كيفاش نتصرف

[مشكلتي]

مساء النور
خاوتي عندي مشكلة حابتكم تعطوني راكم واش ندير وكيفاش يكون التصرف الصحيح
عندي صحبتي عزيزة عليا بزااف ..وهي مخطوبة من 3 سنين وكانت عندها مشاكل مع خطيبها ووصلت لانها حبت تفسخ الخطوبة ولكن اهلها رفضو لانه قريبها واصلحو بيناتهم المهم انا كصديقة مقربة كانت تحكيلي كلش وحسيت انها تدير في سبايب باش تبطل المهم هادي من بعد عام خطبة والعام الثاني تحسنت علاقتهم والان ف هاد العام الثالث تبدلت ما عرفتهاش كااامل ولات تتعامل معايا من بعيد بعيد لانها بدات تتبدل في لبستها ( لاني ملتزمة بالحجاب الشرعي وهي تلبس حجابات مستورين وديما ننصحها تلبس الحجاب الشرعي وهكدا ) مالا بدلت ستيل لبستها ولات الجيب المزير ولات كل مرة حاجة وانا صبرت وليت نقرب ليها باش ننصحها وهي تبعد ...واحد المرة نلقاها مع واحد في الجامعة هدرت معاها وقتلها وشا يحوس ولات تقولي والو علجال القراية و مدلي دروس نسحقهم و و مهم انا درت روحي صدقتها مرة اخرئ نلقاها مع واحد اخر في الجامعة وهادا صديق ليهافي الفيسبوك قاعدين في ركنة بعيدة وقعدة نتاع زوج مصاحبين مش قراية ني والو مرة اخرئ ثاني يتمشاو ودراعها لاصق في دراعو ويضحكو ويتلصقو ومرة اخرئ كي شغل شافتني وراها بعيدة شوي ولات تمشي بزربة وما علاباليش واش قاتلو سمعت يقولها واش بيها تلحق فينا هادي اتصدمت صراحة كيفاش هاد الشي وهي مخطوبة وعرسها بعد رمضان ما نقدرش نشوف حاجة هكا ونقعد ساكتة وهي بعدتني تماما من حياتها بسك عارفة روحها غالطة معليش بصح هادي خياانة ولا لا وراجلها هادا الي مسكين ما علابلوش كل باش راهي تدير وتخون فيه مش حرام يتزوج واحدة هكا من راجل لراجل وهي مخطوبة !!
كرهت هاد الحياة واش هاد الحرام ...واش ندير معاها انصحوني ربي يجازيكم وارجوكم احدفو الموضوع بعد 4 ايام من النشر

[biti]

االغلطة غلطة الاهل البنت حبت تفسخ و هم رفضو الله يهديهم
انت عندك تدعيلها لا اكثر

[ما وراء الطبيعة ؟؟؟؟]

الحمد لله انني قررت عدم الزاوج في الجزائر وساتزوج اجنبية أن شاء الله على الأقل الأجنبية لن تخدعك وتصارحك بماضيها

بصراحة كرهتونا في الزواج في البلاد هذي وهناك اسوء من قصة صديقتك تحدث في المجتمع كوارث يندى لها الجبين

[ايمان4]

ممكن البنت لا تحب من زوجووها به و تعتبرها طريقة للانتقام من اهلها نرجو من الاهل عدم فرض الشريك ....فقد يؤدي الى عواقب وخيمة
المهم انت مكان ما دخلك اجبدي روحك راكي تباصي عمرك ..... اهلها و خطيبها هم لي لازم يتخذو موقف ماشي انت ....

[Aliaf]

انصحيها مره وخليها بينها و بين ضميرها كبيره و تعرف صلاحها
انتي مثال للصديقه الوفيه الي كي تغلط صاحبتها تغير عليها و توقف معاها. ما عليك الا الدعاء لها بالهدايه
هادي خيانه عظمى و لكن ما بيدك حل اختي هذا مصيرها و يجي نهار و تخلص ثمن اللعب تاعها

[خالد عنابي]

نصحتيها وابت ابتعدي عنها عن سيرتها

المشكل راه ولى فيك انتي لي تدخلي في روحك فيما لا يعنيكي

عندها اهلها وولي امرها انتي خاطيك اديتي ما عليكي

[ياسمين تلمسان]

المشكل في أخلاق هته الفتات ربي يهديها

[عثمان الجزائري.]

أهجريها لعلها تستفيق، إذا رأيتها غيري طريقك، مري عليها و كأنك لم تريها و إن كان فيها خير فسترجع إلى الجادة، أدعوا لها بظهر الغيب...بخصوص خطيبها و الله من رضي ببنت لا زالت تدرس في الجامعة و زيد ماش مسقسي عليها فعليه أن يتحمل أنواع الخاينات كلها و إذا هو راقد على وذنيه خلي بصحتو الرقدة.

[عاصمة الضباب]

السلام عليكم،البنت هذه في غفلة كبيرة حتى وإن الزواج مفروض عليها فرضا هذا لا يبرر ابدا تصرفها هذا،بما أنها صديقتك وجمعتكم عشرة تحدثي معها لآخر مرة وانصحيها لآخر مرة فإن رفضت النصيحة أو لم تنته عما تفعل اقطعي علاقتك بها دون مقدمات،ولا تحاولي فعل أي شيء آخر...سمعة الفتاة لا تقدر بثمن،هادي راها رايحة فالخط ما تخليهاش تديك معاها،مسائل الشرف حساسة والواحد لازم يجبد روحو عليهم.البلا خطرات راهو يرمي روحو على الناس ......لكن ما تنسايهاش من الدعاء بالاك ربي يهديها،بالتوفيق.

[oum khokha]

سلام اختي انتي درتي اللي عليك وحاولتي تنصحيها و ماحبتش تسمعك نتي ادعيلها و سيي احكميها كي تكون وحدها و زيدي اهدري معاها بلاك ربي يهديها و لا روحي زوريها في دارهم و احكي معاها بلا ما تسمعو حتى واحد و انشاء الله ربي يجيب الخير ليك و ليها
اما باه تروحي تحكمي دارهم او خطيبها فهذي انا نشوفها غلطة راح تزيد من الطين بلة و الله يستر

المشكل ماهوش فالبنات تع هاد الوقت بل فالاولياء اللي خاطيهم الرقابة
و علاه الاجنبية راح ترحمك زعما ههههههه مانظنش لا قبل و لا بعد الزواج لانو القضية قضية مبادئ و اخلاق
البنت الحرة تع الصح هي اللي تصون نفسها و تعزها لانو قد ما تصون نفسها و تحترمها رايح المجتمع يقدر قيمتها
من جهة الحق البنات تع هاد الوقت الا من رحم ربي و هدا الواقع رانا نشوفو بعينينا بصح ربي يهديهم و يسترهم و يستر بناتنا هدا مكان

[ع.عيسى]

الله يبعد علينا البلا

[خالة امير]

أختي انتي ماكان مادخلك هاذي حياتها و ربي يسهل عليها...انتي ماكي خاسرة والو...غدوة تتزوج معاه والا مع غيرو وتعيش حياتها نورمال انتي لي تبقاي تحلي في مشاكل الناس...
مالا ننصحك خمي في روحك و في مستقبلك خير من تعمري راسك بالغاشي الراشي