وصفات العيد من عند نور ~ جربي و ادعيلي

عماني نور · 2015-07-12, 21:57

السلام عليكم ~ صح فطوركم و سحوركم و تقبل الله منا و منكم صالح الأعمال إن شاء الله

جيتكم قبل العيد نحطلكم كاااااامل الوصفات الي طلبتوها و الي طولت بالبزاااف عليكم علابالي ، مي الله غالب " أدعولي ربي يسهلها دايما يااااربي علينا و عليكم ان شاء الله " ~

المهم كالعادة ، نحطلكم موضوع متجدّد فيه الوصفات التالية :

~~~~~~~~~~~~~~~~~~~~~~~~~~~~~~~~~~~~~
* مقروط سوريا

* العجينة السحرية ( الجديدة ) الأكثر من رااائعة .

* مخبز الفلان .

* مقروط القارص .

* الطلية " 3 وصفات مختلفة "
~~~~~~~~~~~~~~~~~~~~~~~~~~~~~~~~~~~~~~

هذا كامل ان شاء الله رايحة نحطو هنا ~ فرجاءً حبوباتي خلوني نكمل المواضيع أومبعد حطو تعليقات ، أوك ؟؟؟

ان شاء الله بربي نكملهم اليوم ~ و ياااربي تستفادو منهم و يعجبوكم ~

بعض الوصفات غير مرفوقة بصور ، و كل الوصفات غير مرفوق بصور لمراحل العمل ، لكن رايحة نحاول نوصللكم الفكرة كما هي بالضبط مع كل النصائح ~ و الي مافهمتش أي حاجة تسقسي أووك ؟ متفاهمين ؟؟

يالله نبداو على بركة الله ~

Nour

عماني نور · 2015-07-12, 22:01

مقروط سوريا :

هي وصفة سهلة جدا ، و مضمونة بإذن الله إذا اتبعتِ نفس الخطوات ، و ممكن يجيك خير من الي في الصورة ألف مرة ، لأني شخصيا كل مانديرو يخرج خير من المرة الي فاتت ، يعني الحمد لله اتعلمت من الأخطاء ☺ الي ظرك نقولهوملكم كااامل باش ماتديروهومش نتوما تاني ~

المقادير : ( الكيلة المستعملة كأس تع 250 ملل )
- 2 كيلات فرينة .
- كيلة سميد خشين ، أنا نستعمل سميد " مولة " .
- كيلة سمن ذايب و بارد .
- 4 ملاعق كبيرة سكر ناعم ( ماشي معمرة مليح ) .
- م ك فاني .
- م ص خميرة ( ماشي معمرة مليح ) .
- 3 صفار بيض .
- ماء الزهر .
الحشو :
- 2 كيلات لوز بقشورو محمّص شوية برك ماشي حتى يحمار .
- كيلة جوز ( إختيارية ) ، لكن إذا استغنينا عليها نديرو 3 كيلات لوز .
- كيلة سكر ناعم .
- ماء الزهر .
التزيين :
عسل ، بيستاش .

