الحل الجذري مع الأطفال و المراهقين الذين لا يسمعون الكلام ..... مع زٌخْرُفَةٌٌ

[zokhrofa]

السلام خواتاتي

طفل يحب كلمة لا


طبعا الكثير من الامهات عندهم مشكل انو ولادها ما يسمعولهاش هدرتها و ما يديروش و اش تطلب

غير اذا عيّطت ..... عاودت ألف مرة .... ربما حتى تضرب في بعض المرات

اليوم جبتلكم تحدي جديد و هااااااااايل راح ماشي يكون شيء اكاديمي

و انما راح يكون جد ممتع و راح يعاونك انو وليدك الصغير او وليدك الكبير يسمع الهدرة

و كلمتك تولي مسموعة بطريقة مختلفة عن الماضي

راح يولي كاين احترام متبادل بينك و بين ولادك

راح كي يخلاص النهار ما تقوليش اووووووووووف مزيا رقدو باش نريّح

خاطش يومك راح يكون فيه اقل ضغوطات من الايام السابقة

تقدري تلحقي انك تتوحشيهم و هوما راقدين ماشي تتمناي الليل يزيد يطوّل

هيا ورولي شكون راهي محتاجة هذه الطريقة بكل صراحة ؟

[zokhrofa]

هيا نشوفو الطريقة الصحيحة لجعل الطفل صغير او مراهق

مطيع و متعاون

طبعا الطاعة هي انو الواحد يدير حاجة مكانش حاب يديرها

او ما يديرش حاجة كان حاب يديرها

طاعة لشخص كبير عليه

يعني شخص عندو رصيد كبير عندنا من الثقة اتجاههم

يعني طبيعي شخص لا يطيع شخص ما عندوش ثقة فيه

لأنه يا امّا لم يكسب ثقة الطفل بعد يا امّا كسبها و ضيّعها لسبب ما

كأن يكذب عليه او يعده بشيء ولا يلبيه له مثلا

او نطيع شخص يخلصنا من موقف صعب لا نستطيع الخروج منه

يعني الطفل يستطيع الاطاعة عندما يكون في مأزق مثلا

و طبعا مرّات لا يلجأ للآباء

لذلك الطاعة عند الطفل تستطيع ان تكون للوالدين او لشخص غريب بكل سهولة

أمّا التعاون فهو ليس كالطاعة ابدا

لأنّ التعاون هو اخذ و عطاء يعني شخص يتفق مع شخص على عمل شيء ما و يكون الشخص موافق على فعله

طبعا يقبل الاسلوب و الوقت و وووو بالتفاهم و الحوار في ذلك

و في الاخير يقوم به بناءاََ على ما أٌتٌفِقْ عليه

و هنا يكمن مشكلة الأمّهات

كيف ؟

الأم دائما تطلب من اولادها الانصياع

يعني الرضوخ لأوامرها مهما كان الطفل رافض

مهما كان غير راغب بذلك

مهما كان الطفل منزعج من ذلك

هنا تصبح الطاعة .. طاعة عمياء

لذلك لازم تعرفي أنو طفل راح تكون حياته احسن بكثيييييير لو كان متعاون و ليس منصاع

هناك طرق كثيرة تجعل طفل متعاون معاك

مثلا الأطفال من 5 سنوات فما تحت يحبو أسلوب الأسئلة

يعني كان تشوفي الألعاب في لرض

تقوليلو هاذو الالعاب وين بلاصتهم ؟

راح يقولك في علبة الألعاب

قوليلو براااااااااافو شحال شاطر وليدي

ياااااااااا انا راني حايرة كيفاش عرفت بلي بلاصتهم تم ؟

خير من كي تدخلي وتلقاي الألعاب في الارض تبداي تعيطي و تقوليلو حطهم في علبة الألعاب sinon راني ندير و نعمل و نصنع ووووو

مثال آخر :

اذا كان وليدك يتفرج التلفزيون و انتي حاباتو ينوض روحي ليه و قوليلو بقاو 5 دقايق على نهاية وقت التلفاز

تحب نفكرك كي يخلاصو ولا انت تعرف وحدك وقتاش يخلاص يا شاطر

طبعا انتي تكوني وريتيلو في ساعة الحائط ولا في ساعة يدو وقتاش يخلاص الوقت

و يكون يعرف واش معناها 5 دقايق

الامور مرتبطة مع بعضاها

اذا حبيتي الأمر يجوز بسهولة أكبر

قوليلو كي يخلاصو 5د و طفي التلفاز تجي نوجدو كيف كيف الطابلة واش تحب تحط هذه المرة الطباسة ولا الخبز ؟

راح تفكيرو يروح للاجابة على سؤالك و يثبت معلومة أنو التلفاز راح يطفى راح يطفى ضرك لازم نخمم في واش ندير

يتبع

[&ام ايوب&]

متابعة للموضوع بارك الله فيك

[zokhrofa]

شكرا ام ايوب

[nouabdou]

بارك الله فيك

[zokhrofa]

شكرا أختي لمرورك العطر

[فاصلة]

السلام عليكم عوديتنا أن ننتظر منك الجديد والمفيد.
صراحة أنا ابني أوصلني الى مرحلة حرجة . صرت أستعين بوالده دائما ليلبي الطلبات. وصرت أغتاظ عندما أراه يلبي طلبات الغرباء وانا لا. فغيرت أسلوبي معه وأدخلت الحوار بيننا. أما الوعود فأنا دائما ألبيها وأفي بها.

