هل انا منحوووسة؟؟

[مشكلتي]

السلام عليكم اخواني اخواتي عيشكم عاونوني
عندي عام زواج من اول يوم زواج مرض زوجي اصبح دائما راسه يوجعو حتى يبكي من سطر و ديما فشلان عيااان و يحب غير يرقد رقينالو و والو
امبعد بدات تنقصلو هاذ الحالة
بصح راه منين رايح يشياااان اللي يشوف كيفاش كان و كيفاش رجع يكذب
وجهو اسوووود من التعب و هو مايدير والو يخدم نورمال
عندو 4 اشهر اصبح يشتكي من معدته و بطنه من اول يوم زواج بطنه يؤلمه
اصبح لا ياكل ولا شيء
كان نوووورمال من نهار تزوج بيا رجع هكذا و ناس كامل راهم يقولو ماربحش عليها دخلوني في دوااامة وليت نتمنى الموت ولا نشوفو هكذا و نحس روحي ديما انا السبب
مع العلم صلاتو مايخليهاش دبما يصلي و يقرا قران
طبيب مافهملو وشبيه
سكانار و ليزاناليز مافيهم والو
شكون يعاوني برقية
رمضان يفطر سلاطة برك و مايتسحرش
و الله راني في عذاب و انا حامل في شهر 8 لاطونسيون تاعي توصلي للموت غير منو كي نشوفو هكذا نتقلق
مايرقدش الليل من سطر يقولي بطني

ناس الخير عاونوني على وجه ربي
مع العلم انا من سطيف كاش راقي تعرفوه
شكرااا

[ايمان4]

ما منحوسة ما والو ممكن مرض نفسي راه عنده مين كلشي نرومال ايه المرض النفسي يدير السطر ... زواجكم عن حب يعني او مدبر؟؟ ممكن الزواج المدبر في بعض الحالات يدير مشاكل للشخص ..
او مستحيل ميكونش هناك سبب يزيد يستشير اطباء ممكن يوجدوله الحل و الله يشافي

[zedoussama]

أسأل الله الكريم رب العرش العظيم أن يشفي زوجك، ويرده اليك سالما غانما، معافى في بدنه وروحه ودينه آمين.
أختي الكريمة، لست لا منحوسة ولا شيئ، وكلام الناس لا يؤخر ولا يقدم في شيئ فلا تلقي له بال
بما أن زوجك تم تشخيص حالته عن الأطباء ولم يظهر عنده أي مرض عضوي فالحمد لله كل الحمد
بقي أنه ربما يكون زوجك يعاني من حالة عين أو مس، أو قد يكون مرض نفسي لا أكثر، خاصة أنك قلت أن حالته هذه بدأت من تاريخ زواجكم.
الشيئ الجميل أن زوجك محافظ على صلاته في وقتها ومداوم للقرآن، فهذا شيئ طيب ولله الحمد
أريد أن أسألك بعض الأسئلة الخاصة عن زوجك، فإن كنت تسمحين بذلك فاتصلي بي على الخاص.
سلام

[احمد الصادق]

اتصلي بابي همام ...قسم الرقية الشرعية بمنتدانا هذا .
طهور ان شاء الله

[zahi_mouaad]

اختي في الله حاولي تعرضيه على طبيب نفسي و يفهم منو الحالة لي راه فيها و اخطيك من كلام الناس وتلهاي براجلك و لازم تكوني صبورة مش متقلقة .... و ربما عدم اكله يكون عندو فقدان للشهية لذا حاولي تشجعيه على ممارسة الرياضة و الاكل الصحي

[om wafaa]

ربي يشافيه ختي وتتحسن الامور بيناتكم مي ممم انا نعرف ناس هكا مي كي ترجعيها لطبيب طبيب مغديش ينفعك بسكو هذا سحر والله يهدي من كان السبب معليش نتي غير ديري لي عليك واصبري ودعي ربي اللهم منزّل الكتاب ومجريَ السحاب هازم الأحزاب شديد العقاب سريع الحساب اللهم احصِ السحرة وأعوانهم عدداً
اللهم احصِ السحرة وأعوانهم عدداً نقولك شوفي كاش راقي يكون مليح يقدر يساعدك منكذبش عليك انا صحبتي باباها هكا مي للحمدو لله مع اتباع الروقات والدواء بالاعشاب راهو مليح دوكا

[mastermaster]

ارقولوا يبرى

[ام رضوان]

السلام عليكم
ربي يشفي زوجك ويفرج كربك يااختي
والله غير قسمتيلي قلبي
ماتقوليش على روحك منحوسة ووكلي ربي على اللي يقول عليك مش مربوحة
رانا في شهر فضيل ادعي ربي يشفيه وماتياسيش من رحمة ربي
وقوليلو يعاود الرقية ويدير الحجامة راهم ملاح
ربي يجبر بخاطرك ويبدل احزانك بالافراح يااااااارب

[غزلانْ]

السلام عليكم
كلا لست بالمنحوسة بل بالفاضلة فلو كانت
امرأة أخرى لما همها أمر زوجها خصوصا
و أنت حامل اذ أنت بحاجة لرعاية فلتحمدي
الله على سلامة تحاليله و عن ألم رأسه
ابحثي عن مختص في الحجامة فهي نافعة
أسأل الله رب العرش العظيم أن يشفيه
وفقك الله

[FELLA BIO]

ربي يشفيه شفاءا عاجلا و يفتح عليكم بيبان الفرج في هذا الشهر الكريم .. لا تتركي الرقية اختي له و لكي و توكيل على الحي الذي لا يموت ..فرجا عاجلا يا رب

[شيماء08]

الرقية خير علاج
طهورا ان شاءالله ��

[محمد ايوب طيب]

أنت لست منحوسة كما تقولين هدا ابتلاء من عند الله فلتصبري ولتحتسب
عليك بالثلت الآخر من الليل فالدعاء مستجاب بأذن الله
أسأل الله الكريم رب العرش العظيم ان يشفيه من كل مرض او عين حاسد
او سحر ساحر او شيطان مارد
اللهم رب الناس ادهب البأس وشفي انت الشافي لا شفاء إلا شفائك شفاء لا يغادر سقما

[قدور بن عاشور]

لا يوجد شيء إسمه نحس، بل هذا تَـطَـيُّـرٌ لا يجوز القول به شرعا.
يوجد كذلك شيء آخر إسمه الفشل في مواجهة المشاكل،
فبدل السعي لحل المشكل نرمي اللوم على الغير
و هو أسهل بكثير من إيجاد الحل...

[kacimo.samy]

السلام عليكم
اعرف راقي اتوه بشخص مريض يحملونه خرج من عنده على ما يرام
ان اردتي اعطيك رقمه ؟؟
وهذا راقي اعرفه جيدا هو مدرس قرأن في المسجد

[زايدي أمحمد]

الامر واضح وضوح الشمس هذا الشخص علاجه يكون عن طريق الرقية