هل زوجي على صواب

[مشكلتي]

السلام عليكم ورحمة الله وبركاته
انا امراة متزوجة متخرجة من الجامعة وماكثة بالبيت زوجي انسان مثقف ومستواه نهائي بكالوريا
لديا 3 اطفال هاذ العام ابني ا لكبير دخل المدرسة الابتدائية يقرا سنة اولى ابتدائي ولديا ابنتي في عمرها اربع سنوات ونصف ادخلتها هاذ العام في احدى الجمعيات تقرا تمهيدي
ولديا طفلة صغيرة في عمرها عام ونصف
مشكلتي هي انو زوجي مانعني اني نخرج و ندي ولادي يقراو يقولي خليهم يروحوا وحدهم مع انو المدرسة لي يقرا فيها ولدي والجمعية لي تقرا فيها ابنتي قدام بعضاهم ولكن يبعدان عن المنزل تقريبا 100 متر
كي نقول لزوجي اعطيني اسباب لي تخليك تمنعني اني نخرج وندي ولادي يقراو يقولي السبب الاول نغير عليك والسبب التاني المراة حرام عليها تخرج بلا محرم
الصراحة هاذه الاسباب لم تقنعني والان انا معاه على شجار دائم بسبب هاذ المشكلة
حقا اعلم انو المراة يجب ان تخرج من منزلها مع محرم لكن انا لم اخرج كي اتنزه فقط اوصل ابنائي الى مدارسهم وارجع الى البيت لانو رانا في وقت صعيب نخاف على ولادي من حوادث مرور لانهم صغار وزيد نخاف يسرقوهم لانو وصلنا الى وقت يخوف ولازم نخافو على ولادنا
في الايام السابقة كان والدي هو لي يوصلهم لانو كان في عطلة وابتداء من الغد يرجع الى العمل
وهاذ ليوم زدت تناقشت مع زوجي في نفس الموضوع مزالو رافض نهائيا وقطعا انو نخرج نوصلهم ونجيبهم من المدرسة والجمعية قالي بالحرف الواحد خليهم يروحوا وحدهم ولا حبسيهم في الدار مايروحوش يقراو
والله راني في حالة لانو من حق ولادي انهم يقراو ومن حقهم انو نوفرولهم الامان ونديوهم ونجيبوهم سورتو في هاذ لعمر الطفل عندو 6 سنوات والطفلة عندها 4 سنوات ونصف
على فكرة زوجي يخدم في مكان بعيد يعني يبكر ويخرج من البيت في وقت جد مبكر

ايا يعقل ان تكون الام جامعية والاب عندو مستوى نهائي بكالوريا والاطفال مايروحوش خلاص يقراو على قولة والدهم؟؟؟؟؟
هل زوجي على صواب انو مانخرجش ندي ولادي ونجيبهم من المدرسة
وعندي خياران يا نخليهم يروحوا وحدهم يا مانخليهمش خلاص يروحوا يقراو

[*أم سجى*]

وعليكم السلام اختي الكريمة ..الله يبارك ربي ان شاءالله يحفظلك أبناءك وزوجك. .الحل يااختي أنك تخبري زوجك وتوعيه بضرورة مراقبة الاولاد وترويلو خطورة الوقت لي رانا فيه من حوادث خطف والاعتداءات التي تطال الولد والبنت على حد السواء احكيلو عالوقت الصعيب اللي رانا فيه وحثيه بلاك يخليك تروحي واذا اقتضى الأمر البسي جلباب وستار يغطي وجهك وقوليلو نوصلهم بجلبابي ونرجع لبيتي بسرعة .والوقت لي يكون قاعد فيه هو يديهم ولا يجيبهم....واذا اتعنت زوجك وشد في قراراتو ننصحك تحبسي البنت من الجمعية لانها صغيرة جدا والجمعية مش ضرورية ليها كي تكبر دخليها تقرا فلمدرسة وتخلي ولدك يقرا وتوصي عليه هذا هو الحل والله اعلم وان شاءالله يقبل زوجك ويرضى ورب يستر الوليدات ان شاءالله

