اخت زوجي

[مشكلتي]

السلام عليكم
عندي مشكلة انه اخت زوجي في كل مرة تتخطب وكي تكون مخطوبة تهدر مع رجال اخرين في الهاتف نقصد الخيانة
وبعد تبطل وفي كل مرة يقولو راه هو اللي بطل منهم زوج بطلو لانهم فاقو بيها تهدر في الهاتف واحد فاميلتي والثاني جارهم سمعتها تهدر معاه بعد مابطلت قالتله راه بابا هدر مع باباك وقالو اذا مش عاجباتو يقول بصح مايخمجهاش
والثالث لحد الان ماحبوش يقولو علاه بطل والرابع اللي خاطبها درك وعقد عليها وهي درك راهي كي عادتها تهدر مع صحابها
المشكل انه زوجي منصبه حساس وهي اللي خاطبها شاوي مقفول كون يلقاها تهدر مع كاش واحد اكيد انه راح يقتلها
هدرت مع امها وقلتلها لازم تبطل صنعتها هاذي قالتلي بلي قبل كانت تهدر لانها مشي حابتهم بصح هذا لا قلتلها مادام تسمت لراجل خلاص ممنوع انها تحكي مع واحد اخر
والمرة كي رحتلهم قالتلي سلفتي بلي راهي تهدر وقالتلي مالقيت ماندير لانه لازم نغيرو في المنكر
واش رايكم نشوف كيفاه نوصلها لراجلي باش نهار اخر اذا حكمها راجلها مايدخلش روحو لانه اذا دخل روحو راح راح نولو في حوايج اخرى وراجلي منصبه حساس اي حاجة قادرة تاثرلو على خدمتو وانا مانيش متقبلة باه تخرب داري على جالها وراجلي كلش كلش ولا خدمته لانه كون يتعرض لاي مشكلة قادرة خبزته طير
وااااش ندير باه تتزير قبل ماتتزوج زيطيح الفاس في الراس

[* الحلم سكر *]

للاسف امثالها كرهونا في الزواج و خلت الرجال ماشي واثقين حتى في واحدة
يا انا مرا و مخي حبس واحدة عاشقة في واحد متزوج ...؟؟؟ واحدة مخطوبة وعايشة غراميات و افلام تركية.... و واحدة متزوجة و ما زالت ما نساتش روميو .......... و الله ربي يسترنا

هادي المفروض امها لي توقفها عند حدها ماشي تزيد تلقالها عذر و قال الخطيب الاول و 2 3 ماشي حابتهم امالا شكون ضربها على يدها و قالها تخطبي ؟؟؟؟؟ لا و الرابع ؟؟؟
سبحان الله هذا اذا ما فاقتش راح يبتليها ربي سبحانه بشبيـه ليها و راح تتذكر لي داراتو الكل

اما انتي اختي و الله بصراحة حرت في بلاصتك اذا عندك وسائل اخرى يفضل انك مـاتدخليش مباشرة اما اذا الموضوع راح ياخذ منحى اخر و راح يطور الى ما لا يحمد عقباه تدخلي او لمحي لزوجك خليه هو يراقبها و يكتشف وحدو حرام الراجل لي خاطبها

ربي يهديها هذا ما نقول
ربي يوفقك للصواب و يحفظ زوجك ودارك و ان شاء الله ما يصيبو حتى شر

[فـرح]

اخااااه البنات هبلو هادي كل من التربية اللي ماكانش امها تشوف فيها قدامها مرتبطة وتخون في راجلها وتقول حابتو واش رايحة ندير
يا اختي كون حكيتي مع راجلك يوقف اختو عند حدها ويربيها ولا يبطلها خلاص من هاداك الراجل خاطر ما يستهلهاش وماهيش صاينتو والله ماهو مليح الخدع

[sarra5]

اهدري انت معاها ولكان ماسمعتلكش ثولي لراجلك باه يوقفها عند حدها

هذخ ماش تربية خلاص وحرام عليها تخون في واحد ناويها للحلال مع واحد يوقت معاها برك

[أم شروفة]

يا أختي الموضوع لا ناقة ولا جمل لكي فيه.انسحبي من الموضوع وإلا وجدت نفسك في بيت أبوكي

[سلاف26]

الظاهر أنها أصبحت مدمنة و التغيير لازم يكون من قناعتها هي أرى أن تكلميها و تنصحيها بالتي هي أحسن فهمت صحة ما فهمتش الله يسهل عليها لا تقحمي نفسك بما أن أمها تعرف بالموضوع الله يسهل عليهم كل واحد يتعلق من عرقوبو
و الله يهديها و يصلحها

[محمد جديدي التبسي]

أنت ماكش ساكنة معاهم ما تحوسيش عليها ادعيلها بالهداية وخلاص
سلفتك تتكفل بيها وتنصحها وتشوف كاش طريقة أما أنت خليك مع دارك وراجلك وبعدي على المشاكل
لأنو النساء ديما بينكم حساسيات وممكن تولي في مشاكل مع زوجك فحذاري

[نورسين.داية]

السلام عليكم

أختي ماعليش سؤال : ماذا تقصدين بشاوي مقفول ......................؟؟؟؟ ...

