القريوش من مطبخ وفااااااااااااء

منارة الوفاء · 2013-01-10, 22:49

السلام عليكم ورحمة الله تعالى وبركاته

اليوم راني نويت نمدلكم وصفة القريوش وهي الوصفة الي نعتمدها منذ مدة طويلة وأكيد منغيرهاش لأن كل من يذوقو يسألني على الوصفة تالمو يجي بنين وهش ونشكر بالمناسبة طاطا منزولة حبيبة قلبي وكل ناس تيارت لأنها علمتهولي وخلاتني نكون مميزة بعمل هته الوصفة
حلوى القريوش

المقادير:
العجينة:
500غ فرينة
ملعقة قهوة سكر
فانيلا
قرصة ملح
صفار بيضة
كيس خميرة حلويات
سمن ذايب مايعادل 3ملاعق أكل
ماء الزهر + ماء
للتزيين:
عسل
جنجلان محمص

طريقة التحضير:
في قصعة نحطو الفرينة +السكر+ الفانيلا+الملح+خميرة الحلويات+صفار البيضة ونخلط كل المقادير
بعدها نضيف السمن الذائب ونحاول فركه بكف اليد جيدا حتى حتى تتشربه الفرينة
بعدها نرش الخليط بمزيج من ماء الزهر وماء ونخلط باليد من دون العجن أو الدلك يعني نلمو العجينة بأطراف الأصابع فقط حتى الحصول على عجينة متماسكة
نترك العجينة ترتاح مدة ساعة كاملة وهذا أمر ضروري لابد منه
بعدها نقوم بتشكيل القريوش حسب الرغبة بحيث أنه لكل منا طريقته الخاصة
بعد ذلك يتم قليه في الزيت ويحبذ ترك لونه أصفر ذهبي يعني منحمروهش حتى يولي مجمر
بعد قلية نقوم بتعسيله بعسل دافئ وتزيينه برشة من الجنجلان المحمص

وأترككم الآن مع الصور آسفة لردائتها نوعا ما
هنا قبل منشكلو أنا منستعمل الطابع وانما نقسم العجينة بالجريورة

هنا كي شكلتو حبيت نوضح الطريقة بالصور لكن للأسف كنت وحدي فالدار يعني منقدرش انشكل وفي نفس الوقت نصور آآآآآآآآآسفة ان شاء الله نحط الطريقة امبعد

وهنا كي عسلتو وحطيتو فالسنيوة

صورة أقرب

نتمنى تعجبكم الوصفة وتجربوها لأنها فعلا وتحياتي للجميع

oum anas 69 · 2013-01-11, 11:49

waaaaaaaaaaaw hayal okhti ya3tik asaha ani dittt plat hhhhhhhh

أم ماجد · 2013-01-11, 12:35

اريد تجريبها وضحي اكثر كمية السمن

الصوامعية · 2013-01-11, 13:30

يعطيك الصحة عجبتني طريقة التشكيل كاش نهار نجربها

سلمى البوسعادية · 2013-01-11, 13:47

يعطيك الصحة

طائر النورس مغتربة · 2013-01-11, 13:53

مشكورة اختي فقط بنسبة للسمن راكي متاكدة

ام ياسين187 · 2013-01-11, 13:57

هذا قريووش و عليه لكلام ... يعطيك الصحة يا لفحلة ... بصح قوليلي مافيها لا آلة اللي تحل لعجين لا والو غير بالورااق ????

منارة الوفاء · 2013-01-11, 15:04

QUOTE=oum anas 69;12688720]waaaaaaaaaaaw hayal okhti ya3tik asaha ani dittt plat hhhhhhhh

/QUOTE]
بصحتك البلا ماشي خسارة فيك حبيبتي

اقتباس:

المشاركة الأصلية كتبت بواسطة أم ماجد

اريد تجريبها وضحي اكثر كمية السمن

أسعدني مرورك كثيرا يا أم ماجد ان شاء الله تجربيها وتنجحي فيها
بالنسبة للسمن أنا مضارية نعبر السمن وهو جامد ندير قيس 2مغارف كبار ونصف امبعد انذوبهم وهاد المرة درت كمية كبيرة ونسيت نكيل السمن قبل منذوبو واعليها استعملتو ذايب ودرت3 ملاعق عشاء وانتي كي اديريه تعرفي اذا ديريه كامل والا تنقصي منو راكي عارف كاين فرينة الي تشرب اليدام وكاين الي متشربش
أنا استعملت فرينة سفينة وسمن المرجان
تجربة موفقة ان شاء الله حبيبتي

اقتباس:

المشاركة الأصلية كتبت بواسطة الصوامعية

يعطيك الصحة عجبتني طريقة التشكيل كاش نهار نجربها

حقا الشكل جميل و أجمل مافيه أن الطريقة جد عملية وبيها تجي الحبة مقادرة ماكبيرة ما صغيرة وقياس المربع 8سم ومابين الفتحات 2 سم وعدد الفتحات 3 وهي مبينة في الصورة
تقبلي تحياتي فقد أسعدني مرورك كثيرا حبيبتي

اقتباس:

المشاركة الأصلية كتبت بواسطة سلمى البوسعادية

يعطيك الصحة

الله يسلمك حبيبتي

اقتباس:

المشاركة الأصلية كتبت بواسطة طائر النورس مغتربة

مشكورة اختي فقط بنسبة للسمن راكي متاكدة

و الشكر موصول لك أيضا حبيبتي أسعدني مرورك
ولكن ماقصدك من تأكدي بخصوص مقدار السمن جاك بزاف والا جاك قليل,؟,
أنا كيما سبقلي وقلت لأم ماجد فالحق كنت نعبر السمن وهو جامد قبل منذوبو ونستعملو مباشرة
وهاد المرة درت كمية كبيرة لأنو قدمتو هدية لصديقتي باش تسربيه فالسبوع اديالها وعليها دويت السمن ولما بديت نخدم فالعجينة خذيت مقدار 3ملاعق أكل وقلت ندير 2 ونصف ونشوف لانزيد والنصف والا مانزيدوش وفالأخير زدتو
وراني درت الوصفة قيس 2كغ فرينة ورونت كل رطل وحدو واستعملت نفس المقادير في كل مرة دون زيادة أو نقصان
وأي استفسار راني هنا حبيبتي
تقبلي تحياتي

اقتباس:

المشاركة الأصلية كتبت بواسطة fati-es

هذا قريووش و عليه لكلام ... يعطيك الصحة يا لفحلة ... بصح قوليلي مافيها لا آلة اللي تحل لعجين لا والو غير بالورااق ????

الله يسلمك حبيبتي
راكي فكرتيني فالآلة الي تحل العجينة لبارح كنت عيانة نسيت مكتبتهاش
أنا نستعملها ونحل العجينة فالرقم 5 ونشكل القريوش اديالي وللعلم الآلة انتاعي قديمة تحبس عند رقم 6
بصح كل وحدة و الألة اديالها المهم متكونش العجينة خشينة باش ميجيش ثقيل وماتكونش رقيقة باش مايجيش مقرمش
لأنو عند القليان ينتفخ وتجي فيه فقاعات وان أمكن القول يجي فاااااااااااااااااااااارغ في الوسط عليها يجي خفيف
ان شاء الله نكون كملتلك الفكرة المتعلقة بالعمل