينواز
نطيبو 150 درجة حتى تحمار
للحصول على طبقة مستوية نطيبها على صينية مقلوبة و نحط فوقها صينية اخرى
نقطع الطبقة الى مستطيلان بحجم مستطيلان الجينواز
كريمة الزبدة:

120 غ زبدة طرية
بياض بيضة
120غ سكر
50 مل ماء
نطلع بياض البيضة مع رشة ملح
و نغلي السكر مع الملح كي يغلي نأخذ كمية بالملعقة و نحطها في ماء بارد اذا ولات كرة لينة نظيف هذا السكر السائل الى البياض مع الضرب المستمر
اذا لم ذاب السكر كي نديروه في الماء البارد نخليه يزيد يغلي
حتى نتحصل على ميرانغ إيطالية نخليها تبرد و نضيفلها الزبدة و الفنيلا او ملعقة معجون

نضع طبقة من العجينة المورقة ثم الكريمة، طبقة جينواز ثم معجون المشمش ثم الطبقة الثانية تاع الجينواز
طبقة اخرى من الكريمة و أخيرا العجينة المورقة

كي نكمل تغلق الطبقة الاخيرة بطبقة رقييييقة من الكريمة ثم المعجون و الفول السوداني مرحي
نرش السكر الناعم و نخليه يجمد شوي و نقص القاطو الى مثلثات او مستطيلات
انا هنا زينتهم بالمكرون بالفول السوداني

شهية طيبة

الميني باتيسري بالشكولاطة

الجينواز:

يمكن تحضير اي جينواز تحبوها لكن تكون رقيقة
3 بيضات
6 ملاعق كبار سكر
6 ملاعق كبار زيت
5 ملاعق كبار فرينة
1 ملعقة كبيرة كاكاو اسود
ملعقة صغيرة خميرة كيميائية
رشة ملح
ملعقة كبيرة يوغورت طبيعي
نخفق البيض مع الملح حتى يطلعو و نزيد السكر ثم الزيت و اليغورت ثم نصف السرعة نزيد الفرينة و الكاكاو والخميرة
نطيبها في مول طوله 38 سم و عرضه 30 سم على ورق الطهي او ندهنه بالزبدة و نرشه بالفرينة
نطيبها في 170 درجة مدة 10 دقائق

كي يبرد نقسمها على 4 و اذا تحبي الكثير من الحبات و العلو شوي ناقص ديري على 3

نحضر كريم شونتي بكاس حليب بارد و كمية الشونتي ستة الى سبع ملاعق كبار هي لازم تجي مشدودة شوي
لتشريب الجينواز اما تذوبي الشكولاطة مع الحليب و اما ديري حليب مع السكر عادي او حليب مع نيسكافي و السكر
اذا عندك مول بمحيط و شكل طبقات الجينواز فانت محظوظة ههههههه sinon ديري العفسة تاعي ابني الجدران بالالمنيوم هههههههههه
نضع الطبقة الاولى و نشربها بالحليب و نضع الكريمة كمية مليحة و نوسيها مستويا مليح و نكمل الطبقة الثانية تاع الجينواز نشري و نطلي الكريمة حتى الطبقة الاخيرة نغلفها بطبقة رقييييقة تاع الكريمة و نخليها تشد روحها
نحضر طلية الشكولاطة نذوب 100 غ شكولا و نزيد الكاكاو حسب الرغبة و الماء حتى نتحصل على طلية خاثرة و نخلط مليييييييح و نسيحها على القاطو و نخليها في مكان بارد
التقطيع جد سهل لان الجينواز طرية بالحليب

حجم القطع انت واش تحبي انا أعطتني 12 حبة لاني استعملت اربع طبقات
التزين حبيت نوريلكم فكرة جاتني الصباح ههههههه نخدم papier transfert وحدي و الرسمة لي نحب

جربت رسمة عادية و بالالوان تجي احسن. لكن انا درت فقط الكاكاو نبلوه بالماء حتى نتحصل على لون فاقع و علي ورق شفاف بلاستسكي تلقايه عند المكتبة نحطو على ورقة بيضاء نكونو رسمنا الرسمة لي نحبوها و نعاود على الرسمة بالكاكاو المبلل بفرشاة جد رقيقة
ان امكن ديري مرتين لتغميق اللون نخليها تجف ثم ثم تجف
نذوب شكولا بيضاء و ندهن طبقة رقيقة فوق الرسمة و نخليها تجمد راهي ثم ثم تجمد

نكسر الرسمة عشوائيا و نزين الميني باتيسري و نزيف اي حاجة متوفرة عندك و يارب تنال إعجابك ان شاء الله

Gelée de kiwi جولي الكيوي بدون جيلاتين

نحضر طبقة جينواز سميكة او رقيقة كيما تحبي
انا درتها رقيقة

بيضة
ملعقتين زيت كبار
ملعقتين كبار سكر
ملعقتين كبار فرينة
فنيلا او مبشور ليمون
نص ملعقة صغيرة خميرة

