مشكلتي

[مشكلتي]

السلام عليكم
أولا أريد أن أشكر جميع مشاركي هذا القسم لنصائحهم القيمة لكل من تواجهه مشكلة صغيرة أم كبيرة
أنا حبيت نشاركمم بمشكلتي لأنه عندي ثقة فيكم
أنا مشكلتي هي مع أختي الوحيدة ..
أنا حزينة وقلقانة عليها بزاف أكتر من هي تقلق على روحها
أختي للأسف شخصيتها ضعيفة وما عندهاش ثقة في نفسها وحساسة جدا
وهاذ الشخصية تبنات من صغرها ، كانت معلمتها تضربها وتظلمها خاطر واحدة من معريفتنا تكرهنا وتحرش المعلمة على اختي ، واختي ماكانتش تقول لماما حتى كبرت باه حكات القصة ، والظلم تا ع المعلمة خلا اختي ضعيفة في شخصيتها وفي دراستها كانت دايما تجيب نقاط ضعيفة حتى البنات كانو يحقروها كي شافو المعلمة تاعها معاها هكاك يعني كانت منبوذة من الجميع ، حتى من العائلة ، لأنهم كانوا يقيسو مستوى العبد بمستواه الدراسي ، وماما كانت متعرفش تتعامل مع الوضع وكي تشوفها ما تقراش مليح توبخها ، مش كرها فيها ، لا لان عايلتنا تهمهم الدراسة والنقاط الجيدة فقط الله يهديهم .. كبرت أختي بهاد الشخصية ما عندهاش ثقة في نفسها وما تقدرش تعبر على رايها ابدا ، خصوصا كي شافتنا حنا اخوتها نجحنا في دراستنا ووصلنا للجامعة وهي لالا ، كانت تحس روحها ما عندها حتى معنى بيناتنا ، هي ماكانتش تهدر كان كلش مخبي في قلبها لكن انا كنت نحس بكل شئ ، وبالرغم من محبتي لأختي الكبيرة وبرغم معزتها عندي ما كنتش نقدر نواسيها ولا نطلعلها المورال ، كي شغل بيناتنا حدود ، كنت دايما الحب تاعي ليها نبينو كره لا ادري لماذا ، المهم درك كبرنا وانا تزوجت الحمد لله وهي مازالت وبدات هاديك الحدود تتنحى بالشوية وبدات اختي تنفتح على المجتمع شوية ، وولات تحكيلنا واش صرالها كامل في صغرها انا تغيضني بزااااااف ، وماما تولي تبكي ، تقوللها علاه ما كنتيش تحكيلي ..
اختي درك كون يقوللها بابا ولا ماما كلمة مش مليحة تبكي خصك يا كاش ما يقولولها تا عبرا ، انا قلتلها بطلي الحساسية هادي بزاااف هادو والديك مش رايحين يحبولك الشر ، قاتلي انا هكا نحقر روحي ، ما لقيت ما ندير معاها ، مثلا انا كون يقولولي واش يقولولي والديا ما نبكيش العكس نرجعها ضحكة ، ويكون في علمكم انو بابا وماما ينشعوني بطريقة أقسى من ينشعو بيها اختي لكن انا عندي عادي مهما كانت النشعة كبيرة نرجعها صغيييرة لانهم والديا وهي تتحسس وترجعها كبيرة ، وبالتالي يبانلها كلي راهم ينشعوها غير هي وتحس بلي والديا يفرقو بيناتنا ويحبوني انا واخواتاتي اكتر منها ، وهو العكس والله عزيزة عليهم هي اكتر منا كامل ، انا والله غير حابة نعاون ختي بأي طريقة ، حابتها تولي عندها سقة كبيرة في نفسها ، وحابتها تولي عندها شخصية قوية باه ما تحسش بالنقص في روحها وما تحسش روحها بلي زيادة ، على الأقل لاكان جابلها ربي مكتوبها ان شاء الله ما يحقروهاش هوما تاني كي يشوفوها ضعيفة .. وتاني نحب نوصل لختي بلي راني نحبها بزااف ونتمنالها كل خير ونتمنالها تعيش أحسن عيشة وأيضا نتمنى تعيش أحسن مني .. والله معزتها في قلبي كبيرة بصح عمري لا وصلتها مشاعري حابتها تولي صديقتي ، وهي تاني تحبني بزااف ... هيا يا الإخوة عاونوني بكاش أفكار نساعد بيهم ختي بلا ما تفيقلي نزيد نجرحها وشكرا ليكم كامل

[اﻻء الرحمن]

بالحوار اختي تقربي اليها وتكلمي معها في مختلف المواضيع وشجعيهادائما حتى ولوفعلت شيء صغير فهذا يزيدها ثقة بنفسها اكثر

[أم شروفة]

اختك حساسة.بينيلها قداش تحبيها.اذا سافرتي اشريلها شيئ وقلها غير شفتو تفكرتك هاذي الاشياء تزيدلها الثقة باللي راكم تحبوها

[نورسين.داية]

السلام عليكم

لما أسستي أنه ممكن الشخص الذي سوف ترتبط به قد يحتقرها ...........

أنتي لا تعلمين و الله في الواقع كاين رجال .....حتى تستغربي ...ممكن يتلائم مع عقليتها ....واش تعرفي ........؟؟؟

صدقيني في الزواج كل إنسان ربي يكافؤه على حسب نيته التي أسسها أو بناها من الأول ......و هذا واقع ......

بعد زواجها في حال ظهر العكس ، ماعليش قدمي لها دروس خصوصية .....بالداتاشو
وفقي الله

[نارينا]

اختك طغت صفة الحساسية فيها عن كل صفاتها الايجابية الاخرى ,,,,,فتشو عن الصفات الايجابية واثنو عليها ,,,,واجعلوها تشارككم الرأي والمسؤولية ولا تهمشوها مجددا ,,,حاولوا تتمسخروا معاها وتتشابكوا معاها حتى بالضحك بش تحس انها انسان عادي و,,يقدر يلعب,,,يضحك,,,

[djazia87holi]

والله يا اختي غير حركتي المشاعر بداخلي لاني اعرف شخص يعاني نفس المشكل نتاع اختك واذا بينا نسيبو الحل ان شاء الله