وصفة شيف من مطبخي cake au nutella

jiji_" · 2013-12-28, 00:16

السلام عليكم حبيباتي هذا اول موضوع ليا و ان شاء الله يعجبكم و صفة شيف كيكة بنوتيلا سريعة سهلة و لذييييييييييييذة
المكونات:
125 غ سكر
80 غ زبدة طرية
3 بيض
200غ فرينة
1 خميرة الحلوى
رشة خفيفة ملح
4 ملاعق نوتيلا

نطري الزبدة مليح بملعقة خشب

نضيفو السكر و نخلطو مليح

نبداو نضيفو البيض حبة بعد حبة مع التحريك هنا نستعملو لافوي

نضيفو المكونات الجافة الفرينة خميرة الحلوى و رشة الملح ضرورية من اجل الطعم

نخلطو بسباتيلا و راح تتحصلي على قوام كثيف

و مبعد نضيفو 4 ملاعق نوتيلا و نحركو بالشوية لازم نخلو خطوط الشكولا تبان يعني ماندخلوش نوتيلا فالمزيج حتى ماتوليش تبان

و نطيبوها في مول الكيكة الانجليزية و نزينوها بالبندق حسب الوصفة انا زينت باللوز

و لا تقدري اتطيبيها في مول المينيوم كيما هذا بصح بالاكي تتحرق خاطر الالمينوم يحفظ الحرارة يعني اتطيب في مدة اقل من المول العادي

الصورة الاولى في مول عادي اما الاخيرة طيبتها في مول المنيوم

نتمنى تعجبكم و تجربوها لانو ذوقها فريد