نخبط البيض ثم نزيد السكر و الزيت و الفرينة مع الخميرة
نطيبها في صينية بقياس لمول المستعمل للجولي
الجولي:

لتر عصير كيوي تاع الأكياس مثل اميلا
و فلون فاني مكيال لي تستعمليه ل2 لتر حليب
2 ملاعق كبار نشاء
كيوي شرائح
كريم شنتي للتزين
نخلط العصير النشاء و الفلون ثم نحطهم على النار حتى يغليو و من بعد نصب في مول التقديم و نحطو في الثلاجة شوي يشد روحو و نحط طبقة الجينواز من فوق
و نخليه في الثلاجة حتى يجمد

انا درت طبقة رقيقة في الاول ثبت بيها الكيوي قي قاع المول و كي شدت وحها كملت باقي الجولي
كل واحد كيما يحب و نزينها و نقدمها

شهية طيبة و يارب يعجبكم و هذه هي فيديو باه تفهمو اكثر
https://www.youtube.com/watch?v=ODFyVMtp_mo

Tarte au citron

العجينة:

250 غ فرينة
70 غ سكر او اكثر حسب الرغبة
صفار بيضة
125 غ زبدة طرية
مبشور الليمون
فنيلا
قرصة ملح
بالمضرب نخلط الزبدة و السكر مع الملح ثم نضيف صفار البيضة الفنيلا و مبشور الليمون حتى الحصول على كريمة و نظيف الفرينة راح نتحصل على عجينة متماسكة

نخليها ترتاح شوي و من بعد ندهن مول الخبز بالزبدة و اذا خفتي رشي الفرينة و اذا خفتي فرشي ورق طهي
فوق بلاستيك افرديها بالحلال و اقليبيها على المول و واسها مليح عند الاحراف
تثقبيها و حطيها في الثلاجة نص ساعة و طيبيها 150 او 180 درجة حتى تحمار
اذا بقات العجينة تبرشيها و طيبيها عادي
الكريمة:

نص لتر حليب
100 ملل عصير ليمون
5 الى 6 ملاعق سكر
صفار بيضتان
3 ملاعق كبار نشاء
نخلط الحليب مع النشاء السكر و صفار البيض جيدا ثم نضعهم على النار مه الخلط المستمر لا تستعملي المعدن للخلط باه ماتزراقش حتى تخثار الكريمة طفي النار و أضيفي العصير اخلطي مليح و خليها تبرد في الثلاجة
من الافضل تغطيها باه ماتكونش قشرة
اذا قدرتي كي تعصري الليمون تفرغي الحبات مثل الصورة

الميرانغ:

راح يبقالك ثلاثة بياض بيض من الكريمة و العجينة
150 مل ماء
300 غ سكر
نحط السكر و الماء على النار دون الخلط
نطلع بياض البيض بقرصة ملح و نخليه
نجيب كاس ماء بارد و ملعقة كي يبدأ يغلي السكر نهز شوي منه بالملعقة و مباشرة في الماء البارد اذا ذاب مزال نخليه يخلي اذا كون كرة شفافة و قدرنا تمسكها بيدنا و تكون لينة نطفي و نصب بالشوي على بياض البيض و الخبط بالمضرب مستمر
راح تتحصلي على ميرانغ إيطالية حطيها في الثلاجة تبرد راح تزيد تتماسك
نجيب العجينة كي طابت الكريمة و الميرانغ و كيس حلواني

نحط الكريمة و نزين بالميرانغ
العجينة لي برشناها نعمر الليمونات لي فرغناهم و نزيد شوي كريمة و ميرانغ

الان تشعلي الفرن من فوق و الطورطة التحت و تخلي الميرانغ تحمار

و تقدم باردة
شهية طيبة لمشاهدة الوصفة فيديو هذا هو الرابط
https://www.youtube.com/watch?v=TRAVN_ZcuiQ

السلام عليكم و رحمة الله و بركاته

تحلية الليمون الكثير يحضرها و كل واحد و طريقته و منعشة و الكثير يحب الليمون هي تشبه la tarte au citron
تحضر و تقدم اما في كاسات او وعاء كبير زجاجي او قالب cheese cake الكبير او القوالب الصغيرة
الطبقة الاولى و هي جينواز عادي بقشور الليمون

