اجراءات الطلاق

[مشكلتي]

انا امراة تزوجت في سن صغيرة 18 سنة بالرغم اني اصغر خواتاتي من رجل متدين و مقتدر ماليا لكن من يوم تزوجتو و انا حاسة روحي مانيش مرتاحة معاه حتى الناس اللي يعرفونا يتعجبو كيف رانا مع بعض و احنا عكس بعض تماما حياتي ديتها محاولات فاشلة في الحوار معاه و هو من النوع الساكت يعني يقتلني بالبرود و لكن من مدة اخطط للطلاق انقذ نفسي قبل ما يطرطقلي عرق معاه افكر كيف اذهب و اين ساذهب لاني لن اعود الى بيت اهلي مع 3 اولاد

[خالد عنابي]

الحكاية هذه المفروض تقوليها قبل الزواج وليس بعد الزواج

تعتقدين الموضوع لعبة تزوجت احس اني لم ارتح معه مالا نطلق ؟

وخاصة معك 3 اولاد ما ذنبهم لكي يكونو ضحية نزواتك واهوائك المتقلبة

وتعتقدين بيت ابوك راح يقبلو بيك مع اولادك مثلا ؟

[مياسم الصمت]

السلام عليكم ورحمة الله وبركاته
الأخت ما طرحته من سبب تفكيرك في الطلاق غير واضح اصلا
اختلاف وجهات النظر
هل تراها كافية لطلب الطلاق و انت أم لثلاث أبناء
انت تذكرين انه رجل متدين وهذه ميزة لللرجل
ميسور الحال وهذا ما تتمناه النساء
ماذا أقول لك يا أختنا
المراة في مرحلة من عمرها تعيش لنفسها ثم حين تنجب فانها تعيش لأولادها وتفكر فيهم اكثر من تفكيرها في نفسها

المشكل انك لم تتقبلي زوجك من البداية او لم تحاولي ذلك
بدليل انك قلت انكما متناقضان
هذه التناقضات يمكن التقليل منها مع العشرة ومعرفة كل واحد الآخر
تحضرني نصيحة كانت لأحدهم لسيدة تشتكي زوجها
" وازني بين مزايا وعيوب زوجك فقد تغلب كفة المزايا ''
ومن غير العقل ان تفكري في الطلاق لان زوجك ساكت او لا يناقشك او يقتلك بالبرود

يقتلك بالبرود خير من يقتلك بحاجة اخرى
لا تتركي وساوس الشيطان تتغلب عليك فتفقدي زوجك و أولادك و تفككي اسرتك
ربي يصلح احوالك

[om nour elyagine]

السلام عليكم ورحمة الله وبركاته أثر ذي موضوعي في قسم الحياة الزوجية بعنوان ماذا تعلمت من تجربتك في الزواج لاتتسرعي حبيبتي تحملي زوجك لا تكوني أنانية لديك 3 أطفال

[عثمان الجزائري.]

البرودة في التعامل فن لا يتقنه الكثير من الرجال و شخصيا أعتبره من أحسن الميزات التي يتمتع بها الرجل خصوصا في العلاقات الزوجية، لن ينصحك أحد بالطلاق أو الخلع إن صح التعبير لأن كل الأسباب التي قدمتها تعتبر واهية و لا ترقى أن تكون سبب للإنفصال و تضييع الأبناء،.

[طيور الجنان]

اختي الكريمة اذا كان زوجك متدين فاحمدي الله سبحانه و تعالى و اختلاف وجهات النظر موجود دائما بين اي زوج و زوجة يوجد اختلافات فكري في اطفالك ماذنبهم لو فكرتي قبل ماجيبي اول طفل دوك حياتك في اطفالك اختي خممي مليح الطلاق ماشي حل علاش تيتمي اطفالك و باباهم عايش و تأكدي ماكان حتى واحد راح يعامل ولادك بحب اباهم بالتوفيق و ربي ينورلك طريقك اااامين

[FATIHA131]

ماتكونيش انانية خمي في ولادك
روحي شوفي المطلقات كيفاش عايشين ولا الارامل
تولي تحمدي ربي الليل مع النهار
وباش رايحة تعيشيهم بالنفقة ؟؟؟
الله يهديك ويصلح بيناتكم

[hanan7]

تذكري يا أختي من تطلب الطلاق بدون عذر شرعي أو سبب خطير فهي لن تدخل الجنه ولن تجد ريحها !