أولاّ حضري العقدة " الحشو " و خليها ترتاح " ...
نعطيكم طريقتي انا كيفاش موالفة نخدمها : دايما عندي كوكاو معالج فالثلاجة مرحي متوسط ، كي نحب ندير حاجة تع اللوز ( الحشو تع المقروط ، البقلاوة ، التشاراك و العرايش ، السلطانيات ، المشكلة ..... ) ندير نص بنص ، كوكاو معالج + لوز ، هكذا نقتصد فاللوز الي سومتو راهي تدور فال 2000 دج ، و نستفيد من الكوكاو الي بطريقة سهلة خلاص نعطيه ذوق اللوز ، و حقيقة مستحيل واحد يفيق بلي راه ياكل فالكوكاو ^^
و هنا تلقاو أفضل طريقة لمعالجة الكوكاو :
https://www.djelfa.info/vb/showthread.php?t=1001609
فقط ، أنا نغسل الكوكاو ملييييح مليييح قبل مانبدا نفورو
المهم ، ببساطة نخلطو 3 كيلات مكسرات الي عندنا ، اللوز يكون بقشورو نحمصوه شوييييية برك قيس ما تبان طعمتو برك ، نرحوه متوسط ، نزيدولو السكر ، و نلموه بماء الزهر حتى يوليلنا طري و يتلم فاليدين .
غلفيه بالبلاستيك " كيس أو بابيي فيلم " و خليه يرتاح .
المقروط : خلطي الفرينة و السميد و السكر مع بعضاهم بيدك ديري ثقبة فالوسط ، فرغي فيها السمن الذايب و البارد يكون سائل ماشي تبرديه فالثلاجة كيما تع الغريبية ، ديري صفار البيض فوق السمن بلا ماتخلطي ، زيدي الفاني و الخميرة أومبعد خلطي ، و أعجنيها مليح مليح بيديك .
زيديلها ماء الزهر بشوية حتى تتلم ، ديريها شويـــــــــــة طرية " شوية برك " خاطرش السميد يشرب ، بصح ماتحرحريهاش باسكو ماتحافظش على شكلها ممبعد ، يعني تجيك العجينة متماسكة و تقدري تديريها في يديك و تشكليها عادي ..
غطيها ، و خليها ترتاح شوية " 15 د " تقريبا .
في التشكيل ، عندك كامل الحرية ، تحبي تديريه مقروط كيما نعرفوه كامل ، يعني تديري حربوش و تقطعيه مقروطات :
حلّي العجينة بالحلال " إذا عجنتيها مليح ، و درتيلها كمية ماء زهر كافية " رايحة تتحل بكل بساطة و ماتلصق ، ماتعييك فالخدمة ، إذا شفتيها تلصق غطيها و خليها تزيد ترتاح حتى تشرب مليح ^^
ديري حربوش من العقدة ، يكون شوية خشين ماشي رقيق بزاف ، و هذا سر من اسرار البنة فهاذ المقروط ..
ظوك عندنا عجينة تع المقروط محلولة ، و حربوش تع اللوز ، ديري الحربوش فوق العجينة و لوي ، حتى يولي عندك حربوش تع عجينة السميد فيه الداخل حشوة اللوز ، فهمتو ؟؟
يعني هاذ المقروط مانديروهش كيما المقروط الي موالفينو تع نحلو العجينة بيدينا فالوسط و نديرو الحشو و نغلقو ، مقروط سوريا عجينتو تحليها بالحلال سمك متوسط ، تحطي حربوش الحشو ، و تلوي حتى يولي عندك حربوش خشين ، عدليه بيدك و حليه حتى توصلي للحجم المطلوب
قطعيه مقروطات ، بواسطة بانسو ادهني وجهو ببياض البيض و رمديه فالبيستاش مرحي خشين أو لوز بقشورو مرحي خشين .
يعني ندهنو الوجه برك الي من فوق و نديروه في البيستاش أو اللوز ، و نحطوه فالسنيوة ...
نستفوه عادي ، هاذي قدام هاذي ، بصح ماشي متلاصقين ، لأنو فيه الخميرة فحجمو رايح يكبر شوية .
نسخنو الفرن على حرارة 180 درجة ، و نطيبوه حتى يتحمر ، غير يخرج من الكوشة و هو سخون عسليه .
التعسال ، و بحكم أنو هاذ المقروط بزاااااااااااااف هش ، مانديروهش مع بعض و نعسلوه ... ، خليه فالسنيوة الي طاب فيها أو بدليه و حطيه في بلاطو ( تعاملي معاه بحذر لأنو يتفتت ) ، ظوكا جيبي العسل بارد قدامك ، أنا شخصيا نستعمل عسل المرجان هو أحسن حاجة ، المهم في كل حبة مقروط ديري ملعقة كبيرة عسل ، فرغيه عليه و خليه يشرب .
ظوكا إذا المقروط درتيه على بكري ، و نهار جيتي تقدميه حسيتي بلي نشف ، باسكو راه يشرب العسل ، سخني شوية عسل ، و عاودي عسلي الحبات بنفس الطريقة ، برك نقصي شوية العسل ، يعني بدل ملعقة كبيرة ، ديري ملعقة صغيرة معمرة مليح .
، حطيه فلي كيسات ، و بالصحة و الهنا " ~ أحسن مقروط " و أضمن وصفة بإذن الله

