لامونة خفيفة بالكريمة بنكهة البرتقال

[oum ibrahim]

السلام عليكم و رحمة الله و بركاته
هذي اللامونة قصتها قصة كنت شفت في النت وصفة و لما جيت نطبقها لقيتها نفس العجينة الي معتمدتها في معجناتي فدرت طريقتي و زدتلها بعض الاضافات و الحمد لله تحصلت على اروع لامونة خفيفة و بنينة و تشهيييييي تفضلو المقادير و الطريقة لكن للاسف ماصورتش المراحل ماكنتش ناوية نديرها موضوع

لامونة خفيفة بالكريمة بنكهة البرتقال
كاس حليب دافىء
كاس ماء دافىء
نص كاس زيت
كاس ماشي معمر سكر
ملعقة كبيرة خميرة خبز (في البرد نزيد نص ملعقة )
ملعقة كبيرة حليب غبرة
نخلط هذه المقادير ماعدا الزيت و نضيفلها 2 كيسان فرينة و نخلط نتحصل على خليط سائل نغطيه و نخليه يخمر و يعمل فقاعات (مدة ربع ساعة الى 20 دقيقة )
بعدها نضيف للخليط
الزيت
الملح
باكي خميرة الحلوى
قشور البرتقال او لفاني
كاس و نص فرينة (ممكن نوصل حتى 2 كيسان حسب نوعية الفرينة )
نعجن مليح حتى نتحصل على عجينة طرية تتلاصق
نغطيها و نخليها تختمر
ثم نهبطها و نخليها تختمر للمرة 2
ثم نهبطها و نخليها تختمر للمرة 3
ثم نهبطها و نشكلها كرات متوسطة هذا الكمية تدير 6 حبات من الحجم الي في الصورة
نسطحها قليلا باليد و نديرها في بلاتو مفرش بورق الطهي و ندهنها بصفار بيض مخلط مع عطر القهوة او قهوة طايبة او نسكافي و نخليهم يزيدو يخمرو ملييييح حسب حرارة المطبخ ممكن مدة نصف ساعة او اكثر
نسخن الفرن جييييييدا 200 درجة و ندخل اللامونة تطيب و ننقص ل180 درجة ونخليها تطيب حتى تتحمر
الكريمة
2 كاس حليب
ملعقة كبيرة مملوءة و نصف نشاء
3 ملاعق الى 4 سكر
قشور البرتقال او فانيليا
نخلط كلشي بارد في بارد ثم نحطها فوق النار مع التحريك حتى تعقد ننزعها ونضيفلها ملعقة زبدة و نغطيها بغلاف بلاستيكي ملامس للسطح باه ما تتكونش قشرة و ندخلها الثلاجة تبرد ملييييييح حتى الاستعمال نخرجها نضربها شوية بالباتور باه تولي ناعمة و مافيهاش كتل
واذا حبيتوها بذوق الشكولا ممكن تزيدولها شكولا سوداء او بالحليب او نوتيلا
وممكن ايضا استعمال الكريمة الجاهرة vanoise كما عملت انا
درت مغلف كريم باتيسيير فاني +ملعقة كبيرة نشاء +2 كؤوس حليب +3 مغارف سكر +قشور البرتقال نحرك بارد في بارد ثم نحطها فوق النار مع التحريك حتى تعقد ننزعها و نزيدلها ملعقة زبدة و نخليها تبرد ملييييييييح في الثلاجة
ثم نضربها بالباتور حتى تولي خفيفة
جزء منها زدتلو 2 ملاعق نوتيلا
لما تطيب اللامونة و تبرد نفتحها و نحشيها بالكريمة و ندهنها بالجولي و نرش السكر الناعم
ملاحظة تقدرو تحتفظو بيها في الثلاجة مدة 3 الى 4 ايام ما يصرالها والو بالعكس تقعد طرية و كانها هذا وين طابت
وشهية طيبة










