موضوع مميز بوكي فستان زفافي من صنع اديا وحياة عينايا

ام مريم اسراء · 2013-06-02, 19:58

مساء النور
انا نحب التميز ...... احم احم ..... لذا قررت نصنع بوكي عرسي باديا و تصدرت بيه و كان تحفة و هاذا من اكثر من 3 سنين

نخليكم مع الصور

وهو يتحمل باليد

اذا كنتو حايرين كفاش خدمتو
جبت كرة نتاع اطفال -بالون- الي يجي يابس يتباع ب 50 دج و جبت حاشية بيضاء و و رود تقدرو تخدموها و راها كاين اخت حطت طرق صنع الورود بسرائط الساتان راح يستقاملكم ارخص و اذا حبيتو اشرو الورود الي حبيتوها
المهم تسقي باتيكس

اولا تغلفي الكرة بقطعة قماش بيضاء حبذا لو كانت بيضاء من الساتان من اجل فال العروسة تغلفوها بشكل تلقائي و تخيطوها و تقدرو تخدموو بالباتكس اذا مكنتوش تتحسسو منو و من بهد تقصو شريط الساتان الابيض بالطول الي تحبوه مثلا شبرين و تقدرو تستعملو شريط الارفغونزا و تثبتوه مليح مليح ب الكرة و تبداو تنسقو في الورود و تلسقوها بالكرة بشكل مرتب تقدرو تستعملو لونين من الورود كما عملت الابيض و الفضي
و تكملو كامل الفراغات و تزينوها باحبات العقاش اللؤلؤ الابيض و الريش الابيض نحيتو من الفونتاي نتاعي نتاع الريش الابيض ههههههه

تقدري .... تحطي كرتين تحت بفضاهم الكبيرة و الاصغر منهم ..... تجي تحفة

وهذا التبق خدمتو من بسينة صغيرة نتاع بلاستيك ...... الي فيها حاشية خارجة و نلسقو سطحها و قاعدتها باسفنج نتاع 1 سنتمتر و نغلفوها بالساتان اما اليد نتاعها استعملت توييو نتاع غاز .... الي يجي ابيض و ثبتو بالبسينة في النص بالسلك و زيرت

واش رايكم اعمال يديككم و تكوون متميزة و تبقة ذكرة تخبيوها لبناتكم علاش لالا

باااااااااااااااااااي

اي استفسار راني هنا متحشموش راني نجاوبكم و نمد يد المساعدة

[من اروع الطرائق وافضلها
+ مجموعة رائعة من الهدايا
https://ge.tt/api/1/files/3LgsZrn1/0/blob?download

آمِيْرَتُه · 2013-06-02, 20:14

ما شاء الله روعة
نبغي الأشغال اليدوية
أي خدمة متبخليش علينا

ام مريم اسراء · 2013-06-02, 20:19

اكيد انا من عشاق الاشغال اليدويةو التدوير اكيد انتظرو مني المزيد و شكرا اختي اميرة على التشجيع

crystale49 · 2013-06-02, 22:07

شكرااااااااااااااااااا لك

نسيم الإيمان · 2013-06-03, 00:37

يعطيك الصحة يا الشاطرة
هايلين

الدنيا · 2013-06-03, 10:31

ممكن شرح اكثر على الطبق باغية نخدم شحال من واحد ندير فيه الكوسميتيك

سحر الكلمات · 2013-06-03, 10:35

يعطيك الصحة هايلللللللللللللل

ess usmh 19 · 2013-06-03, 11:21

allah yberk 3lik okhti

oum rahma · 2013-06-03, 11:59

خدمة هايلة ،،، تسلم الايادي

ام مريم اسراء · 2013-06-03, 19:47

اقتباس:

المشاركة الأصلية كتبت بواسطة الدنيا

ممكن شرح اكثر على الطبق باغية نخدم شحال من واحد ندير فيه الكوسميتيك

شوفي اختي بالنسبة للطبق
تحتاجي بسينة نتاع بلاستيك من الافضل هاد النوعية الي فيها حاشية

.و جيبي انبوب غاز من الافضل الابيض كيما في الصورة

واذا مكانش استعملي انبوب الكهرباء البرتقالي ارقق من الي في الصورة

و سلك توصيل FILE D'ATTTACHE رقيق كيما في الصورة

اكيد اسفنج رقيق 1 او 2 سنتمتر يتباع الله اعلم 100 دج

و باتيكس واكيد اخدمي في مكان مهوى حوش و الا سطح و ديري كمامة ريحتو تدوخ

نبدا العمل على بركة الله

اولا تقيسي بالميترة او بالسفنج نفسه ارتفاع و دوران البسينة نتاعك و تزيدي 2 سنتمتر زيادة تقصي القطعة نتاعك
و تقصي دائرة نتاع قاعدة الطبق اولا قصي شطل مربع و من بعد قصي الكوانات في شكل مقوس تخرجلك قاعدة بالضبط تناسب الطبق نتاعك
اولا باش نخدم العروة نتاع الطبق نقص الانبوب او التوييو بالطول المرغوب و نعمل علامات نسخن مسمار على النار و نثقب مكان تثبيت الانبوب و الطول الانبوب لازم يكون بارتفاع البسينة و زيادة من الفوق باش هكدا تثبت مليح و تستحمل الوزن .....
ابداي بسباتول او عود حطي الباتيكس في الحواف الداخلية للبسينة ... و نلصق كامل وجه البسينة -سطحها بالباتيكس و نثبت فيه البونجو القاعدة نثبتها بحيت نلسق الجهة الي تبينلنا سمك البونج نتاع ارتفاع البسينة بالحهة نتاع سمك الدائرة الي قطعناها هكدا راح نتحصل على شكل مليح لبطانة الطبق معادش ذرك بسينة
نخليكم مع الصور

بالنسبة للتزيين ساهل تقدري تستعملي الساتان باللون الي تحبيه تبطنيه بالطريقة الي حبيتيها مثلا اذا كنتي تعرفي السموك اخدمي بيه او اعملي بلييات و خيطي غلاف او لسقي ورود ساتان او لفيه ساير داير بالدانتيل العريض نتاع الميترةفي شكل طبقات راح يجي هبال انتي واش تحبي
والداخل غلفيه بالساتان بالطول نتاع البسينة و ارتفاعها اما القاع نتاعها باش متتعبيش حطي الباتيكس و جيبي قماش التول و كمشيه و لسقي بنفس الطريقة الي عملتها او قصي دائرة من الساتان و لسقيها و اخفي الحافة بالساق شريط الساتان
و نفس الشيء للعروة نتاع الطبق لفي عليه شريط الساتان كيما القردون و تقدري تزينيه بالدانتيل الي يطيح على جوانبو
انتي وواش حبيتي
و تقدري تغلفيها كاملة بطريقة الكريات السحرية اذا كنتي تعرفي الطريقة

نفس تطبقيها على بيدون الزيت نتاع 5 لتر تقصيه و تزينيه بنفس التقنية و تقدري متعمليلوش عروة لكن تزينيه و تحطي فيه المشاطي نتاع السيشوار

نفس الطريقة تعمليها بعلبة سمن المدينة

هادا موديل الكريات السحرية

و هاهي مووديلات تساعدك في التزيين

جبتلك موديل التزيين بالورود الجاهزة لتزيني سلات الحلفة .... اولا تلونيها ببخاخ ذهبي او فضي يتباع عند الكانكايري و تشري ورود من عند الي يبيعو ورود البلاستيك و تزينيهم

شكرا و انتظروني قريبا في ورشة لصنع طاجين مغربي لوضع الحنة