يمكن اعتماد الوصفة لي تحبي انا وصفتي ليتعلمتها من قبل و بقيت عليها
مبدأها عدد البيض نضاعفه عدد ملاعق كبيرة سكر زيت فرينة فنيلا و خميرة
مثلا:
اربع بيضات
رشة ملح
8 ملاعق كبيرة سكر
8 ملاعق كبيرة زيت
قشور ليمون و فنيلا
ملعقة صغيرة و نصف خميرة كيميائية
8 ملاعق كبيرة فرينة
نضرب البيض مع الملح بالمضرب الكهربائي و لا يهم حرارتها الدافئة احسن لكن انا شخصيا نجبد من الثلاجة نغسل و نبدا نلبز
نضيف السكر حتى يذوب مع الفنيلا و قشور الليمون ثم نضيف الزيت و نضرب جيدا ننقص السرعة و نضيف الفرينة و الخميرة
ندهن المول بالزبدة و نرشه بالفرينة او نستعمل ورق الطهي
نضعها في وسط الفرن ساخن على درجة 180 حتى تحمار من فوق
ملاحظة: كمية اربع بيض ما استعملتهاش الكل للتحلية لكن صبرتهم بها شربو بها القهوة
جينواز بيضتين تكفي لي كمية الموس

كي طيب نقطع على قيس المول المستعمل و نضيف عصير الليمون لكن غير شوي انا استعملت ملعقة كبيرة فقط
طبقة la creme citron :

صفار بيضتين
ثلاث ملاعق كبيرة سكر
ملعقتين كبيرتين نشاء
فنيلا
نص لتر حليب
نص كاس ليمون
6 ملاعق بودر كريم chantilly
ملون اصفر
بالمضرب نخلط صفار البيض النشاء السكر و الفنيلا ثم نضيف القليل من كمية الحليب و نخلط حتى التجانس و نكمل كمية الحليب الباقية و نضع الخليط على النارتكون هادئة مع الخلط بالمضرب اليدوي حتى تخثار هي مش راح تكون خاثرة بزاف
ننزعها على النار و نضيف الملون غير شوي

نضعها تبرد مع الخلط من حين الى حين او نغطيها بالبلاستيك
كي تبرد نضيف الليمون مع ترك القليل منه و نخلط باليد فقط
نضيف la crème chantilly و نضرب بالمضرب

نضع طبقة معتبرة فوق الجينواز و نضعها في الثلاجة

طبقة la crème chantilly au citron
الليمون لي خليناه من la mousse نضيف الماء البارد حتى ندير نص كاس
نضيف la crème chantilly en poudre و نطلعها بالمضرب نضعها في الكيس الحلواني و نزين فوق la crème citron

يمكن التزين أيضاً بالنعناه و شرائح الليمون طايبة مع السكر و القليل من الماء

انا بياض البيض لي بقالي خدمتو meringue بطريقة الحمام المائي
بياض بيضة بثلاث ملاعق سكر خشن و رشة ملح
و شكلة شرائح ليمون كيما في الصور

و شهية طيبة

[]

سموثي الموز

مصطلح smoothie يطلق على كل مشروب فاكهة تكون مرحية يعني كاملة ليس الا عصيرها و مظاف اليه عصير فواكه او حليب او ياوورت او glaçons râpés
نبدأ بالمقادير تعملك كاسين:
كاس حليب بارد
موزة
ملعقتين سكر خشن
Deux glaçons râpés
نص فنجان عصير ليمون
و mixeur

يقطع الموز و يوضع كم المكونات الاخرى في le mixeur و يخلط حتى تشكل الرغوة و يقدم بارد

طريقة طي la serviette على شكل موزة

و يا رب ينال إعجابكم

جربت smoothie au chocolat
و ذوقها عجبني بزاف تشبه كونديا شوكو لكن قالولي في الدار احسن و تبرد القلب و تريح الأعصاب

اسمحولي ماصورتش الخطوات ماحطيتش يجي لذييييذ هههههه كي نعاوده نصور و نعدل الموضوع
نبدأ بالمقادير
لتر حليب
200 غ شكولا سوداء
خمسة ملاعق كبيرة crème chantilly en poudre
ملعقة كبيرة كاكاو حسب الرغبة
اربعة ملاعق كبيرة chocolat à tartiner النوع لي تحبيه انا استعملت تاع الجزائر لقيتها sold ههههههه
ثلاث مكعبات ثلج
الطريقة
نذوب الشكولاطة كل واحد و طريقته و نوع الشكولاطة انا نستعمل منى
بعد ما نذوبوها نحللها في في كاس حليب بارد ثم نظيف باقي الحليب و نحطوه في mixeur اذا مش متوفر استعملي الباتور
نظيف كريم شونتي و الثلج و نيوتيلا و الكاكاو و نشعل الخلاط حتى تتشكل الرغوة
يقدم بارد
هذه فكرتي في التقديم

gâteau raffiné
طورطة هذه شفتها في النت و الحقيقة هي تاعهم خرجت مرسومة لان الجينواز ثقيل و الكريمة كريمة الزبدة يعني تجي ثقيلة الحالة هههههه انا درتها بوصفة المعتمدة منذ دخولي المطبخ ههههههه و هي عدد البيض ضعفه ملاعق سكر فرينة زيت
نبدا باالحلزون