بالنسبة للتشكيل : طبعا مع لي مودال الجدد تع الطوابل و لي مول تقدري تشكلي المقروط تاعك كيما تحبي ، شكلي كريات من العجين ، و كريات أصغر من الحشو ، ديري كرية الحشو داخل كرية العجين و دوري مليح بيدك ، كمية العجين تكون مليحة ، ماتديريهاش رقيقة بزاف ، و الحشو تاني ، ماتكثريش حتى يخرج ، و ماتديريش نقطة حتى ماتبانش كامل " الكرم الكرم أححم أحححم .
ديريه فالطابع و أطبعي ، و طيبيه ، و بعد ماتعسليه زينيه بالبيستاش المرحي متوسط .

~~~~~~~~~~~~~~~~~~~~~~
هذا هو مقروط سوريا بالشرح المفصل الممل جدا هههههه ، و الي مافهمتش أي حاجة تسقسي ، علابالي الصور هوما أحسن توضيح ، مي الله غالب انا حتى نكمل الوصفة باش نتفكر التصاور ههههههههه
يالله ~ نلتقي بعد قليل ان شاء الله في وصفة أخرى .....

محجوووووووز ، بالاكو نلقى تعليقات ظوكا هههههه ، فرحوني بالتعليقات كي نكمل ماشي ظوكا أوووك ؟؟
حبكم & دعواتكم
Nour

عماني نور · 2015-07-12, 22:07

العجينة السحرية :
هي عجينة تصلح لكل أنواع الحلويات الي فيها طلية أو تجي مسكرة : تشاراك ، عرايش ، براسليات ، مخبز كيما الي في الصورة .....
ديرو بيها أشكال و أنواع من الحلوى و تجي بزااااااااااااااف خفيفة و ماشي مزيتة كيما العجينة تع السمن و الحليب الي صراحة اعتمدناها سنوات و سنوات و كانت مسلكتنا يعني يكثر خيرها باش ماننكروش الجميل احححم احححم ، بصح هاذ العجينة خييير و خير
أولا : لأنو مقاديرها مضبوطة
ثانيا : فم فم تقدري تخدمي بيها ، و سهلة جدا في التشكيل و حتى طيابها مايديش وقت .

نعطيكم مقادير العجينة فقط ، الحشو يبقى ليكم ، كل واحدة على حساب الحلوى الي رايحة تديرها أوووك ؟

أنا درتو على شكل مخبز ، درت كريات صغيرة من العجينة ، حشيتها بلوز مرحي متوسط + سكر + مبشور ليمون ، لميتها بصفار البيض ، يجي ذوقها كيما مقروط اللوز تماما ، و ماتخافوها تيبس ، مايتبدل طعمها ... العكس تجي معسلة و بنينة هااايلة ، و كل واحدة و ذوقها ....
المهم بعد ماحشيت الكويرات درتهم في طابع بيضوي و شكلتهم بيدي و طيبتهم ، طليتهم و زينتهم بورود اصطناعية ، هذا ماكان ^^

مقادير العجينة السحرية :
- 250 غ زبدة ، ممكن تستعملي فلوغيال أو لابال أو ماني ، تعطيك تقريبا نفس النتيجة فهاذ الوصفة
- 500 غ فرينة .
- ماء الزهر .

ديري الزبدة كيما هي بلا ماتذوبيها ، زيدي عليها الفرينة بشوية و لمي بيدك ، بعد ماتكملي كمية الفرينة ، رشي بماء الزهر حتى تتشكل عندك عجينة طرية و متماسكة كيما عجينة الصابلي .
إذا استخدمتي العجانة ، استعمليها فقط باش تلمي الزبدة و الفرينة ، لكن كي تجي تضيفي ماء الزهر اتكلي على يدك باش تعرفي اذا كمية ماء الزهر كافية او لا ، لأنو ممكن تتكلخلك كي تستعملي البيتخا ، و تجري العجينة ، أومبعد أكيد رايحة تزيديلها الفرينة ، و هذا يعني انو بديتي تخلطي و تخسري في عجينتك سيدتي الشطورة ^^

تتلم العجينة ، ديريها في كيس بلاستيكي أو بابيي فيلم تريح شوية برك ، و اخدمي بيها واش تحبي ^^

برك ماتنسايش تدعيلي ^^
ملاحظة :
