البسملة1
كيما العام اللي فات نصف الجزائر عيدت بالنقاش المسروق نتاع خالتي 
جبتلكم هذا العام الغريبية المسروقة فعلا وصفة رااااااااااااااائعة تستاهل السرقة 
الوصفة من عند وحدة قسنطينية بروفيسيونال نتاع غريبية تخدمها للمحلات جازاها الله خيرا على الوصفة والاسرار نتاعها وطبعا مشكورة خالتي على السرقة قلتلكم شبكة السرقة نتاعي راهي قاعدة تتوسع ومع انني زعمة تبت في رمضان هذا اللي فات بصح قالك اللي فيه عادة ماتتبدل
تعرفوني مانحطش وصفة غير إذا جربتها وتاكدت باللي تستاهل فعلا تتحط موضوع لذلك جربت كمية صغيرة وصورت الخطوات وفعلا وصفة لذيذة وتحمر الوجه
المقادير :
- كيلة سمن ( انا استعملت سمن المدينة )
- كيلة سكر ناعم مغربل ( انا نستعمل المرجان ) قد السمن قد السكر وماتخافوش جي ذوب في الفم ماتنقصوش السكر
- ثلاث كيلات كاوكاو محمص ومرحي ومغربل رقيق ( هو الكاوكاو يندب شوية كي يترحى مليح يعجن لذلك ماشي شرط يكون رطب كيما البودرة فقط مايكونش خشين )
- فاني من النوع الجيد
- تنشفي بالفرينة المغربلة ( انا استعملت حوالي زوج كيلات فرينة ماركة لابال )
- للدهن : بيضة + جلجلانية محمصة أو كاوكاو مرحي متوسط او بيسطاش أو لوز إيفيلي حسب الذوق
الطريقة مع الأسرار :
- اهم حاجة السمن ماتذوبوهاش أبدا نستعملها مباشرة من العلبة هذا سر مهم باش الغريبية تحافظ على شكلها وماتهبطش في الفرن خاصة انو السمن مافيهاش الماء لذلك علاه نذوبوها 
، المهم ، نخلي السمن خارج الثلاجة باش تطرى شوية قبل الاستعمال,
- نحط السمن نتاعي مع السكر الناعم والفاني ونخلط بالباتور او باليد او البيتران المهم ، ركزو على هذي النقطة ماتخلطوش السمن بزاف حتى تطلع مثل الكريمة لانو هذا سبب ثاني يخلي الغريبية تهبط شوية في الفرن لالا نخلط دقيقة وحدة برك حق مايتخلط السكر مع السمن ويدخل فيها وخلاص دقيقة او اقل من دقيقة تكفي وما تفكروش في السكر يذوب ولا مايذوبش ,
شوفو الصورة تلقاو باللي السمن مازالت محافظة على لونها الاصفر وماطلعتش كي الكريمة مثل مانديرو عادة خلطت اقل من دقيقة فقط وحبست .
- نضيف الكاوكاو نتاعي ونخلط ثواني فقط حق مايدخل الكاوكاو في الخليط ونحبس .
- نضيف الفرينة بالشوية ونخلط حتى نحصل على عجينة طرية مثل الصابلي على العموم جربو طيبو حبة وخلوها تبرد في الثلاجة وذوقوها إذا محتاجة تزيدوها الفرينة هي في الشكل ماتهبطش لكن ممكن كي تذوقوها تحسوها خفيفة بزاف ومحتاجة تزيدوها فرينة ,
- انا خليت العجينة ريحت نصف ساعة ثم طرحتها فوق البلاستيك ونخليها عالية شوية ماديروهاش رقيقة وقطعتها بالطابع ( اختارو الشكل اللي تحبوه )
- ندهنها بصفار البيض ( انا الصفار زدت معاه شوية بياض باش يجرى الخليط شوية تعرفو الصفار ثقيل نوعا ما ) ونرش بالجلجلانية المحمصة ( انا نفضل الجلجلان على أي حاجة أخرى ),
- نحطها في صينية تكون ثقيلة شوية ماشي خفيفة باش ماتتحرقش وطيب من داخل ونطيبها في فرن مسخن من قبل على 180° نطيبها في الرف الوسطاني تماما مثل الصابلي وليس مثل مانعمل عادة للغريبية نطيبها في الرف العلوي
- كي طيب من تحت وانتبهو ماتحمروهاش بزاف فقط تصفار ونهبطها للرف السفلي وننحمرها غير شوية من فوق ,,,,,,,,,,,,, حذاري عسوها هنا مليح 
- ميزة هذي الغريبية كي طيب كيما تدخل للفرن كيما تخرج ماتهبطش خلاص و ماتقدروش خلاص تنحوها من الصينية لعدة ساعات راهي طرية ومبسسة بزاف صدقوني جربت كمية صغيرة برك دارتلي زوج صينيات مالميتهاش خلاص بقات في الصواني كلاوها من ثم ومع ذلك ماخبيتهاش في علبة وغلقت عليها وبقات كيما راهي مبسسة فعلا غريبة هو السر انو الكاوكاو المحمص مايخليهاش تيبس لأانو هو أصلا فيه الزيت ومافيهاش بزاف فرينة لذلك ماتيبسش
- ملاحظة :
- هذي الوصفة ماتقدروش تشكلوها بالمحقن لانو فيها بزاف كاوكاو تتفتت ماتصلحش بالمحقن جربتها ماصلحتش
- انا كيلت بكاس كبير عطاتني 35 حبة غريبية وهذي صورة الكاس
اتمنى جربوها لأنها فعلا وصفة رااااااااااااااائعة جدا جدا ولذيذة وساهلة خلاص في دقيقة ديروها ,
ضرك حطيتلكم الوصفة ,,,,,,,,,,,,,,,نحبكم تركزو عليا في هذي الأيام المباركة المقبلة بدعوات خير من اللي يحبوها قلوبكم
اي أسئلة انا في الخدمة ,,,,,,,,,,,,,,,,,,,,,,, هيا ضرك باباي راني خاااااااارجة رايحة ندور شوية 
تحياتي ,,,,,,,,,,,,,,,,,,,,,, لهومة 
( تقرير عن مشاركة سيئة )، و الموجودة أسفل كل مشاركة .
2014-09-24, 16:30
لعيد الاضحى ,,,, الغريبية المسروقة
العرض العادي