[mobilisoud]

لا حولة و لا قوةالا بالله..........

عايشة معاه في بيت واحد و سرير واحد و تخططين كيف تتخلصين منه.........
زمان الخبث و العجائب.

[ام رضوان]

السلام عليكم
ربي يهديك اختي ويصلح بالك
يابنت الناس خافي ربي
يخي اللي يهرب من الاتساع يواليه الضيق ولا؟
كيفاه عشتي معاه قداه من سنة وانت محتملاتو وذرك كي عدتي ب3اولاد جات غنية في راسك وتحوسيلها على شطحتها؟
وزيد سبب طلبك لطلاق راهو مش مقنع
يابنت الناس راهم كاينين بنات الفاميليا وحراير وترقد بطريحة وتنوض بطريحة وتقولك مانيتمش ولادي نصبر على جالهم
وانت كي قلقك رايحة تطلبي الطلاق
راهم بناتكم اولاد ووين تروحي بيهم؟
اذا كانو ولادك ذكورا راهم يكبرو بلا اب والله والله والله نشيبولك راسك مع المجتمع اللي رانا فيه تخافي يخرجولك الطريق وانت امراة ماتقدريش وحدك هذا من جهة التربية فقط خلي اامصروف والمتطلبات
واذا كانو اطفالك اناث هاذيك طامة اخرى
تغفلي على البنات الطير عينك وهاكي علابالك
امالا اختي خمي مليح واحسبيها مليح ملييييييح
هاكي قاعدة في دارك وخلي وليداتك في دويرة باباهم يترباو تحت عينيه خير من تمرمديهم ويحاسبك ربي
ونقولك اختي والله ماكانش اللي متهني من اامشاكل في هذا الدنيا كل واحد ولا وحدة باه راه يعاني
بصح يلزم الصبر وربي مايضيع الاجر
واتعوذي بالله من الشيطان الرجيم راه دخل بيناتكم يخربلك دارك ويفرق بين زوجين ويطلع هو في الرتبة
امالا كونكي امراة وفحلة وكبري عقلك وماتيتميش وتهملي ولادك
ربي يصلح حالك ويهدي بالك امييييين

[زبدة ذايبة]

إعلانك لزواجك في سن 18 سنة يوحي بالكثير هنا

كنتي تمناي تعيشي كيما عاشوا صحاباتك وحباباتك

تعيشي لحظات المراهقة مع وش فيها من طيش ومن تهور وعواطف وهمية للطرف الآخر

مالقيتيش وش كنتي حابة

أو بالأحرى ماعشتيش وش كنتي حابة

لكن نقولك

لو تروحي لأي فتاة في سن 18 سنة الآن واسأليها

عن أقصى شيء تتمناه في الحياة

رح تقولك زوج صالح

ولو تروحي لأي فتاة فاتها قطار الزواج أو تزوجت متأخرة عن أقصى شيء تتمناه

لقالت :

نتمنى زوج صالح

تقولك خذي الحرية ، وخذي العلاقات الوهمية ، وخذي أي شيء وأعطيني زوجك

هذا اللي راكي خايفة منو وتسميه عرق يطرطق في راسك

هو العرق اللي راه يدفع فيك باش تخربي بيتك بيدك

نسيتي كلش راكي عايشة فيه

نسيتي أنك أم

نسيتي أن زوجك عايش معاك وقابل النقص اللي فيك والضعف اللي فيك

ممكن هو ساكت عليك ومايهدرش معاك لأنك ضعيفة في التفكير

مايلقاش وش يهدر معاك

ممكن ماتفهميش مليح ، وعقلك ناقص ماشي قادر على استيعاب أمور كثيرة

راه متحملك ومتقبل الوضع اللي راه عايش فيه معاك

وقيل هو اللي عندو عرق يطرطق على هذا راه ضارب النح مايهدرش

ممكن الأسلوب اللي تناقشيه بيه بدائي جدا ومايقنعوش

مقتدر ماديا قادر يجيب عليك وحدة في نفس السن اللي تزوجك فيه

وكأن الزمن بالنسبة ليه مامشاش.

بعد ماتزوجتي ودرتي الدار والأولاد حبيتي تعاودي ترجعي للمراهقة اللي كنتي فيها !!!!!!!!!!!!!!!!!!!

