زوج اطباق ......تحفففففففففففة

اسمهان79 · 2015-06-03, 15:07

السلام عليكم ورحمة الله وبركاته
بما انو رمضان على الابواب حبيت نقدملكم اليوم زوج اطباق يار ب يعجبوكم
اول طبق طبقات السلق والدجاج مع الافخاذ المحمرة

+

ثاني طبق كيكة البطاطا المحشوة

اول طبق
ناخذ 2 افخاذ دجاج نشلحهم بالموس مثل الصورة ونتبلهم بالزيت والزبدة الذائبة وشوية موطارد شوية كرام فراش دبشة هريسة ملح وفلفل اسود افاح ثوم مرحي نخلط مليح ونخليهم في التتبيلة مدة 4 ساعات او اكثر ثم نسخن مقلات فيها شوية زيت ونلوحهم يحمارو راح يتحمرو بسرعة لانو المقلات سخونة مليح ثم راح تبقالك شوية من التتبيلة فرغيها في بلا نتاع فور وحطي الافخاذ فوقها وغطي بورق الالمنيوم ولوحي في الفور يكمل طيابوولما يطيب نحي الألمنيوم وزيدي حمريه شوية في الفور هاذ الطريقة شفتها في قناة مصرية للطبخ وعجبتني الوصفة حبيت نفيدكم بيها

1 في هاذ الوقت ارحي نصف صدر دجاج مع شوية شابلير وصفار بيضة ملح فلفل اسود افاح وشوية فلفل احمر ثم اطرحيه بمساعدة البلاستيك واطبعي دوائر ثم اقليهم في مقلات

2 خذي اربع بيضات حطي معاهم 1 م ك فرينة 1 م ص خميرة الحلويات ملح فلفل اسود وكمية من السلق يكون مذبل في مقلا مع شوية زبدة ومعصور من الماء نتاعو او غليه الا حبيتي

ثم ادهني مول مليح بالزبدة ومن الاحسن استعملي ورق الزبدة وفرغي الخليط والى الفور راه ما يطولش في الفور بزاف ثم اطبعي دوائر اقل شوية من نتاع الدجاج
قولولي علاش على خاطر الدجاج كي راح تقليه راح الحجم نتاعو يتقلص وكي تطبعي خليط السلق باقل منو راح يكونو في نفس الحجم

من بعد خذي فرماج مثلثات واطلي كل الحبات نتاع الدجاج ونتاع السلق
ملاحضة الي تحب تعمل دوائر من اللحم المرحي هي حرة انا هنا راني خلطت شوية
ومن بعد تلصقي كل الحبات بالتناوب يعني دجاج سلق لحم مرحي دجاج سلق حتى تكملي الحجم اللي تحبي وكل مرة راح يكون بيناتهم الفرماج بطبقة مليحة
حطي فوق كل وحدة فرماج مرحي وزيني ببقايا الدجاج ولوحيهم في الفور مدة10 د وقدميهم بالصحة والهناء مع افخاذ الدجاج

ثاني طبق راه سهل واكيد بنين

اقلي البطاطا دوائر واكيد بالملح ثم قلي دجاج متبل ومرحي في مقلات
ومن جهة اخرى قلي اللحم المرحي المتبل في مقلات هو تاني
وجدي فرماج المثلثات مع شوية كرام فراش وفلفل اسود
وجدي ثاني البيشاميل
وفرماج شرائح
خذي مول اللي يتفتح على الجنب حطي شوية من البيشاميل في اسفل المول ثم طبقة من البطاطا ثم طبقة من الدجاج ثم الفرماج

ثم البطاطا ثم اللحم المرحي ثم جبن شرائح ثم البطاطا ونضغط باليد شوية

ومن بعد نفرغ البيشاميل اللي بقات نعمل طبقة من الفرماج المرحي ونلوحو الى الفور واكيد بنين لانو مليان فرماج زينيه كيما تحبي وانا هنا عملت مول صغير ما داش مني حوايج بزاف والله جانني روعة

في امان الله حبيباتي