استفسار من المتزوجين

[مشكلتي]

السلام عليكم
عندي سؤال ؟
عرسي في شهر ماي ان شاء الله و زوجتي ماكثة في البيت
فكرت بعد الزواج باقتطاع مبلغ من راتبي و اعطيه لزوجتي شهريا لتشتري به ما تحتاجه
هل هذا ضروري ؟ و كم قيمة هذا المبلغ علما ان راتبي لا يتجاوز 35000 دينار و لدي التزمات و فواتير شهرية
اتمنى ان يكون الرد من طرف المتزوجين و ذوي الخبرة
بارك الله فيكم

[زبدة ذايبة]

ماتعطيلهاش

المرأة يفسدها المال سريعا

خليها تحت قبضة يدك أحسن

كلما أحسنت القبض كلما كان بيتك مستقرا

المرأة مثل الأسير ماعتدو حتى تفكير سوى أنه ياخذ حريته.

لذا إنتبه.

بداية الزواج تسير طريقه.

خليها دائما في حاجة إليك وماتستغنيش عنك.

صنف العلماء المراة مع السفهاء الذين لايجب ان يعطى لهم المال.

لأن أغلب النساء خاصة الآن تفكر في المكياج والملابس أو الهدايا أو .......

قليل من النساء اللي تكون عاقلة وتعرف تسيير أمور بيتها.

ماتبداش معها من السقف.

تبدى معاها مزير وترخي بالشوية خير من تبدى مرخوف ماتقدرش تحكم. هذاك النهار يكون خلاص تكون هربت من بين يديك وماتقدرلهاش.

الكثر من النساء يجو يكتبو افكر في الطلاق.

لهذا يا أخي.

ماتعطيلهاش الدراهم

وإذا عطيتلها تكون عارف وش رايحة تشري.

ماتخليش الأمور تسيب لأنك إنسان محترم.

مع أن المرأة تُظهر أنها تكره الراجل المزير إلا أنها في قرارة نفسها تكره الرجل السايب والغافل و الضعيف وتحب الرجل الراجل.

لأنه يشعرها بالأمان فلا تضطر للالتفات لرجل آخر لتبحث فيه عما تفقده في زوجها.

من النهار الأول كون راجل عليها وماتعطيلهاش اكثر مما تستحق

مع معرفة حاجاتها ومتطلباتها بالمعروف.

وتبقى المودة والرحمة بين الزوجين هي شعار كل زوجين مؤمنين صالحين

هذا مالدي في انتظار رأي باقي الأعضاء.

رب يباركلك ويهنيك ويرزقك الذرية الصالحة.

بارك الله لكما وبارك عليكما وجمع بينكما في خير.

[محمد جديدي التبسي]

قطعت جهيزة قول كل خطيب
الأخت فوق عطاتك زبدة الكلام يا أخي انت مرتبك يعتبر متوسط ان لم نقل ضعيف كيف تعطيها منه كل شهر
انت ما تبخلهاش ووفر لها ما تحتاجه من ضرورات مأكل وملبس وما تقدر عليه من كماليات وان كانت هناك مناسبة ولا معروضة لمكان اعطيها مبلغ معين وخليها دايما محتاجة ليك هكذا تضمن ولائها هذا هو الزواج في بلادنا المرأة تحللها العين طفرت لا يرضيها شيء وهن كافرات للعشير كما تعلم لو أحسنت الى احداهن سنوات ثم رأت منك شرا لقالت ما رأيت منك خيرا قط..ربي يهنيك.

[توحيد الجزائرية]

انت ما جربت زوجتك ..وتجهل معدنها

ومادام ليس هناك اولاد فلا حاجة للمال

لكن ابقاء مبلغ من المال بالبيت امر ضروري ..تحسبا للظروف ..

[ninaricci]

علاه عليكم هكذا المراءة تفرح كيما يعطيها زوجها وهي ماهيش خدامة يعنى ما عندو ما فيها اذا اعطاها و ربي راح يزيدو و المراءة تحب خصوصيتها يعني تحن علي امها مرة على مرة ما عندو ما فيها اذا عطيتها حتي 2000 الي 3الاف دينار وشوف واش دير بيهم راح تلقاها ياحنت على امها ب1000دج داتها قضية ولا دراهم و الباقي ضرك تشريهم ماكياج تتزينلك بيه انت جرب وشوف

[محارب الحمق]

الأمر ليس على المطلق بل نسبي حسب نوع المرأة. هناك من النسوة من يكن سببا في افقار ومديونية أزواجهن وهناك من هن سبب في اغنائهم وإعانتهم على أعباء ومصاريف البيت. أنا نعرف اخ يمد الشهرية كاملة للزوجة تاعو لأنه كثير الانفاق وهي تنفق بعقلانية والعكس يمكن أن يحدث. الأمر نسبي

[عثمان الجزائري.]