كوني سخية في الحشو إذا شكلتيها على شكل مخبز ، باش يبان صح مخبز ^^ .

مازال ماكملتش ~ لا تعليقات

Nour

عماني نور · 2015-07-12, 22:11

مخبز الفلان :

هي وصفة سهلة ، إقتصادية ، و هشة جدا و بنييييينة جدا ^^ نتمنى تجربوها و تعجبكم
مكونة من 3 حاجات ، العجينة ، الحشو ، و الطلية .... الطلية نخلوها في الصفحات المقبلة ان شاء الله ^^

بالنسبة للعجينة فيها :
250 غ زبدة ذايبة و باردة " أنا نستعمل فلوغيال " .
2 بيضات كاملين
باكي فلان فاني تع 50 غ .
ملعقة كبيرة سكر عادي
فانيليا
1 خميرة
نصف كأس مايزينة
فرينة
الحشو :
250 غ كوكاو محمص غير شوية " ماشي حتى يحمار " مطحون متوسط .
2 م ك سكر
م ك مرغرين ذايبة
و نلم بماء الزهر
التحضير :
1/ العجينة : نذوبو الزبدة و نخلوها تبرد " ماشي حتى تجمد " قيس ما تولي بحرارة الغرفة ، نضربها مع 2 حبات بيض ، نزيد الفلان و السكر و الفاني ، و نخلط كل شي مع بعض .
نزيد المايزينة ، الخميرة و الفرينة حتى تتلم العجينة ، و لازم تكون عجينة طرية و سهلة التشكيل ، تشبه لحد بعيد عجينة الصابلي .
الحشو : نخلطو جميع المكونات و نشمخوهم بماء الزهر ، ماشي حتى تولي عجينة ، غير قيس ماتتشمخ و تتلم شوية برك ، باش ماتيبسلناش فالطياب .
التشكيل :
نديرو حربوش من العجينة ، كيما الي نديروه فالمقروط عادة ، يعني نديرو حربوش و نثقبوه بصباعتينا في الوسط ، نديرو الحشو فالوسط ، و نعاودو نغلقو الحربوش ، ندوروه بيدينا حتى يرقاق شوية .
نقطعوه بالموس ، ظوك هنا تحبو تقطعوه مربّعات ، مستطيلات ، مثلّثات ، أنتوما و ذوقكم ^^
برك ديرو حساب بلي فيه الخميرة ، يعني حجمو يكبر ، فحاولو صغرو الحجم شوية ، باش مايتعبش فالماكلة و مام شكله يجي شباب
أنا درتو ضخم ههههههههههه " اتكلخت ماشي بلعاني " راني قتلكم نقوللكم كامل الأخطاء الي وقعت فيها باش ماتعاودوهاش "

المهم ، نديروه في سنيوة مرشوشة بالفرينة ، حطوه متباعد شوية باش مايلصقش كي يخمر ، نطيبوه في فرن مسخن من قبل بحرارة 180 درجة ، مدّة 15 د تقريبا ، شوفوه غير يتحمر من الجناب خلاص ، مالازمش يطول فالكوشة باسكو إذا طوّل ييبس الحشو .
بعد ما يطيب ، خلوه يبرد تماما ، سوولو الجناب بالموس ، يعني نحو الزوائد باش يجي الشكل مطبوع ، لأنو يخمر فرايح يتبدل الشكل شوية .
أطلوه ، خلوه ينشف ، زينوه كيما تحبو ، و بصحتكم ☺

ملاحظة : ممكن تستنغناي عن الحشو ، تديري العجينة وحدها ، تطبعيها ، و تطليها ، تجي خفيفة تاني ^^

أسرار الفشل :
- تكثري السكر في الحشو ، هذا أهم مسببات الفشل ، باسكو إذا كثرتي السكر معناه الحشو يجي يابس ، و إذا يبس الحشو ، قاردي بيه الناس ، ماتشقايش تاكليه ^^
- الزبدة خليها تبرد أومبعد أخدمي بيها ، إذا درتيها دافية ولا سخونة شوية رايحة تديلك بزااااااااف الفرينة و ماتخرجش مليحة .
- ماتكثريش الفرينة باش ماتيبسش العجينة ، أولا رايحة اتعبك فالخدمة ، ثانيا مارايحش يجيك خفيف و يذوب فالفم كما يجب .
- ماتكثريش السكر فالعجينة ، لأنو الحلوى رايحة تتطلى ، فمقادير السكر راهي مضبوطة كما يجب ...

