نحقر روحي

مشكلتي · 2016-10-19, 23:16

السلام عليكم ورحمة الله تعالى وبركاته
مشكلتي اني دايما حاقرة روحي نحس روحي دايما وحيدة ومهمومة في اى حاجة نحقر روحي ونشوف الناس كامل خير عليا الحمدلله على كل شىء اعطاني ربي عايلة وقراية ومايخصني والو مي عندي نظرة دونية لنفسي ثقتي بنفس ناقصة بزاف كل ملنتعرض لموقف نقعد غير نبكي ومانقدرش نرد الصرف كيما يقولو علاقتي باهلي الحمد لله بصح ماشي هديك الطفلة لتقدر تفضفض مع امها او اختها امي كبير ة في العمر تربيت في بيئة ماكانش لغة الحوار حتى مع اخواتي مانقدرش حاولت مدير صديقات بصح للاسف نتاع مصلحة ولا يكونوعقليتهم ماش كيما نتاعي صدقوني مرات نحس روحي معقدة خاطر تربيت على كلشي ممنوع لدرجة اني مرات مانقدرش ناخد قرار ونكون مترددة كيتصرالي حاجة نقعد غير نخمم فيها مثلا اول مرة يتقدملي واحد فرحت وقلت بداو يتحلو البيبان لكن للاسف انسحب هادي الحدثة وليت نرقد بها ونود بها وانا نطلع ونهبط وتانى قريب تخلصلي الكنترا نتاع الخدمة وانا من دوك وانا نقول كيفاش ندير وانا ماعندي لا دخلة لاخرجة نقعد في الدار عادي يفوت عليا ربع شهور مانخرش ماعندي وين نروح حاسة بلي حياتي والو الحاجة الوحيدة ليمريحتني هي علاقتي مع ربي الحمد لله ندعيه ليل نهار باش يخرجني من محنتي الحمد لله لا مارانيش خارجة الطريق ولا ندير في حاج ماشي مليحة

شمس 15 · 2016-10-20, 08:56

عندك حلك في الجملة الاخيرة انو علاقتك مع ربي ملييحة ادعيه يفرج عليك و يبدل حالك للاحسن لانو هو رحيم بك.

sousourose · 2016-10-20, 17:00

السلام عليكم
شوفي أولا شهدي واستغفري واسمعيني مشكلتك ماشي مشكلة انت هكذا لأنك تربيتي في بيت تقليدي محافظ كيما بزاف بنات تعودتي أهلك هوما اللي يقررو كلش معليش ماشي مشكل، اقراي كتب لتقوية الشخصية مثلا كتب الدكتور إبراهيم الفقي أما الباقي كيما العمل والزواج فمتخميش بزاف لأنو راح يلحقك واش مكتوبلك وماشي داخلة في شخصيتك، الله يكون في العون

تاج الهناء · 2016-10-20, 17:14

مادام راكي متواصلة معانا و قدرتي تطرحي مشكلتك بوضوح نصف المشكل حليتيه
ماتهمش علاقتك مع الناس على قد ما تهم علاقتك مع ربي سبحانو
ما لازمش تحملي نفسك الشي الي ما تقدريش عليه و ما ترضيش الناس على حسابك الي دارلك حاجة وكلي عليه ربي و ماكالاه اتهبطي النيفو تاعك و تردي الصرف اذا الناس ما تحشمش انتي ما تعانديهمش
لكان على الصحابات الي ساعداتك احكي معاها و الي ما ساعداتكش ادز معاهم واحد ماهو حاكم السما عليك
عيشي كيما يعيشو الناس كولي و اشربيو الباقي على ربي و ابقاي حاكمة في اصلك واحمدي ربي كي راكي من عايلة محافظة صح ما كانش حوار مي راكي واعية و ناضجة
ثيقي في نفسك و قدريها و حبيها اذا بغيتي يحبوك الناس و يقادروك

طيور الجنان · 2016-10-20, 18:42

كي عاد علاقتك مع ربي مليحة هذاك هو الاهم ماتخميش علىةالباقي ربي يسرلك حياتك .

اسعى لرضى الله · 2016-10-20, 23:31

سلام عليكم

اختي لازمك ديري ثقة في نفسك كيعاد كي مدييرش ثقة في نفسك راح يبين مع تعاملك من ناس يمالا ديما ديري ثقة في نفسك وراكي قلتي بلي مخصك والو وعلاه تشوفي لروحك بطريقة دونية الحمد لله راكي قلتي مدينة وكلش الحمد لله هدي حاجة مليحة ديما شوفي لحوايج لملاح في روحك ضرك بالشويا ترجعلك عادة وزيد حوسي في اليوتوب على ابراهيم الفقي وكيفاش تنمي ثقتك في نفس راهو يوتوب معمر بالتنمية البشرية وتطوير الذات اتفرجي وهزي نصائح وحاولي طبقيهم

وان شاء الله ربي يفرج عليك ويرزقك زوج صالح وتتعدل حياتك كما تتمنايها ويعوضك ربي على كل شي مش مليح فات في حياتك تفاءلي برك وقوي ثقتك في ربك وادعي وقومي الليل اختي

نتمنى نكون فدتك ولو بلقليل ربي يهنيك ختي

*أم سجى* · 2016-10-21, 14:00

اختي لازم عليك تتأكدي بلي هذالناس اللي من حولك ماهم إلا بشر لاحول لهم ولا قوة .وهم اقل منك شأنا وذكاء وجمالا ومستوى في الحياة الدنيوية وعند ربي كامل سواسية كي تقنعي بهذالشيء هذي راح تكون نقطة التحول وزيادة الثقة بالنفس .......أما باش تبقاي ديما عاطية قيمة للناس وقدر وماهم في الحقيقة سوى أذيال منتشرة في المجتمع فاعلمي أن هذا هو سرطان الثقة بالنفس .....ثقتك بنفسك تطوربها انتي بقدراتك متطالعي كتب متقراي دورات تنمية ماتحسي روحك صح مريضة مشكلتك تعالجيها انتي بقوتك الكامنة في اعماق نفسك .....تسلمي

زبدة ذايبة · 2016-10-21, 14:25

انت وش حبيتي !!!!!!!!!!!!!

