تابع ل "اخو زوجي"

[مشكلتي]

سلام عليكم..اليكم حديد مشكلة " اخو زوجي " المدونة أسفله
والله مازالو يدور بيا والبارح كي قرب الفطور دخل للكوزينة و قال "شكون لي طيب هادا ماشي طياب كامل" وراح. مع العلم انا لي طيبت و الله غادتني عمري بزااااااااااف كيفاش واش درتلو راه يعامل فيا هكدا مع العلم هدا اول رمضان عندهم و قلبي تزير بزاف
واش ندير رايو عليا

[ام رضوان]

السلام عليكم
ربي يكون في عونك
ننصحك اختي
صلي وادعي ربي يكفيك شره ويجعل كيدو في نحرو
واذا قدرتي تخرجي بدارك يكون احسن
ربي يفرج عليك وعلينا وعلى كل مكروب
اميييين

[خالد عنابي]

تكلمي مع عجوزتك او شيخك لكي يتكلمو معه ويضع حدا لتجاوزاته

والا مع الوقت راح تزيد هذه التجاوزات وتولي اكبر واكبر

واذا لم ينفع هذا الحل قولي لزوجك يدبر راسو يكري يشري دار يسلف المهم يدير حل

[ايمان4]

اعود و اكرر هذا راه يحوس يخرجكم من الدار باش تبقاله الدار ليه عندك حلين
الحل الاول تخرجو بداركم يعني تكريو و تهلكو ارواحكم بالمصاريف كرا + ضو + ماء + اكل و اذا راجلك شهريته ضعيفة يبقى الشهر ما يلحق على خوه هذا و اذا سلكتو من الدين و زيد هاكا عمركم و ايلا تقدرو تشريو سكنى و خصوصا من بعد ما ان شا الله يجيوكم الذرية
الحل الثاني تبقاو تم فز عينيه كيما هو يسال حتى راجلك يسال كيف كيف ما فيها لا كبير و لا صغير خاطرش ما خلاش الناس تحشم ممكن تشريو فريقو و تحطيه في شمربتك و تشري كويزينيار و تبقاي تطيبي غير ليك و لراجلك بس يعني تعزلي وحدك عادي كاين لي ف دار لعجوز و عازلة مااشي عاد غير هاكدا اتخيلي كيشغل راكم كاريين مع ناس co******** و الضو و الما ف النص هاكا ما يسمعكم ما تسمعوه و كي يجي ينطق يفهمه راجلك بلي هاكا احسن باش ما ينوضوش مشاكل و ابداو تلايمو باش تشريو السكنى و الله يسهل ....
يبقى حل تروحو تسكنو عند لعجوز بالصح عندكي تحسبي بلي تماك مكاش مشاكل ممكن تتضاعف و تتوحشي يامات خو راجلك ...
اتزوجتي اختي كان علابالك بالظروف هاد الصوالح نولمالمون نهار قالك السكنى مع خويا تتوقعي مشاكل كيما هاكاا اصبرو و ابسالو بيك بيه و خشنو ارواحكم شوية لكن باحترام يعني ثقلو ارواحكم ما تكثريش مع مرته الهدرة باش ما يعرفوش شخصيتك بقاي غامضة باش تيفيتي المشاكل و رمضان كريم

[قدور بن عاشور]

الحل أنك تنفضي الغبار على كتافك،

إنتفضي و جيبي حقك بذراعك.


و إذا راجلك هذاك طالق وذنيه

ما عندك يا لالا ما ديري بيه.

[زبدة ذايبة]

يا أختي انتهى وقت الشكوى

والموضوع مثلما ذكر الإخوة واضح

يا إما تتحملي

وديري كي شغل ماراهش يهدر

بالتالي مهما دار وطار انت ماتنفعليش (لكن من خلال كتاباتك لا أعتقد أنه عندك هذ الصفة)

يا إما تهدري مع والديك

يا إما تهدري مع والديه

يا إما تهدري مع راجلك

يا إما تغضبي وتروحي لداركم وهذي ماننصحكش بيها نهائيا ماتعطيلهمش الفرصة

بالتالي ماديريهاش في بالك نهائيا وطفريها في روحك وتكوني عاونتيهم في القضاء عليك بيدبك

يا إما مثلما قالك الأخ تجيبي حقك بذراعك وهنا توقعي كلشي ممكن يضربوك

ولا ضربوك على الأقل تكوني خرجتي المشكلة للعلن

هذ الحكايات تاع اخ زوجك ماراهيش رايحة تحبس رايحة تزيد وتروح لبعيد

لازم ديري حل مناسب ليك

رب يوفقك

[nihal159]

ياختي راجلك وينو من هذ لحكاية؟ و انتي علاش تطيبيلو؟ طيبي فطورك ليك و لراجلك فقط، وكي يقول هذي مش ماكلة قوليلو واحد ماعرضك و قالك تفضل هذي ماكلتي أنا و راجلي و اذا حاب تاكل قول لمرتك تغسل الحنة من يديها و تطيبلك واش يعجبك، أذا بقيتي ساكتة ماتتحلش المشكلة هذي،ربي يسهلك

[الفراشة الرومانسية]

كان الله في عونك

[basyouni]

ربي يفرج عليك اختي

هذا يحوس يخرجكم وباين عليه معمر من عند اللفعة نتاعو

[noeddin]

السيد راه عنده قصد ، الى كان راجلك متيسر الحال ولم يجدخلالا في السكن الفردي فلتنفصلوا ،والله يجبر الحال

[mokhtaro]

الوحيد الذي بامكانه حل المشكل هو زوجك
ان لم يتدخل فالحل الوحيد هو التجاهل
التجاهل أحيانا يؤدب من لا خلق له
الله يكون في عونك

[غزلانْ]

السلام عليكم

مشكلتك أنك تعتبرينه أكثر و مازلت تطبخين له؟ رغم السب و الشتم الذي تلقيته من قبله
حل مشكلتك بيد زوجك فأين يكون و أنت تظلمين
أعانك الله