علاش الحقرة

[مشكلتي]

السلام عليكم ورحمة الله تعالى وبركاته
خاوتي عندي اختي عمرها 21 سنة تزوجت في عمر 19 ولها ولد وشاءت الأقدار باش تطلق ورجعت لدارنا مع ولدها عايشة مع يمة وخاوتي ذكور 3 وأختي الصغيرة وأبي متوفي ربي يرحمو أما أنا فمتزوجة ولكنها من لي طلقت ولاو خاوتي الذكور يعاملو فيها كأنها مجرمة التلفون ممنوع والخروج ممنوع والانترنات ممنوع ومرة مرة يديرو حملة تفتيش في قشها كاشما زعمة يلقو تلفون مخبي ولا منعرف واش المهم وحد النهار مرض ولدها ملايكة بيبي عمرو عام برك طلعتلو السخانة حتى ولى يتقيء حاشاكم عطاها خويا الكبير الدراهم قالها اديه للطبيب ولأن هو خدام قالها روحي مع يمة، كيما كان الحال داتها يمة وراحوا للطبيب روح خويا المتوسط مالقاهمش عيط لخويا الصغير عمرو 24 وقالو راهي ماهيش في الدار روح الصغير سقسى اختي الصغيرة قاتلو راحت مع يمة للطبيب الفلاني خذا طاكسي وراح ليهم للطبيب روحهم ومع دخلو للدار قتلها بالضرب قدام ولدها يبكي ويمة تبكي كي قاتلو يمة خوك اللي عطانا الدراهم وقالنا روحو قالها مانستعرفش ماتخرجش تموت وما تخرجش والغريب خاوتي الآخرين ماهدروش معاه وهي جسمها كامل مزرق ومنفخ والجيران يسمعو فيه حتان ولو يديرو في الإشاعات في بالهم كاشما حكم عليها مسكينة رايحة تهبل وانا أكثر منها ما في اليد حيلة وهو ولا غير يتسبب عليها ولا يشوف في روحو رب الدار مع العلم هو خفيف بزاف منعرف علاش صابنا ربي بيه ،علاش الحقرة هاذي علاش، واش ذنب المطلقة في هاذا المجتمع وواش هو الحل في رايكم خاوتي ،تعرفو انا واش قلتلها قلتلها اشكي بيه بصح قاتلي مانقدرش ندخل خويا للحبس ، انصحوني خاوتي ولا ادعولها دعوة من القلب بجاه الحبيب المصطفى صلى الله عليه وسلم، والسلام عليكم

[أم رقية نسرين]

لا حول و لا قوة إلا بالله ربي يفرج عليها و ربي يهدي خاوتك سبحان الله مالقيت وش نقول

[riheb razane]

بدون تعليق لاحول ولاقوة الابالله حسبي الله ونعم الوكيل

[زبدة ذايبة]

الظلم ظلمات يوم القيامة

حسبنا الله ونعم الوكيل

صراحة مالقيت حتى تعليق على هذ الوحشية اللي في داركم

لكن

أختك ماعندها حتى حل سوى الدعاء ثم الدعاء ثم الدعاء

دعوة المظلوم مستجابة

والله عزوجل أقسم أنه يستجيب دعوة المظلوم

دعوة المظلوم تفتح أمامها أبواب السماء

قَالَ النَّبِيُّ صَلَّى اللَّهُ عَلَيْهِ وَسَلَّمَ : " ثَلَاثٌ لَا تُرَدُّ دَعْوَتُهُمْ : الْإِمَامُ الْعَادِلُ ، وَالصَّائِمُ حَتَّى يُفْطِرَ ، وَدَعْوَةُ الْمَظْلُومِ ، فَإِنَّهَا تُرْفَعُ فَوْقَ الْغَمَامِ ، فَيَنْظُرُ الرَّبُّ جَلَّ جَلَالُهُ فَيَقُولُ : وَعِزَّتِي

وَجَلَالِي لَأَنْصُرَنَّكِ وَلَوْ بَعْدَ حِينٍ " .