لازم يكون عندك صديقات لازم !!!!!!!!!!!!!!!!!!! ماشي لازم

ماشي لازم نفضفضو مع الناس

ماشي لازم في كل مرة نرجعو الصرف في بعض المرات كي ماتجاوبيش تكوني رديتي الصرف والزيادة

حملتي روحك فوق طاقتها

وحبتي تكسري روحك بالجزء

بديتي بروحك ثم عرجت على الصديقات ثم خوتاتك وداركم

وكأني بيك شديتي فاس وين تلقاي حاجة صالحة تكسريها

ممكن انغلاقك هو اللي سببلك هذا المشكلة

ممكن عندك أسباب كامنة تخليك بهذا الشكل

تحاولي تقنعيني أن هذا الشخصية معاك من سنوات لا أضن

اللهم إلا إذا كان حتى أخواتك عندهم نفس المشكل اللي تعاني انت منه

كي تجي تشوفي هذا الدنيا ماتستاهلش هذا الحزن الكبير

تسحقي شوية شجاعة برك حتى تواجهي الناس

راكي تقولي الحمد لله ماخصك والو

انت عندك الخوف من الناس وزدتي لحقتيه بالخوف على الرزق وحلاتلك تضلي تبكي كي الطفل الصغير

تحاولي تغيري من نفسك ولا من حياتك لالا تفضلي تبقاي هكذا

ربما تحبي تعيش بدور البنت المظلومة والمقهورة

نقولك حاجة

صدقيني

واحد مايحوس عليك.....واحد مايبكي معاك الناس كرهت من الهم

ديري جهدك تخرجي من هذ الهم تعوذي بالله من الهم والحزن في كل صلواتك

هذا الشيطان تغلب عليك وخلاك تحت رجليه

عوض ماتكوني إنشانة شاكرة للنعم وليتي إنسانة ماتشوف غير الهم

على هذا خلاوك حباباتك

وزيد راكي كبيرة مادام جا اللي يخطبك !!!!!!!!!!!!!!

اسمحيلي

واحد مايقبل إمرأة عند ها وجه كئيب وحزين

جددي حياتك

جددي نشاطك وانطلقي في الحياة

التصرفات الصبيانية انتهى وقتها البكاء والحزن ووووو هذي ماعندها حتى معنى

نظن والفتي الحاجة اللي تطلبيها تتوفرلك على هذا كلما نقصت عليك حاجة تقولي أكيد أنا السبب فيها

الناس مايرحموش إلا من رحم الله

اوقفي على رجليك وعاوني روحك بروحك

ماتستنايش حتى واحد يجي يعاونك

التغيير يبدى من عندك. أنت اللي تقرري متى توقفي هذ المهزلة اللي راكي معيشة روحك فيها

وكيما قلتلك واحد مايقدر يعاونك

ممكن شفتي ردود الأعضاء بسيطة جدا

لأنه صراحة في مشكلة كيما هذي صعيب تلقاي المساعدة من طرف ثاني

المساعدة والحل تجي من عندك

نتمنى أنك فهمتي

كما أتمنى أنك تبداي التطبيق من الآن

ربي يوفقك

زبدة ذايبة · 2016-10-21, 14:27

اقتباس:

المشاركة الأصلية كتبت بواسطة أمل 95

اختي لازم عليك تتأكدي بلي هذالناس اللي من حولك ماهم إلا بشر لاحول لهم ولا قوة .وهم اقل منك شأنا وذكاء وجمالا ومستوى في الحياة الدنيوية وعند ربي كامل سواسية كي تقنعي بهذالشيء هذي راح تكون نقطة التحول وزيادة الثقة بالنفس .......أما باش تبقاي ديما عاطية قيمة للناس وقدر وماهم في الحقيقة سوى أذيال منتشرة في المجتمع فاعلمي أن هذا هو سرطان الثقة بالنفس .....ثقتك بنفسك تطوربها انتي بقدراتك متطالعي كتب متقراي دورات تنمية ماتحسي روحك صح مريضة مشكلتك تعالجيها انتي بقوتك الكامنة في اعماق نفسك .....تسلمي

بارك الله فيك

mrmilano1984 · 2016-10-21, 17:35

مشكلتك فكرتني باحد الاشخاص كان يعمل عندنا تصوري عندو مشكلة كبيرة في الثقة بالنفس يعني ناقص بزاف بزاف في ثقتو بنفسو لايثق في نفسه شكلا وتفكيرا حاقر روحو بزاف يضن نفسو انو لاقيمة له يهاب الناس لايدخل في نقاش يفشل تماما عقلو مبحر لايعرف مادا يفعل وكيف يفكر اطلاقا طبعا حتي انه توقف عن العمل بسبب هاته العقلية العقيمة