كل وحدة ومكتوبها

كاين اللي تتزوج في 18 وكاين في 25 وكاين في 45 سنة وهكذا

وش حبيتي ضرك ؟؟؟؟؟؟؟

يطلقك وترجعي بالأولاد لداركم

كي كنتي طايشة ومراهقة مافكرتيش تتخذي قرار كيما هذا

وكي كبرتي وليتي عاقلة ظهرلك تخربي دارك

روحي شوفي النساء وش راهم عايشين وكيفاش المرأة على جال أولادها تحارب الدنيا كامل

انت

الحمد لله ماخاصك والو ، بدارك ، وبزوجك ، وبأولادك وبمالك ماشاء الله

وش خصك ؟؟؟؟؟؟

خصك لخراب برك

حبيتي تجربيه كيفاش داير

حاولي تلقاي نقطة اتفاق وتلاقي مع زوجك

وثقفي نفسك بالمطالعة وباقراءة يتحسن وضعك خير

من 18 سنة زواج مانظنش قريتي

ديري في بالك مليح أن زوجك هو اللي راه متحمل ماشي انت

ما عندك حتى دليل على أنك انتيا راكي متحملة.

ماراه يضرب فيك ، ماراه يخدع فيك راكي ماشاء الله كي السلطانة

الحاجة الوحيدة اللي لقيتيها كعيب ومشكل وسبب للطلاق سكوته وبروده

كل هذا بسببك انت

عوض ماتحسني من روحك اتهمتيه هو بأنه بارد ولايتكلم

انت السبب

ماعرفتيش كيفاش تشديه ليك يولي يهدر معاك بدون ملل ويتناقش معاك

لقاك فارغة مالقالك حتى حل سوى السكوت والبرود من جيهتك


شحال ساهل ااتهام الآخر مع أنه كان من المفروض تراجعي روحك أولا وتعرفي علاش راجلك راه هكذا

لو كان جات مشكلة خيانة أو ضرب كنت ندافع عليك لكن مشكلة أنت المتسببة فيها

لا لا ياحنونة مانشهدوش على باطل

إذا طلقتي ماركيش رايحة تلقاي الحب اللي راكي توهمي نفسك بيه خلاص انتهى الوقت

أم لثلاثة أطفال وش بقى ؟؟؟؟؟

الحب الحقيقي اللي لازم تتحصلي عليه هو حب زوجك

هو كذلك يفتقد معاك هذا المشاعر انت ماعطيتيهالوش

لو كان عطيتيلوا هذ المشاعر كنتي تلقايها عندو ويعاود هو يعطيلك منها

وفاقد الشيء لايعطيه

الزواج أخذ وعطاء

حطمتيلوا مشاعروا و بخلتيه بالعاطفة وخليتيه ساكت مايهدرش حتى في داروا

أبدا ماكان الزواج على عاتق شخص واحد

لو كان جا يكتب هو هنايا كنتي تشوفي وش يكتب عليك وتعرفي محلك من الإعراب في هذه العلاقة

اللي راكي تظني أنك انت اللي راكي محافظة على هذا الزواج ببقائك زوجة لهذا الرجل

راكي غالطة

زوجك هو اللي راه محافظ على هذا الزواج بالصبر تاعو وبالتضحية اللي راه دايرها على جالك وعلى جال اولادو

عاودي فكري في لملمة أشلاء بيتك وبقاياها

ماعندك وش تزيدي تخربي أكثر من اللي خربتيه

بقالك فقط الأوراق الثبوتية اللي تثبت أنك زوجة فاشلة هذا وش بقى

انتبهي مليح لبيتك

كي تخربيها انت واحد مارح يصلحها

عاودي راجعي تصرفاتك وأفكارك وعلاقتك بزوجك

راه صابر عليك ومتحملك في انتظار أنك تفيقي يوما ما وترجعي ليه كزوجة حقيقية كان يتمناها لما ارتبط بيها أول مرة


ماكالاش تقتليه بطلب الطلاق

ماتكافئيهش على محافظته على الحياة الزوجية بهذ الطريقة البشعة

روحي تقراي وتتعلمي وتثقفي تتحسن حياتك بإذن الله

روحي رتبي بيتك ، وأصلحيها ، وارجعي لزوجك وعامليه المعاملة اللي يستاهلها

كي تجي عند رجليه ماشي خصارة فيه

يخدم عليك وعلى أولادو بالشيء اللي يقدر عليه

وكي يدخل للدار يلقاك واجدة بالكآبة والهم والبكاء على المراهقة اللي ضاعت وماعشتيهاش !!!!!!!!!!!!!!!!