[خالد عنابي2]

زوجك على خطأ بطبيعة الحال
هو يتشدد في مسألة التدين
ليست قاعدة مطلقة ان المرأة لا تخرج بدون محرم بل تخرج للضرورات

[فاصلة]

حاولي بهدوء . ولا بنتك خبسيها ولدك يروح يقرا وحدو ضروك سوالف ومنا على عام هو لي يدي اختوا ما تكبريش الموضوع

[حياتي نبع امل]

اولا المحرم يجب على المراة في حالة سفر اما الخروج لقضاء حوائجها لا يشترط عليها محرم لكن خروجها يكون بضوابط شرعية

نرجعو للمسالة تع زوجك .مسالة يغير عليك تقدري تعالجيها كما قالت الاخت البسي جلباب وديري ستار واقيمي عليه الحجة قوليلو الان ماعندك على واش تغير لانك مستورة تماما .لكن اذا درتيه اولا ابتغي به وجه الله ومرضاته ثم طاعة زوجك

اذا ماحبش قوليلو يدبر واحد يكون ثقة يستكلف بوليدك يديه ويجيبو
اما البنت تقدري تحبسيخا وقريها انت في البيت حتان تلحق ل6 سنين ودخليها تقرى

المهم انك تبقاي مكتوفة الايدي وتشوفي ف ولادك يروحو وحدهم وهوما صغار لا .ديري اي شيئ المهم انك تضمني ولادك من الذئاب البشرية خاصة .عدنا نخافو السرقة اكثر من الحوادث الاخرى .ووقتنا رجع صعيب كل يوم من سيئ لاسوء

المهم خاولي وحاولي وحاولي وماتيئسيش .شوفي كاش واحد يهدر معاه .المهم ابقاي تحاولي يقولك الصامط يغلب القبيح .امالا كل يوم ابقاي تعاودي حتى يكره ويقلك اديهم .مع انو الامر مش محتاج لكن عقليات .كل واحد وعقليتو

واذا جابهالك من ناحية الشرع قوليلو الشرع اللي اجاز للمراة تخرج وتقضي صوالحا وتروح للسوق .فولادها اولى واسبق خاصة مع الظروف لي رانا فيها .
ربي يسهلك امورك

[فاطمة شلف]

السلام عليكم ورحمة الله وبركاته
حاولي معه لا تياسي ولاتتركي مستقبل اولادك يضيع ولا يكري بجانب المدرسة
لا تفرطي في اولادك فاالاولاد نعمة
وطلب العلم فريضة على كل مسلم ومسلمة
مراكيش غالطة يااختي والوقت مراهش يرحم
الله يكون في عونك وربي يهدي زوجك ويتفاهم الامر

[زبدة ذايبة]

أكيد زوجك لديه السبب المقنع لذلك ولكنك تجهلينه ولا يريد إخبارك به

فمن غير المعقول ياسيدتي الكريمة أن يخاف زوجك عليك وأنت إمرأة راشدة

ولا يخاف على أطفال صغار جدا

إذن بالمنطق المشكلة واضحة ياعزيزتي

هناك أمر ما يجعل زوجك يمنعك من الخروج لاأعتقد أنه اتهام لك ولكن

عالم الرجال فيه من الأسرار الكثير

ومثلما تفضلت إحدى الخوات وقالت

إبحثوا عن شخص يتكفل بأبنائك

وأرى أنه ما من داع للضغط على زوجك في هذا الأمر

ولاتحاولي ولاتفكري في الخروج من البيت وهو غائب

زوجك يحترمك ويحبك ويحب أسرته

فهو يثق فيك ولكن يخشى عليك عندما تخرجين

لأسباب أنت تجهلينها- مافي داعي تسألين عنها لأنه لن يجيبك

وقراره هذا أنت المقصودة به وليس الأبناء

وأظن أنك قد فهمت ما أقصده

والله أعلم -هذا رأيي -

[خالد عنابي2]