عموما تمنيت لو وضحتي العلاقة بين عمل زوجك و تصرف أخته .....يعني مثلا في عمله يحاسبوه على تصرفات عائلته ...مثلا ؟؟؟

عموما شخصيا لوكنت مكانك .....الله إسهل عليها .........الناس لم يتدخلوا و ما سلكوش خاصني غير ندخل فيها ........ والدتها على علم بها .........و للكعبة رب يحميها
نصيحتي خطيك

[سماح 26]

هذه نتائج المسلسلات التركية والهندية والمصرية
ولك اختي جبدي روحك هذا امر مايخصشك خليك بعيدة على الموضوع أحسن وهذا لصالحك
والظاهر راكي خايفة على خبزتك لاتروح ماشي خايفة على اخته
حدك تدعيلها ربي يهديها (يمهل ولا يهمل)

[sarl02]

واش هذا الريح الي اضرب يا جماعة ...فتنة كبيرة وما يسلكلها غير طويل العمر ..ان شاء الله ربي اثبتنا .

[sarl02]

المشاركة الأصلية كتبت بواسطة نورسين.داية

السلام عليكم

أختي ماعليش سؤال : ماذا تقصدين بشاوي مقفول ......................؟؟؟؟ ...

عموما تمنيت لو وضحتي العلاقة بين عمل زوجك و تصرف أخته .....يعني مثلا في عمله يحاسبوه على تصرفات عائلته ...مثلا ؟؟؟

عموما شخصيا لوكنت مكانك .....الله إسهل عليها .........الناس لم يتدخلوا و ما سلكوش خاصني غير ندخل فيها ........ والدتها على علم بها .........و للكعبة رب يحميها
نصيحتي خطيك

وقيلا حابة اتعاودلك تاع سلال هذه...

[OM RITA]

يا اختى هدا الشئ لي راه يخرب في البيوت ويفرق بين الزوج والزوجه الله يحرق البرتابل والنهار لي اخترعوه

[رحمة من المولى]

المشاركة الأصلية كتبت بواسطة أم شروفة

يا أختي الموضوع لا ناقة ولا جمل لكي فيه.انسحبي من الموضوع وإلا وجدت نفسك في بيت أبوكي

بارك الله فيك
خطبني واحد بصح مكتبش المكتوب متفهمناش على كل حال تزوج ربي يفرحو و يهنيه الفترة اللي كان يخطب فيا العروسة ديالنا بعثت لدارهم قالتلهم متسواش // يعني انا ثان نهدر مع الرجال؟؟؟؟؟/ و ديرو في بالكم كنت نكسيها كالبهلولة و دايرتلها مبلغ كل شهر بلا والو لاني بهلولة و ......... حاشاكم مقدرت نكتبها قدر ليكم. قولو راها تمنن ايه لانو خير ماشي في بلاصتو كنت عمية و الثانية بعثتلهم قالتلهم عندي بنت اختي هههههههههه
الله يهديكم زعما بلخف دخلتو لديار و ليتو تحب لاخوات زوجكم الخير يصدقوكم اللي مجربوكمش لوكان جات اختك تحكي عليها بالعكس انت تدسي عليها هذا ايلا كانت الحكاية صح. الله يهديكم و ان شاء الله ما يكونش بطلو منها اللولين من خدايمكم ربي كاين يمهل و لا يهمل

[ام قسوم]

اختى بالامس رديت عليك و النت حلف لا تفوت وكان راى من راى الاخ محمد

ابعد عن الشر وغنيلو واللى عليك عملتيه


اما الاخت اللى سقسات على كلمة الشاوي مقفول قصدها في موضوع الشرف ما يستعرفش حتى بعذر ويكون تصرفه كارثة

لانو الشاوية الاحرار معروفين بالرجلةواسمحيلي رديت في بلاصتك

[حورية38]

واعلاش عليك اختي هي ادا الموضوع صحيح راهي خيانة لنفسها قبل الراجل ولتربيتها قبل نفسها وعلاش كامل هاد الشيء ............ اما ان تطرحي الموضوع فانت قلتي ليماها ومادام ماراكيش ساكنة معاهم فهنا انتهت مهمتك والا سوف تكون العواقب وخيمة وانا عن نفسي نشوف فيك خايفة على خبزة راجلك ماشي على البنت والا كنت نصحتها كاخت لك وهدا شرف ماشي بالساهل نحكو فيه ادعيلها ربي يهديها وخلاص
وادا شاوي مقفل انا نقول سيد الرجال من صان شرفه وادا غلطت وهي واعية وما قبلتش النصيحة انا ه شاوي مقفل ولا واحد قابلها بواش فيها على خاطر خوها منصبه حساس اسفة على الكلام لي قلتو لكن لكل رايه الخاص /// انا ماني شاوية منعرفهم لكن اعتز بالجزائري وهو غيور على شرفه// ربي يهديها