~~~
Nour

عماني نور · 2015-07-12, 22:13

مقروط القارص :

هاذ القاطو إختراع ، هو بوسو لا تمسو بالليمون ، أنا شخصيا نحبو بزااااااف ، شكلو يجي كيما مقروط اللوز " شكلووو ^^ " ، بنتو هايلة ، و بزااااااااااااف خفيف و إقتصادي جدا تاني ☺
المقادير :
250 غ زبدة " فلوغيال " .
100 غ فلان فاني
2 صفار بيض
بيضة كاملة
1 خميرة
مبشور حبة ليمون " الأحسن يكون أصفر "
فرينة
الشاربات :
نصف كأس سكر
كأس ماء
عصير 2 حبات ليمون
التزيين :
سكر ناعم
ملمع غذائي ( إختياري ) .
التحضير :
نبداو بالشاربات : ماء + سكر ، نديروها فوق النار و نخلوها تغلي 10 د و نطفو عليها ، نزيدولها عصير 2 ليمونات ، و نخلوها تبرد .
العجينة :
نخلطو الزبدة مع الفلان حتى تمتزج تماما ، نزيدو صفار البيض و نخلطو مليح ، نزيدو البيضة الكاملة و نخلطو ، مبشور الليمون + فرينة و خميرة ، حتى تتشكللنا عجينة طرية ، باالاكو تيبسوها ، لموها حتى تولي كيما عجينة الصابلي طرية و خفيفة .
خلوها تريح شوية ، شكلو حربوش ، قطعوه مقروطات متساوية ، رشو السنيوة بشوية فرينة ، حطو الحبات متباعدين شوية ، و طيبوهم على حرارة 160 درجة مدّة 7 – 8 د ، غير قيس ما يولو يتشققو ، و نحوهم
خلوهم فالسنيوة شوية حتى يبردو ، أومبعد نحوهم ، خلوهم يبردو تماما ...
وجدو السكر الناعم مغربل
الحبات سووهم بالموس من الجناب إذا شفتو الشكل تبدل شوية ، باش يجونا مقروطات شابين ..
غطسوهم فالشاربات ، خلوهم واحد 15 ثانية هكذاك ، و نحوهم قطروهم شوية برك ، و رمدوهم فالسكر مليح ...
عند التقديم جيبو صفاية فيها سكر ناعم و رشو عليهم ، و من فوق رشو ملمع غذائي ، هاذي اختيارية الي يحب يخلي المقروطات تاعو سامبل يخليهم ^^
هذا ماعنديش صور تاعو :/ مع اني نديرو بزاف ، و راني دايرة منو للعيد ان شاء الله ، بصح وجدت غير العجينة برك و خبيتها ، حتى قريب العيد ان شاء الله نديرها فالشاربات و نسكرها .
نصائح :
- ماتكثروش الفرينة فالعجينة باش يجيكم خفيف .
- يستحسن كثيرا يكون القارص أصفر لأنو الأخضر شوية مر ، لكن أكيد إذا مالقيتوش استعملو الأخضر عادي ، لكن ماتكثروش منو .
- القاطو يكون بارد و الشاربات باردة .
- ماتخلوش القاطو يشرب بزاف باسكو راه يتحرحر كااامل ، غير قيس مايتشمخ شوية .
- الي تحب وصفة بوسو لا تمسو ، تستغنى عن الليمون تماما ، تستبدلو بالفاني فالعجينة ، و بدل الشاربات تدير ماء الزهر ^^
و يكون عندك ألذ و أخف بوسو لا تمسو ان شاء الله
بصحتكم

