كل وحدة تدخل و تحط سر من اسرار الطبخ ولها جزيل الشكر

[chedni]

مشكورين اخواتي على هذه المعلومات المفيدة ومشكورة صاحبة الموضوع
أما عن السر: لكي يجيك قاطو صابلي طري ويذوب في الفم زيدي مع الفرينة كاس مايزينة دائما ولما طيبيه في الفرن خليه يصفار برك ولما يكون سخون ديريه في بسينة صغيرة أوة كسكاس وغطيه بساشي حتى يبرد زينيه مثلا إذا إستعملتي الشوكولا خليها حتى تنشف ومن بعد دسيه في علبة وأغلقي عليه يبقا طري وكل ما طول يزيد يطرا ويبنان .هذا سر القاطو نتاعنا في الدار سر تعلمتو من أمي كل ماجي وحدة عندنا تقوللنا قاطوكم سامبل بصح يذوب في الفم ونزيدلكم ما تضيفوش لقاطو صابلي الحليب يجي يابس ولا الماء غير بالبيض والزبدة غير مذابة نصيحة تهمكم بزاف راني قلتهالكم غير نتوما .أدعولي برك .مع السلامة .

[mounira titi]

موضوع مفيد مشكورة اختي عليه و كل من شاركت معك فيه .
اما سر من عند امي العزيزة هو ان لا نقلي لحم البقري بل نقلي البصل و ما معه ثم ارمي اللحم و مباشرة امرق بالماء و هدا لا يجعلها شارفة كما نقول يعني لا تطيب جيدا و تنشف .
و السر التاني هو غسل الدوارة بماء ساخن ولمصارن لخشان من تلك المادة الملساء بالملح و احك جيدا ثم بالماء و اعيد عدة مرات حتي ازالته تماما.

[وردة زمن]

انا عندي سر سمعتو من السيدة رزقي ان كي نغليو الشوفلور في الماء نتجنبو مانغطيوهش باش ما يصفارش
وثاني نصيحة من جونقومة او في مسلسل جوهرة القصر عند وجود رائحة غير مرغوب فيها في المرق مثال رائحة اللحم المجمد لمدة طويلة نضيف له ملعقة او اكثر بقليل من الخل
وهاذي من عندي اللحم والا الحمص الا كونت مزروبة باش نطيبو نزيدلو شويا خميرة القاطو راهي مضمونة

[wala]

السلام عليكم نفور الخضر فى السكاس انا اضع الخضر مقطعة صغيرة حتى جلبانة لى نستعملها فى المسفوف وتكونى مزروبة ضعيها فى صحن حديد وضعيه فى حمام مائى داخل الكوكوت شكرا جزيلا اخواتى على المعلومات ربى يجعلها فى ميزان الحسنات

[m_bendjeddou]

كي تجيكم الشربة حامضة من الطماطم ظيفي القليل من الحليب

[fifyana]

سلام عليكم
اليكم مشاركتي المتواضعة
كي طيبي كا حاجة وتجيك مزيته حطي فيها دنجال ني مقطع على ربعة تمتص كل الزيت الزائد تقبلو تحياتي

[ام ظافر]

لما تغسلي الدجاج وتقطعيه وينشف قبل ما تحطيه في اكياس وتخبيه ذري عليه شمة ملح + شمة فلفل اسود + شمة سكنجبير + شمة قصبر مرحي + شمة كروية وخلطي مليح ومن بعدها خبيه في المجمد لما تطبخي بيه تحسي بالفرق في الطعم واختفاء الرائحة المزعجة تاع الدجاج والزفرة تاعو

[wala]

السلام علكم شكرا فيفيان على فكرة شرب الزيت لان زوجى معقد من اليدام وهل البنة ماتجيش فى الماكلة تع التنجال واشكر اخت ام ضافر على التتبيلة ربى يجازيكم

[الخامسية]

راه وقت الليمون استغلي الفرصة قبل ما يغلى و وجديه لرمضان
1 - رابي حبات الليمون وعمري الزست في علب صغيرة
2- اعصري الحبات و املئي قوالب لاقلاس الي يجو مع الثلاجة مين نشروها . لما تجمد انزعي القطع المتحصل عليها وخزنيها في كيس و بالتالي تستطعين الاستعمال بالقطعة في كل مرة .
3 - حبات الليمون الي بقات ( وراهي معصورة ) ما ترميهاش ضعيها في كيس ودريها في المجمد تستطعين استعمالها عندما تغلي الشوفلار او الزيتون تمد لهم بنة شابة .