زبدة ذايبة
كلامك غير مبني على اساس علمي رغم ما تدعينه في خانة المهنة
كاين رجال عقليتهم هكذا وبدون اي خطأ او تقصير ترتكبه المرأة
اذن معقول ونص

[ندرومة49]

قد أجيبك بجواب لا تتوقعينه,, يغار عليك ,,ممكن جدا لا تردتدين النقاب ,,ممكن جدا لو ترتدي نقاب يسمح لك بالذهاب بهم,,,,
خاطبيه بشكل مهذب ولا تكثري عليه الكلام,,,
حدثيه عن كل اشكالية قولي له بيننا الشرع ونبحث في النت سويا عن ذلك بشكل محترم ,, لا تحسسيه بأنك جامعية وأنك أفضل منه علميا
المعاملة الطيبة سلاحك

[ساجده 82]

سلام اختي .صح والله راه رجع الخوف .حنا بكري نقراو بعاااااااد على المدارس ونروحو ونجو وحدنا والصغر والجوع ...والامان ولكن ضرك .صعيب .
انا راني كيما الطاكسي ندي ونجيب ولادي حتى عييت .ولكن اجباري عليا .نديهم ونبقى حتى يطلعو للاقسام ونروح نستلمهم ....وانت ياختي مانلومكش على خوفك ومانحبش يكبر الموضوع حبسيهم في زوج .سمانه زوج ثلاثه راح يدور في رايو ويرجعهم ويوافق باذن الله خاصه كي يجي عيان من الخدمه ويبداو يبكو عندو راسو ههههه راح يقولك رجعيهم ونخلصك
الله يهدي سركم آمين

[قدور بن عاشور]

هذه ماهيش عقلية و قراره غير مسؤول.
إذا ما عندكمش جيران يروحو مع أولادك شوفي إنسان كبير يحشم منو يهدر معه و يفهمه خطورة الأمر.

[doua arij]

اختي انصحك ان تحكي لوالدك القصة وان يتكلم مع زوجك ويحاول اقناعه عله يحترم رايه ويغير فكره

[zakia ak]

قولي لزوجك المثل اللي يقول : العافية ديما والبلا ساعات .اطن انك فهمت المثل وخصوصا في هذا الوقت الصعب فكم من طفل اختطف من طرف اقاربه اوجيرانه والمآسي عديدة ولانكاد ننسى ماساة طفل حتى نسمع بواحدة اكبر منها الله يجيب الخير .

[ع.عيسى]

نعم زوجك على صواب ، وبما ان المدرسة قريبة من البيت فلا مبرر لخوفك ، وخروجك لن يجلب لك سوى الشبهات والاقاويل واكاذيب الحساد والاعداء ، اليك قصة حقيقة امراة مثل حالك الحت على زوجها الخروج من اجل اصطحاب الاولاد وقضيان البيت فوافق ، في يوم من الايام بينما هي راجعة الى بيتها وبالضبط امام بيتها سالها احد الشباب يستفسر عن عنوان شخص ما ، في تلك اللحظة اتى زوجها ورأها تكلم ذلك الشاب فجن جنونه واعتقد ان زوجته تخونه ، فكان مصيرها الضرب المبرح والطلاق حتى انه لم بعطها فرصةلكي تشرح له وتدافع عن نفسها ، ولم ينتهي الامر هنا بل جرت القصة على السن الناس والفت القصص عنها فمنهم يقول ان زوجها راى الرجل يخرج من بيته ومنهم يقول ان زوجها راها تدخل الرجل الى بيته ...وهكذا حى شوهت صورتها بالكامل

[مصطفى_س]

100 متر و تريدين اخذ اطفالك الى المدرسة هل لخوفك ام انك مللت الجلوس في المنزل
ان كان لخوفك فالمسافة قريبة جدا و اكيد سكان الحي يعرفون بعضهم البعض و الخوف المفرط على الاطفال سيسبب لهم متاعب في المستقبل كضعف الشخصية
ان كان قصد الخروج و الاطفال حجة فهنا ما عليك الا مصارحة زوجك