يا إلاهي وين راهم رايحين خاوتك

شكون اللي يقدر على رب العالمين

شكون يقدر على دعوة المظلوم

يا إما تدعي عليهم وعلى ظلمهم

يا إما تدعي لنفسها ربي يرزقها الزوج الصالح

الفرج قريب

هذا هول كبير

رب يفرج عليها ويرزقها من حيث لاتحتسب

[دنيا الامل 18]

ربي يفرج عليها تضبر وتدعي ماتدريش واش كاتب في المستقبل

[*أم سجى*]

حسبي الله ونعم الوكيل

[ام رضوان]

السلام عليكم
حسبنا الله ونعم الوكيل
شوفي اختي قلها تدعي ربي يكفيها شرهم وتقول ربي اني مغلوبة فانتصر
والله قسمتلي قلبي
بصح قلها ماتخافيش راهي الدنيا دواليك يوم لك ويوم عليك
وكما تدين تدان
قادر ربي يجيبهالهم في بناتهم واتاكدي ربي حرم الظلم على نفسو كيفاش يرضاه على عبادو
والله قسمتلي قلبي وخاصة كي قلتي ولدها يبكي راني نتخيل في المنظر والله يقطع القلب
ربي يفرج كربها و ينصرها ويحنن قلب زوجها ويرجعها ويلم وليدي اميييييين اميييييين اميييييين

[طيور الجنان]

ياختي مالقيت مانقول قلبي تقطع عليها وعلى وليدها مسكين ربي يفرج عليها بزوج صالح يهنيها من هاذ الهم و التسلط و خاوتك يجي نهارهم ربي يمهل ولا يهمل وان شاء الله يتزوجو نساء يوريولهم النجوم في النهار و الرجولة هاذي اللي يمارسوها على اختك ينساوها ربي وكيلهم.

[Davidcena]

ربي يفرج عليها انشاء الله

[خالد عنابي2]

وجاية تشكي هنا ؟ وش راح نديرولك ولا نديرولها ؟؟

كاين الطبيب الشرعي وكاين قسم الشرطة وكاينة المحكمة وكاين مؤسسة اعادة التربية

كيفاش ؟؟؟ ولدها مريض وداتو مع امها وبتوصية من خوهم الكبير ولاخر قالك مانستعرفش !!!

وهي تستاهل اكثر طالما هع ماتقدرش تدخل خوها للحبس

خلي مالا هو يدخلها للكوما ولا يديرلها اعاقة مزمنة

تبانلي اختك والفت بالضرب علابيها موش حابة تشكي بيه وتنتهي حلقات هذا المسلسل الممتع لها

ماكان حتى هدرة اخرى ضربها وزرقها = تشكي بيه ويدخل الحبس
يزيد يعاودها تزيد تعاودلو حتان يرشى فالحبس ولا يعدل روحو

صححي عنوان موضوعك علاش السكوت على الحقرة وليس علاش الحقرة !!!!!!!!!!!!

[T.HANANE]

ربي يفتح عليها ويرزقها بزوج صالح اللي يخرجها من الظلم واخوك ربي يهديك هو داير في بالو بلي راه يحمي فيها من كلام الناس لا يا اختي متوصلش وين تشتكي باخوها والله عيب برك تدعي ربي يهديه ويفرج عليها

[*أم كوثر*]

ربي يكون معاها ويصبرها ويعوضها خير

[فاطمة شلف]

لاحولاة ولا قوة الا باالله
الله يفرج

[عبروقة]

ربي يفرج عليها يارب ويعوضها بزوج يسترها يارب يا كريم

[KARIO]

و الله الحكاية قطعتلي قلبي في اي عصر نعيش, سمحيلي و لكن هي راهي قابلة بالذل, متدخلش خوها للحبس علاش هذا اخ, فات عليها الطلاق و اللي هو اصعب شئ تمر بيها المراة و مزالها تخاف و تساعف, قوليلها تشكي بيه باش يعرف حق ربي و خاصة هاذ النوع من الرجال اللي يمد يده على المراة صدقيني من الداخل هو اجبن من الجبن, و اذا مترباش ن المرة اللولة تعاود و تعاود باش يندعر, و اهم شئ تقفز مع روحها تحوس على خدمة شريفة تكفيها مع ابنها يالوكان منظفة لما يكون عندها مدخول يكون هو سلاحها, لوكان جيت فمكانها نموت من الجوع و نمدش يدي لهكدا اخوة جاهلين, الطلاق قضاء و قدر مراهش اجرام منيش مصدقة باللي مزال كاين ناس تخمم بهذه الطريقة, راني حاسة بيها انا تاني فات عليا الطلاق و راني عارفة واش معناه و لكن الحمد لله لقيت دعم اهلي و خاصة الرجال منهم و كانو بمثابة الدرع ليا و عمرهم محسوني باللي يحشمو بيا, و الحمد لله خرجت من الازمة اقوى من قبل, قوليلها دوام الحال من المحال و ان شاء الله ربي يرزقها بولد الحلال اللي يعوضها على كلشي قوليلها تتقرب من ربي و تدعيه هو الوكيل سبحانه