Nour

عماني نور · 2015-07-12, 22:20

الطلية :

وصلنا للمسقي ظوكا هههههههه ، وصلنا لأكثر حاجة يفشلو فيها بزااااااف بنات و حتى نساء ، و ماشي عيب لأنو الوصفات بزااااااف ، و مانعرفوش وين راهي الناجحة فيهم و الأهم الي ماتيبسش مهما طولت ....
أنا عندي 3 وصفات معتمدتهم ، نبدل بيناتهم حسب الحاجة ، يعني إذا قاطو ساك مثل الصابلي ، ندير وصفة الطلية بالحليب
إذا قاطو تع مناسبة مهمة بصح الكمية قليلة : ندير طلية روايال
و إذا مناسبة بصح عندي كمية كبيرة ندير الطلية تع السيرو
ظوك نحطهوملكم كامل ، بالتفصيل ، و نتوما خيرو منهم الي تحبو و الي تساعدكم ^^

1/ طلية الحليب :

وصفة مضمونة و بزاااااااااف ناس معتمدينها ، المليح فيها أنها فم فم تنشف ، خفيفة ، بنينة ، تصلح للحلويات الجافة و حتى لحلويات المناسبات
لكن الي ماشي مليح فيها أنها تبدا تطلق اذا طولت ، يعني تميه شوية ، و حتى طعمها يتبدل ، و إذا حطيتي الحبات فوق بعضاهم راهي رايحة تفسد تماما .
لذلك يتسحسن أنها تستهلك في أقرب وقت ، يعني ماتفوتش أسبوع ....

المقادير بسيطة : ديري كيلة حليب سائل بحرارة الغرفة ، كيلة زيت ، كيلة ماء الزهر ، شوية عصير ليمون ، خلطيهم مع بعض بملعقة ، و ابداي تزيديلهم في السكر الناعم المغربل بشوية حتى تولي ثقيلة ...

الطلية تاعك باش تعرفيها بلي راهي واجدة و مليييحة ، تولي ثقيييييييلة ، بمعنى لوكان ترسمي رقم 8 بيها تبقى مدة باش تسيح ، هكذا باش تجيك طلية و عليها الكلام ، ماشي غير تثقال شوية خلاص تطلي بيها ، لالا هكذاك رايحة تجيك شفافة ، يتسمى ماشي ناجحة ، زيديلها السكر حتى تثقال مليح و اخدمي بيها .
كي تجي تطلي ، ديري مشبك ، اذا ماعندكش استعملي المشبك تع الكوشة أو الثلاجة ، ديري سنيوة نقية من تحت ، حطي الحبات فوق المشبك ، اذا كنت مبتدئة أبداي بعدد قليل 3 حبات .... ديري فوقهم مغرفة كبيرة طلية أو أكثر ، خليها تهبط شوية ، و احكمي المشبك من الطراف و اخبطيه غير بلعقل باش تهبط الطلية مليح و تتغلف كامل الحبة ، شوفي الحبات تاوعك من كامل الجوانب باش تتأكدي بلي اتطلات كامل
غير تهبط الطلية مليح ، يهبط الزائد منها ، نحي الحبات غير بلعقل ، ارفديهم بفورشيطة من تحت و حطيهم في سنيوة ، و خليهم ينشفو مليح .
بعد ماينشفو تماما ، ارفدي الحبات تاوعك تلقاي فيهم بعض الزوائد تع الطلية يعني شكلهم غير متناسق ، احكمي موس و بداي تنحي فالزائد ، غير بلعقل ...
الحبات ظوكا كامل راهم شكل واحد ، متناسقين و شابين ، جيبي ملمع غذائي ، و بواسطة فرشاة أو اسفنجة أو صبعك اذا ماعندك لا هاذي لا هاذيك ، فوتي الملمع على الحبة كامل ، و زينيها كيما تحبي .
هاذ الخطوات تديريهم مع نوعين الطلية الي رايحة نكتبهم ظوكا اووووك ؟؟