وتباتي تخططي كيفاش تهربي من الخير اللي راكي فيه وكأنك مراهقة همها نزواتها

جسد إمرأة وأم بعقل مراهقة لم تتجاوز 18 سنة

هو يروح يخدم ويجيب الشيء اللي قسمه الله لكم مافي بالوا حتى شيء ثاني سوى سعادتك وسعادة أولادك


باش تقابليه بمخطط طلب الطلاق ؟؟؟؟؟؟


لو كان بقيتي من غير زواج لسن الأربعين لو كان عرفتي وش معنى تكوني إمرأة بنهاية مفتوحة

لازوج ولا أولاد.

ماتلقايش حتى اللي يشهدلك كي تكوني رايحة تموتي

روحي صلحي أمورك ، وصلحي نفسك

اللي راكي تخططي فيها تهربي من دارك خططي فيها كيفاش تكوني امرأة صالحة

قال يطرطقلي عرق في راسي ؟؟؟؟؟؟؟؟؟

روحي تعلمي كيفاش تكون المرأة المسلمة وماهي حقوق الزوج

تعرفي روحك وين راكي ، وش من مستوى راكي فيه كزوجة

اقراي ردي ليك شحال من مرة و كذلك ردود الأعضاء

خلي عقلك يتحكم في قراراتك وكوني أم يفخر بيها أبنائها لما يكبروا

مايقولوش تزوجت في 18 وهربت في 35 سنة (ماعلاباليش شحال عمرك)

وتخليهم مكسورين ومحطمين على جال نزوة تافهة ، ووهم مازالكي عايشة فيه

وهم المراهقة الضائعة التي لم تعيشيها (بالنسبة ليك)

الله يعطيك لعقل ويهديك

[صُبح الأندلس]

الرجل هو الذي تجدينه أول يوم فإما ترضين بنصيبك و إما تفرين بجلدك لكن ليس مع 3 أولاد
مادامه لم يعجبك فلم أنجبت ثلاثة منه
اصبري أحسن من أجل أولادك تنازلي لو كنت وحدك ربما لكن معك صغار

[ruki]

خممي في اولاد...خصوصا انك قلتي "اين ساذهب؟"
وحتى لوكان هو شرا...فكيف تهربين من شر معلوم تعرفينه وتعودتي على التعامل معه ...الى شر مجهول قد يكون اسوء عشرات المرات....؟!
حاولي تعيشي حياتك وماتركزيش بزاف على السلبيات اللي فيه ولهي روحك بـ امور وهوايات تنسيك وماتتناقشيش معاه ...
اما اذا كنت متاكدة من قرارك وماش قادرة تصبري وطباعو لاتحتمل حقا ... وعندك كيفاه تعيشي انت واولادك بعد الطلاق بكرامة فالاخت اعلاه اعطاتك تفاصيل الطلاق ~
خممي مليح خيتو ...ربي يفرج عليك ~

[قدور بن عاشور]

شوفي واش كتبت لك زبدة ذايبة و أم رضوان، و اقراي و عاودي.

[توحيد الجزائرية]

لا دخل للسن في الخلاف بين الزوجين
لبنات 17و16سنة يتبرجوا ويسعاو لامور يندى لها الجبين من زنا وخنا
يعني على العهر كبيرة وعلى الحلال صغيرة ؟
هذا التفكير هو الذي ضيع المجتمع :
ماتتزوجيش اخدمي..
اطلقي واخرجي تخدمي..
ردي بالك يتحكم فيك الراجل ....
والنتيجة عوانس يضاهي عددهن بلدان الخليج..
واي فتاة تتعلم ثم تخدم ثم...ويفوت سنها 40تتحسر على الزواج وينشئن علاقات محرمة حتى وان كانت مع القريب كأخت شقيقتها او زوج عمتها ...
صح الزوج الذي يتصنع البرود صعب ..وهو يريد من ذلك ازعاجك يعني (يمرضك)
يعني تجنبي هذه النقطة بالذات وجددي حياتك واجعلي لك اهتمامات كتربية الاولاد..حفظ قرءان ..تعلم ...