اقتباس:
المشاركة الأصلية كتبت بواسطة Lali13Smith
السلام عليكم
كنت الأسبوع الماضي الى تركيا تحديدا اسطنبول مكثت مدة اسبوع هناك والله روعة
وهأنا جئت ارد الجميل للمنتدى بالرد على استفساراتكم وأسئلتكم  تفضلوا
بخصوص الفيزا رجعت فيزا الكترونية من الوكالات لكل الأعمار
وبخصوص الطائرة انصحكم بالخطوط التركية لان الجزائرية ميزيرية وهماج وسرباو الويسكي فالروتور
اللي رايح المرة الاولى تاعو من الاحسن يروح مع وكالة سياحية
البرد صح كاين بصح متحسلوش نورمال كيما البلاد
التراكا فيهم وفيهم كيما حنا والسورين بعدو عليهم قدر الامكان
الامن موجود في كل مكان
كاين فنادق غير مصنفة في السلطان احمد لكن جيدة الغرف نظيفة ويفي دوش فطور صباح ب 20 أورو لليلة
الصرف في البايازيد هو الأفضل انا خليتها ب 410 ليرة لل 100 أورو
اللغة ماش مشكل نعتلو بيدك برك وكاين بزاف اللي يتكلموا انجليزي
راح تلقو اللي يبعو الريحة فالطريق ب 10 و20 ليرة متشروش عليهم غير الماء
فالمطار صرف 20 اورو فقط باش تشري كارت اسطنبول تاع الميترو والطرام وشحنها غي بالعشرين ليرة باش كي ترجع متخليش فيها وكاين بلايص تروحلهم برجليك ماشي شرط الطرام انا كنت نمشي من اقصراي حتى غلطة ماشي خطرة ولا زوج المهم تكون عندك خريطة تاع الميترو والترام
كاين الهواتف العمومية حدا محطات الطرام باش تعيط بيهم للبلاد تشري تيليفون كارت من الاكشاك دير 5 ليرة فيها 4 ليرة كريدي تعيط خطرة وحدة برك
الملابس الرجالية من غير الكلاسيك غير كيما البلاد والنسائية متكملش
اسعار الملابس رخيصة نوعا ما في سوق عثمان بيه ومحمود باشا واللي يحب الماركة يلقاها فالمولات
انصح وبشدة زيارة الاكواريوم و متحف رحمي
الاكل في المطاعم من 20 حتى 50 ليرة المشويات لذيذة كاين كفتة بالفرماج روعة الدونر كباب ايضا روعة
واكدولي على عصير الرمان هااايل الشاي والقهوة تاعهم ماشي حاجة
البقلاوة و الحلوة غالية بصح بنينة بزاف
الحلوة نتاع الهدايا اشروها من الكارفور ولا ميقروس
قبل ما تروحو سطر برنامج تاع كل يوم واش الدير
انا كنت نخلي الباسبور والدراهم فالكوفر نتاع الفندق نرفد فوطوكوبي نتاع الفيزا وكارت اسطنبول والخريطة و 200 ليرة فقط
الاكل يكلف وحد 100 ليرة يوميا بصح تتمولك فيها حتى الحلويات و كلش ههه
انا سقاملي الفواياج 12 مليون سنتيم رحت وحدي بدون وكالة وحجز الفندق كان من بوكينق ب27 اورو لليلة انا رحت نشوف الحالة راني حاب نبدا تجارة الكابة
كاش حاجة سقسوني ماش مشكل
واللي استفاد بكاش معلومة يدعيلنا ربي وشكرا
|
بارك الله فيك على هدا الموضوع المهم تركيا بلد جميل والسياحة فيها لها طعم أخر يختلف عن اي مكان في العالم ،
اسواق اسطنبول التي تقدم مختلف انواع البضايع بمختلف التشكيلات تعتبر منطقة لاللي Laleli في اسطنبول القريبة من أكسراي هي مركز تجارة الجملة للملابس يقصدها التجار من مختلف أنحاء العالم
( تقرير عن مشاركة سيئة )، و الموجودة أسفل كل مشاركة .
2017-02-03, 13:10
تركيا عن تجربة
العرض العادي