الوصفة الثانية :

2/ طلية الشاربات
الشاربات : كيلة سكر + 2 كيلات ماء
سكر ناعم مغربل
2م ك عصير الليمون
2 م ك ماء الزهر
بياض بيضة
التحضير : نطيبو الشاربات ، ماء + سكر و نخلوهم يغلو 10 د ، نحطوها بجيه و نخلوها تبرد تماما
ظوكا هنا على حساب كمية القاطو الي عندك ، إذا بزااااف ديري كمية الشاربات الي عندك ، إذا كمية قليلة ، خذي مقدار فنجال صغير تقريبا بزاااف ...
حطي الشاربات ، زيديلها السكر حتى تتماسك مليح ، هنا زيديلها بياض بيضة ، ماء الزهر و عصير الليمون ، إذا لقيتيها ماهت بزاف زيديلها السكر الناعم المغربل .

نصائح : ماتستعمليش أبدااااااااااا الفوي في نحضير الطلية ، لأنها تديرلك فقاعات هواء تفسدلك شكل الطلية تاعك .
ماتديريش الطلية مايهة و شفافة لأنك راكي تخسري فالسكر تاعك بااطل ، يا تديري طلية و عليها الكلام ، يا ماكالاه ^^

إن شاء الله إذا اتبعتِ النصائح هاذي نأكدلك بلي تخرجلك طلية هااايلة شكلا و ذوقا ان شاء الله ^^

بقاتلنا آخر وصفة للطلية ~

3/ طلية روايال :

هاذي طلية هااااااااايلة ذوقا و شكلا و لمعانا ، تقولي راكي تاكلي فالفوندون ماشي طلية ، هي تطول باش تنشف بصح نتيجتها رووعة ، تصلح للمناسبات ، و الحلويات الي تتهلاي فيها ^^

المقادير :
- بياض بيضة .
- نص فنجال عصير ليمون يعني عصير حبة ليمون تقريبا ( حبة متوسطة ) ، ديري تقريبا 4 ملاعق كبيرة .
- نفس الكمية ماء الزهر .
خلطوهم مع بعضاهم شوية برك ، و ابداو تزيدو في السكر الناعم المغربل بشوية حتى توليلنا طلية متماسكة .

الملاحظات : الملون نستعملوه بعد ما نكملو كل كمية السكر ، باش يعطيلنا اللون المطلوب .
أنا شخصيا نستعمل منكهات في الطلية ، يعني اذا كنت دايرة قاطو باللوز ، ندير قطرة منكه لوز فالطلية ، صدقوني تعطيك طعم راااائع ، و الحلوى تاعك تعبق من بعيد .
و اذا درت صابلي أو مخبز الفلان مثلا : ندير نكهة الفراولة في الطلية تاني النتيجة تكون هاااايلة ، جربوها و اعطوني رايكم

بهذا نكون آنساتي سيداتي كملنا الموضوع ~ نتمنى يكون عجبكم ، و نفعكم ياااااااربي .....
نستنى تطبيقاتكم ، أسئلتكم ، تعليقاتكم ... و حتى انتقاداتكم و إضافاتكم أكيد ...
و ماتنسونيش من دعواتكم حبوووباتي ، أدعولي بالتسهيل في كل الأمور و التوفيق و الهداية يااااااااااااااااارب

حبكم كاااااااااامل
Nourita ♥

إنتهى