[algeriana-31]

السلام عليكم
شكرا لكم على هذا الموضوع المفيد وشكرا لكل من قدمت نصيحة
عندي عفسة خاصة بالوبيا والباقوليات بصفة عامة لما تنسي ما تنفخيهاش(أي ما تبيتيهاش فالماء) كي تديريها تطيب ديري في الكوكوت مغرف(مغرف تاع اينوكس) وغلقي الكوكوت راها تطيب بلخف عن تجربة جربتها البارح وناجحة 100%

[ام طيب]

لنجاح اطباقكمممم اذكر الله بقولكن بسم الله على بركة الله

[ransie.joisse]

بارك الله فيك أختي على الموضوع
انا كي نولي رايحة نعجن المطلوع نخلط الدقيق مع الفرينة <الفرينة تكون اكثر> نعرك شوية ونبعد نحط فوق العجينة صحن كبير من الحديد كاين اللي يقلو الليان يعني شغل بسينة من الحديد وتكوني سخنتي مليح طاجين المطلوع<يعني ديريه فوق النار قدام لاتبداي> وحطيه فوق الصحن الكبير اللي كنتي كبيتيه فوق العجينة مدة 10 دقائق<هاذ الصحن الكبير او الليان عندو بزاف وهو عندي يعني من حوايج بكري منعرف اذاكانو يتباعو ضرك>
رايح يخمر العجينة مليح
ونبعد كي يخمر عاودي اعركيه شوية وديري كما مالفة كي تكملي وديري قرصات فوق بعضاهم 4او5
غطيهم وحطيهم في الفرن <الكوشة> من الاسفل والشباك الفوقاني اللي في الوسط ديري فيه طاجين المطلوع يكون سخون ماشي بزاف وكري العملية مرة او اثنين يطلعلك المطلوع بالخف ويجي مطلوع هليل ان شاء الله
ملاحظة: الطاجين اللي ديريه في الكوشة ميكونش سخون بزاف باه ميلصقوش القرصات في بعضاهم وهذا سر يخلي المطلوع خفيف ويطلع بالخف
آسفة على الاطالة

[شموخ امرأة]

بارك الله فيكن ان حاب نقول 2 اسرار السر الاول قشري الثوم كمية لاباس بها وحطيه في قارورة زديل الزيت ضعيه في الثلاجة باه متعفنش وكل ماحبيتي تقلي من زيت الثوم من جهة اقتصادي و من جهة اخرى ميديلكش الوقت عند كل طبخ والسر الثاني كي تهبي تكونجلى الجلبان غليه 5دقائق في الماء سخون ومن بعد مباشرتا ماء بار

[wala]

السلام عليكم حبيت نسال على ليان اى تحطيه فوق العجين وهو ساخن والطاجين تحطيه سخون تحت رف الخبز باش يخمر ولا كيفاش شكرا على المعلومة

[ريحان الجزائر]

السلام عليكم و رحمة الله و بركاته موضوع رائع و كلنا نتعلمو منو أنا السر لي راهو في بالي الآن هو أنك لما تقشري البرتقال لا ترمي القشور و حطيهم فوق الفرن لي يسخن المنزل راهم يطلقو ريحة هاااااااايلة في المنزل و لما ييبسو أرجيهم و خبيهم و لما ديري القاطو ضيفيه مع الفرينة و خااااااااااصة لمبرجا لي راهو جاي وقتها لأن كامل الناس يحبو يديروها في الربيع و تجي بزاف بنينة ماما جربتها أمالا من اليوم ماترميوش قشور البرتقال تقبلو مروري