4 بيضات
8 ملاعق كبار سكر
8 ملاعق كبار فرينة
فنيلا
كيس خميرة
رشة ملح
مول 35*40
ورق طهي
بالمضرب نطلع البيض بالملح نم نضيف السكر حتى يبياض الخليط نضيف الفنيلا الخميرة و الفرينة و نقص لسرعة المضرب
نسكب الخليط في المول لي حطينا فيه الورق و نخبز في فرن مسخن قبل على درجة 180 و نعسوها مع تشد روحها و تحمار من الأسفل نشعل من فوق*
مانخليش النار السفلى تحمرلي الفوق لان راح تيبس الجينواز تاع الرولي*

في ذلك الحين نكونو بلينا قطعة قماش او منديل مطبخ و نعصره ملييييييح

نخرج الجينواز بعد ما حمار من فوق و نفرش المنديل المبلل و نقلب الجينواز عليه و ننزع الورق و نبدا نلف الجينواز مثل الصور يعني المنديل يلف مع الجينواز و ندخلها الثلاجة حتى بيرد

نحضر معجون بلون قاتم الجماعة ههههه دارو تاع توت العليق لكن تقدري تلوني معجون المشمش ملون بالأحمر مثلا*
انا استعملت شونتي شكولاطة للأطفال لكن بالمعجون تجي متحوفة كيما تاعهم ههههههه
نجبد الرولي و نحله و نقسمه شرائط متساوية انا درت ثلاث لكن جاتني عالية و صغيرة يمكن ديري اربع احسن
اذا تحبي شربي الجينواز بالعصير اذا راح تستعملي المعجون
او الحليب مسكر اذا راح تستعملي كريمة شكولا
ندهن المعجون او الكريمة على كل شريط و نلف الاول و نوقفه مثل الحلزون و نضيفلو الثاني و الثالث حتى نكمل ندخلها تبرد و تشد روحها في الثلاجة

نحضر القاعدة و الرأس ههههه
2 بيضة
4 ملاعق كبار زيت
4 ملاعق مبار سكر*
ملعقة كبيرة كاكاو اسود
3 ملاعق كبار فرينة
رشة ملح
ملعقة صغيرة خميرة
نخلط مثل المرة السابقة فقط هنا الزيت نضيفها بعد السكر
و نخبزها اما في 2 مول بحجم قطر الحلزون او مول كبير و من بعد نقطع قرصين بقطر الحلزون
و نحضر الشونتي بيضاء*
نشرب الجينواز الاسود حسب الرغبة
نضع قرص اسود ثم الكريمة ثم الحلزون ثم الكريمة ثم القرص الاسود ههههه و نغلف الكعكة بالكريم شونتي و نخليها في الثلاجة*

نحضر كرتون عندك نظيف ما تضحكوش انا لقيت تاع نجمة ههههه
تقصيه مسنن مثل الصورة
و تجيبي الكعكة و تكرريه اذا تقدري مرة وحدة على جانبها
و الكريمة الباقية نزيني بيها*

في الوسط نضع المعجون لي استعملناه او شكولا و ماء او كراميل*

في نزينها جد عادي لكن يعطي طابع الكيكات الشهية*
و المفاجأة كيييي تقسميها ههههههه

و الان المفاجعة الكيكة تاع الجماعة شحاااال متحووووفة و لا تشبه تاعي ههههههه

تقبلو مروري و يا رب تعجبكم
*و ما تغركمش تاعهم راهي ثقييييلة ههههه
ملاحظة اذا أردتها تجي bien raffinée ماتشربيهاش و استعملي المعجون احسن لكن يكون ثقيل او الكريم شونتي ثقليها اي خثريها

أم ياسين الزهراء · 2013-12-15, 19:38

بارك الله فيك كلمة شاف قليلة فيك ربي يحفظك

ام ظافر · 2013-12-15, 20:04

ماشاء الله ربي يحفظلك هذوك اليدين
اختي اكثر مواضيعك لقيتها محذوفة المحتوى
ممكن تعاودي تحمليها لو سمحتي لانها كنز خسارة تتحذف
خاصة قاطو نوقا المناديل رووووووووعة

أم إناس · 2013-12-15, 20:12

ماشاء الله طومه تحلية تهبل بصحتك وكلش روووووووووعه يعطيك الصحه

بشرى2008 · 2013-12-15, 20:34

ممممم يعطيك الصحة

فايزة44 · 2013-12-15, 20:49

اممممممممممممممممممممم موسوعة حبيبتي الله يبارك وننتظر جديدك بفارغ الصصصصصصصبر حبيبتي

وين راه ايمان والله توحششششتها قولها ادخلي لا نجيك بالبشماق ههههههههههههه