في الاخير نتمنى تعجبكم و تجربوها و تدعيولي دعوة خير تكفيني
اللهم لك الحمد حتى ترضى و لك الحمد اذا رضيت و لك الحمد بعد الرضى

[karimazaki]

ربي يخليلك ابراهيم و نشكرك على لامونة راهي هايلة

[Oum Habouba]

ياسلام يا ام ابراهيم واخيرا ماعليش ولو بلا صور ولكن الصور راح تنطق من جمالها ياملكة الباتيسري شكرا مابخلتيش علينا بالوصفة الله يجعلها في ميزان حسناتك انتظري تطبيقي ان شاء الله لكي مني احلى تقييم يا حلوة

[فايزة1207]

ما شاء الله يام ابراهيم تشهي

[أم ياسين الزهراء]

روعة ياحلوة تقريبا نفس انتاعي اللي حرفت وصفة الوهرانية ندير كاس لبن ومخلط مع كاس عصير برتقال يالهوي البنة الله يعطيك الصحة عجبتني الكريمة ربي يحفظك

[om_nour]

اللَّهُمَّ اجْعَلْنا مِنَ الشَّاكِرِينَ لآلاَئِكَ، الصَّابِرِينَ عَلَى بَلاَئِكَ، الرَّاضِينَ بِقَضَائِكَ، النَّاصِرِينَ لأَوْلِيائِكَ، الْمُجَاهِدِينَ لأَعْدَائِكَ.

اللَّهُمَّ وَفِّقْنا جَمِيعاً لِما تُحِبُّ وَتَرْضَى. اللَّهُمَّ خُذْ بِنَواصِينا لِلبِرِّ وَالتَّقْوَى. اللَّهُمَّ سَلِّمْنا وَسَلِّمْ مِنّا، وَخُذْ بِنَوَاصِينا لِما يُرْضِيكَ عَنّا، يا ذَا الْجَلاَلِ وَالإِكْرَامِ،

اللَّهُمَّ ما قَصُرَ عَنْهُ رَأيُنا، وَضَعُفَ عَنْهُ عِلْمُنا وَعَمَلُنا، وَلَمْ تَبْلُغْهُ مَسْأَلَتُنا مِنْ خَيْرٍ أَنْزَلْتَهُ عَلَى عِبَادِكَ، فَإِنّا نَرْغَبُ إِلَيْكَ فِيهِ، وَنَسْأَلُكَ إِيّاهُ.

اللَّهُمَّ لاَ تَحْرِمْنا فَضْلَكَ بِذُنُوبِنا. اللَّهُمَّ لاَ تَحْرِمْنا خَيْرَ ما عِنْدَكَ بِسُوءِ ما عِنْدَنا، يا حَيُّ يا قَيُّومُ، يا ذَا الْجَلاَلِ وَالإِكْرَامِ، ا

[ام محمد 05]

تهبل تهبل ماشاء الله ربي يحفظك اختي والله يفرحك بواش متمنية في قلبك يارب بوركت على الموضوع

[sabrina206]

روعةةةةةةة يا فنانةةةةة ربي يحلي أيامك أختي
و الله ما لقيت واش نقول غير الله يرضى عليك أختي أم ابراهيم
مرسيييييييي

[fati13]

باااااااااارك الله فيك يامبدعة يعطيك الصحة +++++++++++++ احلى تقييم لام ابراهيم

[x ام رحاب x]

تسلم الايادي وجعلها الله في ميزان حسناتك حبيبتي تهوس الوصفة

[أم عمار السطايفية]

يعطيك الصحة عجبتني الكريمة

[القناعة كنز]

احلى لامونة من احلى ام ابراهيم بارك الله فيك

[جنة الفردوسْ]

تشهي يعطيك الصحة

[أم ريمة*]

ماشاء الله خفيفة وبنينة يعطيك الصحة وربى يجعل تعبك فى ميزان حسناتك امين

[أم ماجد]

احلي ام برهوم
كل حاجة من يديك تحفة والله
نحبك موت
احلى تقييم لعيونك انت