تشكيلة من المقبلات ......بسيطة وسهلة ..من مطبخي

[اسمهان79]

السلام عليكم ورحمة الله وبركاته
حبيباتي واخواتي الكريمات وصفاتي بسيطة وممكن الكثير يعرفها لكن اكيد معانا مبتدئات راهم يتعلمو باه يخرجو ربات بيوت من الدرجة الاولى
كلنا اليد في اليد واللي تعرف حاجة ما تبخلش بيها ولو كانت في نضرها هي بسيطة اكيد كاين اللي ما يعرفهاش
واجركم عند الله كبير
بسم الله

اقراص البيض ورولي الفرماج

قطعي راس فلفل مكعبات حار حبة طماطم مربعات صغار دبشة ونصف حبة بصل
كسري حبة بيض في مقلا ما تلصقش ومدهونة بالزيت ثم ضعي شوية من الخليط اللي وجدتي وذرذري الملح والفلفل الاسود والثوم بودرة وغطي وخليها دقائق فقط ونحي اكلة ساهلة وسريعة وبنينة وااااااااااو

قدميهم مع شرائح الفرماج المحشي

الطريقة
خذي بلا فرشيه بورق الطهي وفرغي فرماج مرحي على شكل دوائر ودخليه الفرن دقائق فقط ونحي وخليه لحظات يحكم روحو ثم حطي على الجنب الحشوة واللي هي

خيار مرابي (مبشور) ملعقة صغيرة مايونيز طن نتاع الزيت واكيد معصور من الزيت نتاعو معدنوس مقطع نصف حبة طماطم مقطعة مربعات فلفل اسود ثم لفي على الحشوة الفرماج مثل الصورة

العملية سهلة خلاص وفي نفس الوقت مقبلة باهية وبنينة وزيني بخطوط المايونيز ونقاط من الكاتشب او الهريسة
ان هنا قدمت معاهم مرقاز مشوي وبطاطا وبيض انجان مقليين ومعاهم بيض اوملات مزين بالفرماج شرائح طبق كامل متكامل هههههههه بها وبنه
قوارب محشية الله عليها

في هاذ الوصفة متعودة نعمل بات بريزي والل هي
او بات عادية وهي 125غ زبدة تخدميها مليح بيدك ثم ذرة ملح بيضة ملعقة ماء ولمي بالفرينة اطرحيها في القوالب وتطيبيهم
لكن هاذ المرة قلت نجرب بلابات نتاع الهام اللي بالزيت وصراحتاً خرجت روعةةةةةة وزيد اقتصادية وتخرج بزاف جربوها ومش رايحين تندمو
هو ليكم الرابط وشكرا الهام وصفاتك كلها ما شاء الله

https://www.djelfa.info/vb/showthread.php?t=1552924
بعد ما تواجدي القوارب روحي للحشوة واللي هي
2 بيضات مغليين ومرابيين طن نتاع الزيت مقطر من الزيت نتاعو معدنوس كورنيشو مقطع رقيق فلفل مرقد ايضاً مقطع رقيق زيتون اخضر مقطع حلقات زيتون اسود مقطع رقيق مايونيز فرماج طري وغير شوية فينيقرات خلطي كلش مع بعض وعمري القوارب نتاوعك مليح وزينيهم بوريقات نعناع وشوية جبن شرائح وفقط

ساهلة باهية وبنينة ههههههههه

قدميها مع الشربة او لحريرة وتناسب الضياف
نتمنى جربيها اسهل منها ما فيش

مقبلة ليكورني باللحم المرحي








لحم مرحي تبليه بالثوم والملح والفلفل الأسود ولفاح الزنجبيل توابل الكاري شوية بصل هريسة موطارد شوية خل دبشة او معدنوس المتوفر عندك صفار بيضة فلفل احمر مرحي شوية نشاء خلطي مليح ثم شكلي كورنيات بمساعدة الكورنيات اللي نستعملوهم في الحلويات ثم نرمدهم في الفرينة ونقليهم

نحيهم من الكورنيات
وجدي الحشوة نتاعك واللي هو
كمية من الطن نتاع الزيت اكيد نفرغوه من الزيت نتاعو فرماج مثلثات نتاع لافاش كيري. شوية زيتون اسود وزيتون اخضر مقطع رقيق مايونيز معدنوس و2 بيضات مغليين ومرابيين نخلط الحشوة غير بالأصابع

ثم نعمر لي كورني نتاوعي غير بالشوية ثم نرمد من فوق في شوية بيض مرابي ومعاه زيتون اسود وأخضر مقطع رقيق

وقدميهم كمقبلة بنينة وباهية نفس الحشو ممكن تعملي بيه البيض مغلي ومقسومة على زوج
ملاحظة
كنت متعودة ندير في الحشوة الفلفل المرقد الحار مقطع رقيق يمدو واحد البنة تقتتتتتتتتتتتتل هنا كان ما عنديش في الدار علابيها ما درتوش
لي كراب. باللحم المرحي والدجاج

وجدي ليكراب نتاوعك بخلط 3 بيضات ملح فلفل اسود زنجبيل ثوم بودرة لفاح ملعقة زيت والفرينة ونخلط مليح بالباتور ونحطو في الثلاجة لمدة ساعة من بعد خذي مقلا خاصة بلي كراب ادهنيها بالزبدة وسخنيها ثم فرغي بالمغرف وحركي المقلا باه تأخذ شكل قرصة كبيرة كي تشوفيها نشفت اقلبيها ثم نحي كرري العملية حتى تخلصي الكمية اللي عندك خليهم بجيه
وجودي الحشوة واللي هو في مقلا حطي شوية لحم مرحي وكمية من صدر الدجاج مرحي قليهم مليح في شوية زيت وما تنسايش تبليهم بالملح والفلفل الأسود ولفاح والثوم
حطي حبات ليكراب وحدة بجنب واحدة كيما في الصورة يعني واحدة فوق واحدة غير بالجنب ثم ادهني بلا موطارد او جبن طري او بيشاميل او مايونيز كيما تحبي وعمري السطح باللحم اللي وجدتي من قبل وحطي شوية فرماج طري او فرماج رابي

ولفي كيما ديري بيسكوي رولي قطعي حلقات شوية عراض بموس ماضي وتحطيهم بهاذ الشكل في مول وحطي فوقهم فرماج رابي ودخليهم الفور دقائق فقط

وقدميهم بالصحة على قلوبكم
بولات الأرز المحشوة

غلي كمية من الأرز في ماء وملح وفلفل اسود وشوية زيت ثم قطريه مليح من الماء نتاعو او ديريه في شاش واعصريه من بعد ارحيه في الروبو

وجديله الحشوة نتاعو
طماطم حب مقطعة كاريات زيتون اخضر مقطع حلقات دبشة مقطعة ثوم شوية بصل مرحي ملح فلفل اسود زنجبيل لفاح فلفل احمر شوية طماطم مصبرة هريسة كمون شوية موطارد وزيت نخلط كلش مع بعض ونطيب على نار ذليلة يمكن تضيفي واش حبيتي لحم مرحي دجاج مرحي او كبدة مقطعة رقيق نخليهم يطيبو مليح حتى تنشف
نأخذ كمية من الروز نحط على شكل قرصة ونحط الحشوة في الوسط ونغلق عليها ونعدلها مليح شكل دائري ثم في الفرينة البيض ولاشابلير ونقلي

نقدمهم مع صوص طماطم روعةةةة. اممممممممممم

نتمنى تعجبكم وصفاتي البسيطة

في امان الله حبيباتي