طعام او سكسو باللحم مرقة حمرا و خضار بطريقة الاعراس القبائلية

[انا هي رزيقة]

السلام عليكم . اليوم جبتلكم الطعام او السكسو بااللحم بالمرق الاحمر و الخضار طبقي المفضل على الاطلاق . راني طيبتولكم بطريقة الاعراس القبائلية طريقة ساهلة و بنينة موووووووت غير امنوني و اتبعوني ....خخخخخ

هذي المقادير نظن انها واضحة بلا منهدر بزاف
هذي مقادير لعائلة متكونة من حوالي 12 فرد و انتوما عينكم ميزانكم نقصو او زيدو

نبداو على بركة االله

خذي قدر مليان الى النصف بالماء و حطيه يغلي
و نقي كامل الخضار تاعك و غسلي اللحم

كي يبدا الماء يغلي ارمي فيه االلحم تاعك مع الحميصة و البصل و الطماطم مقطعين صغار مشي مرابييين باه جيك الصوص صافية جميلة

ثم زيدي الملح و فلفل اكحل و فلفل عكري و راس الحانوت و كسبر و ملعقة كبيرة طماطم مصبرة . هنا نقولكم ملاحظة في إحدى العطل رحت لسطيف شريت من ثم توابل يقولولها "افاح " و درت بهم طعام خرجلي هبال و االله سكر . اذا لعندها افاح تديرو و بنة طعامها مضمونة.

بعد ميعاود الماء يغلي و التوابل تبدا تفحفح حطي الزروديا

و خلي المرق يطيب على نار متوسطة . في هذا الاثناء نغسل الطعام تاعي و نحطو يستقطر في كسكاس و نحط ثان اللوبيا تاخذ غلوة وحدة في كاسرونة باه يتنحالها هذاك الماء لخضر باه ميخسريش المرقة ثم نخليها بجيه

نفرغ السكسو تاعي في قصعة و نفتح الحبات ما بين صباعتيا و نحطو يفور التفويرة الاولى كي يفور مليح نرميه في قصعة و نحطلو الملح ثم نفرغ الماء بالشوية حتي يولي شغل راه مشمخ و ثقيل شوية ما بين يديك هنا زيدي فيه حوالي 3 مغارف زيت زيتون و خلطيهم مليح و غطي عليه بقماشة نظيفةالمرقة تكون راهي تطيب منذ حوالي 30 دقيقة نرمي فيها اللوبيا. و هنا نسيت االلفت في المقادير زدت رميته مع ديك االلوبيا و نخليهم يطيبو مع بضاهم. بعد حوالي 15 دقيقة زيدي الكورجيت مع البطاطا . و خلي يزيدو يطيبو
الهدف من وضع الخضار واحد تلو الاخر هو باه كل خضرة تحتفظ بالقوام تاعها و متذوبش في الصوص . بعد حوالي 15 دقيقة طلي على الصوص تاعك و ذوقيها و شوفي كاش متزيدي ملح او توابل او ماء لازم الماء يكون مغلي و شوفي اذا االلحم طاب ايضا .
هنا خلاص طابت المرقة تاعي هاوليك الطعام وجد مدو يديكم متحشموش لي يحب يزيد المرقة هايليك تم بحمد االله و لي عجبها الموضوع دعوة خير ليما لي علماتلي الوصفة و ليا كطبقتها بحذافيرها تكفينا و لكن بالمثل حبيباتي

نزيدلكم هذه الصورة لطعام بنفس الوصفة فقط مدرتش اللفت