لست متزوج و لكن هذا لا يحتاج لأن أكون متزوج فالجواب متعلق بالظروف المادية و يكون حسب الحاجة و يمكنك أن تقرأ أحد التعليقات عن التي تحن على أمها !!؟؟؟؟ و قس على ذلك

[النجمة القطبية]

والله يا اخي تعجبت للاراء اكثر مما تعجبت للموضوع نفسه !
يا اخي انت عندك طريقين وانت داخل على حياة جديدة
اما انك تسبق النية الحسنة وحسن الظن وتكون انت وزوجتك يد واحدة هي سندك ووانت سندها في الحياة وتعيش الحياة اللي تحلم بيها
واما انك تمد ودنك لمن هب ودب وصدقني اغلبهم عايشين في ضنك ولم يعرفوا السعادة الزوجية ويبداو يعمروا فيك انت الراجل وزيرها ووووو ولكن في النهاية النتيجة راح تحصدها وحدك واتحدى انهم عايشين في سعادة وهم يطبقون ما ينصحون !
انت سبقت النية اخي وادا حبيت الحق راح تحبك وتحتارمك ومتخافش قد ما تحبك قد ما سيكون لصالحك
شوف نصيحتي املك قلبها بكل فعل فيه خير وممبعد راح تولي خاتم في صبعك احسن ما تعيش تخاف منك وترتعب في وجودك وفي قلبها تكرهك
انت نويت مثلا على الاقل 1500 دج ماراح ينقصوا فيك والوا
واصلا ادا ماكانتش تخرج وحدها اغلب الوقت راح تدخرهم لوقت الحاجة مثلا زيارة لبيت اهلها او شئ طارئ
وفي النهاية ننصحك مرة اخرى فكر مليح راك في اخطر مرحلة وهي مرحلة ما قبل الزواج راح يجووووك نصائح بالهبل من الناس بعضها لصالحك واغلبها حسدا نصيحتي متسمع لحتى لواااحد انت راجل طول وعرض وتعرف تسير حياتك وتعرف واش يخرج عليك واخطيك من التجارب اغلبهم فاشلون
شوف انت كيفاه تنجح في حياتك وخلي سرك مع مرتك في بير ادا حاب تنجح
وفي الاخير ندعيلك بالنجاح والسعادة والتوفيق

[آسيا 25]

السلام عليكم
خير الكلام ما قالت الأخت نجمة قطبية بارك الله فيها, كي تعود في المرأة يقولولها راجلك طيعيه خليه يعفسك هو و ماليه و أسكتي كون تريكلامي ماكيش مليحة و بيعي ذهبك عليه بصح كي تعود فالراجل ما تمدلهاش ما تدللهاش زيرها نعتلها العين الحمرا ربي يهدي ما خلق الحمد لله حمدا كثيرا أنو رزقني بزوج سيد رجال عمرو بخلني بحاجة ربي يحفظهولي إن شاء الله كل مرة أقتنع بلي ربي رزقني جوهرة ناذرة.

[ابو سليمان10]

ان كانت من النوع المبذر فلن تنتظر حتى تعطيها بل ستستهلك راتبك كلها + ديون خارجية
و ان كانت عاقلة فانصحك باشراكها في تسيير مزانية البيت

[سميرة3940]

ما فيها والو اذا اعطيتها من الشهرية و القيمة حسب مقدور

[siliine]

ادا اعطى الرجل من ماله لزوجته فهدا لبس عيبا ممكن يعطبها وهي تسرفهم غير على البيت فمن عادت الوجة تحب تشري اواني او افرشة قبل ماتتفكر تشري لنفسها لما كانت في بيت والدها كان الوالد هو لمد لبنتها لكن لما فهي ملزمة على زوجها وهكدا تحس المراة بالفرح مهما كانت قيمة المال قليل او كثير

[هـــدوء]

أيا كانت طبيعة زوجتك مبذرة,بخيلة أو مسرفة
أنت مجبر تمدلها مبلغ مالي يكفي كل حاجاتها شهريا
مش طواعية و لا مزية منك راه واجب عليك..
أنت لي عليك تمدلها حقها و هي حرة فيه طيشو تحرقو تبذرو واحد ما يسالها...
المرأة قبل ما تزوجها كانت معززة مكرمة في بيت باباها..
و لازم تلقى نفس العز أو أكثر في دارك (حسب مقدورك)و إلا تكون مقصر...
إياك تقول راهي ماكثة ماتحتاج والو يعني غير توكلها و تشربها خلاص
راهي كائن حي كيفها كيف غيرها
تحب تلبس و تعيش حتى لو بين أربع جدران
و أحيانا تشتهي أمور معينة و يكون محرج ليها أنها تطلب منك كل مرة

[انغام المنى]

مافيها والو انك تعطيها ماشي حاجة كبيرة بصح اكيد رايح تفرحها بهذا الشيء ورايحة تحطهالك جميلة فوق راسها واذا حبيت كل شهر تفكرها بهدية صغير رايحة طيرها بالفرحة والحمد لله مزالو رجال زيك

[kacimo.samy]

السلام عليكم

اخي اعطيها

نعرف واحد دايما يمد لزوجته ونهار احتاج وتزيرت عليه
جبدت الدراهم كانت تلم فيها والله شوكاتو
يا خويا انت نيتك صافية وان شاء الله تكون هي اهل ليها
ودراهم لي تعطيهلها زايدة فيك
ومثال على ذالك امي اي تشري الماعن بيها او تضيف اشياء للمنزل