[zokhrofa]

و الآن ؟ ماذا يحصل بينكما ؟ هل تغيّر ؟ هل اصبح يلبّي لكي الأوامر ؟

[فاصلة]

نعم في البداية تحدثت إليه. مطولا.
واكتشفت مؤخرا أنه يرد أن يحصل على أكبر قدر من الرعاية والدلال. فقد صار يتمارض أي يلعبها مريض. هاذي رجلو توجع فيه هاذي كرشو هذا راصو. أهدرت معاها في جلسة مطولة واحكيتلو على أطفال محرومين . المهم أنا انخلعت فيه على الكذب لي اتعلمو. أعطيت كل الاهتمام وبديت دائما نهدر والحمد لله راهو يتبدل. أحيانا بلا ما نهدر يروح يغسل ويغسل أسنانو ويبدل قشو. وأحيانا نفكرو. الحمد لله. وكاين حاجة الجانب الديني فاني عند دوره في التربيه الصحيحه

[zokhrofa]

صحيتي برافو عليك و الله قلتي الكلمة الصح

الجانت الديني ينقص عليك بزاااااااااف الخدمة خاصة كي تحكيلو قصص و عبر يتعلم منها الشجاعة و عدم الكذب و الصبر ووووو


في الحقيقة الطفل كي يزيد يولي في عمرو 4 اشهر يولي يكذب ههههه ما تنخلعيش فقط باش يدي الاهتمام

لكن دائما الام تفهم وليدها انو هذه الطريقة بالعكس ماما راح تولي ما تحبكش

و انو كي تقول الحقيقة تولي تحبك و تعطيك واش تحب

للأسف كاين امهات كي يسألو وليدهم مثلا انت ديت الحبة تاع القاطو لي كانت في الثلاجة يقوللها لا

مع الاصرار و تكلخلو و تحنحن عليه كي يقوللها نعم انا تشعل فيه بكف

طبعا الطفل انساي يزيد يقولك الحق

لكن لو كي يعترف تقوليلو انا كنت حابة لوكان جيت و قتلي ماما حاب ناكلها انا نعطيهالك او نقولك اوكي كول

احسن من راك كليتها باسرقة وكلاها معاك الشيطان و انت بقيت جيعان صح ؟ راك حاب تزيد وحدة ؟

يقولك ايه قولو شفت خاطش كان قتلي ماما حاب ناكل تولي حلال عليك و كي تاكلها تشبع و حتى وتحب تزيد انا نزيدك

لكن الآن انت جيعان خاطش كليت حاجة حرام و الشيطان دالك منها و على هذا مراحش يكون عندك الحق لحبة أخرى

يعني بأسلوب جد هادئ راح يعرف الحق من الواجب

[أريج13]

جزاك الله خيرا زخرفة ...سرعة الانفعال و الرد و عدم التريث يوقعنا في اخطاء فادحة و مشاكل مع اطفالنا نحن في غنى عنها
اعجبتني كثيرا طريقة طرحك للموضوع ...بارك الله فيك على الافكار التي دونتها...و جعل هذا العمل في ميزان حسناتك....

[zokhrofa]

اهلا أختي والله عندك الحق في واش قلتي

سرعة الانفعال وااااااااااااا كم هي مشكلة كبيرة

في الحقيقة ماشي غير مع الصغار تعوّدنا ان نكون متسرعين في كل حاجة

في الحكم على الناس، في الرد قبل فهم السؤال، في الانفصال، في الزواج، مع الأطفال

تسرع في تسرع

لكن الحمد لله ربي جعل هذا شيء مكتسب وليس فطرة على الأقل عندنا الوقت نتدارك أنفسنا و نصحح أخطاءنا

[FATIHA131]

اشكرك اختي
بارك الله فيك

[zokhrofa]

شكرا أختي على مرورك العطر

[ام جعفر وباسم الحبيب]

موضوع مهم....انا كنت عاقلة وناس ملاح...بالصح ولادي ردوني قبيحة....اصرخ كثييييرا....جننوني...هاذ الاسبوع راني مع ابني الاكبر عندو عامين راني نعلم فيه كيف يتخلص من الحفاضات....الحقيقة عفرتني ..اتمنى لك لك كل الخير اختي زخرفة واتمنى التوفيق لباقي الاخوات الله يعينهم...