شكون تمداي طريقة لتحضير السباقيتي والمعكرونة تجي بنينة

nari21 · 2013-11-05, 18:28

سلام علكم يا لحراير شكون تمدالي طريقة لتحضير العجائر المعكرونة والسباقيتي انا كل شيء يجيني بنين وهوما لالا وشكرا مسبقا

Basketteuse · 2013-11-05, 18:48

السر هو في البهارات وكمية وكثافة الصلصة وكذالك قوام المقرون
انا نعطيك طريقتي كامل تعجبهم : مانكثرش البصل ونكثر ثوم ونقلي مع شوي لحم بقري ، فلفل اسود، كسبر، قلييل من الكروية ( ممكن اكتفي بالكسبر فقط) فلفل حار مقصوص وطماطم مصبرة ومن بعد نضيف طماطم مرحية ونخليها شوي ثم نمرقها بقليل من الماء . لازم كي تطيب تجي عاقدة وماشي بزاف صوص .. واذا مادرتلهاش اللحم نخلي للمرحلة هذه ونزيد طونة مقطرة من الزيت او جومبو دجاج او زعيترة
بالنسبة للمقرون نغليها ومانخليهاش حتى تولي طرية لازم aldenté . ولوحيها مباشرة في الصوص مع القلييييل من ماء الطهي لكن تتجانس جيدا مع الصلصة . خلطي شوي وطفي اذا حبيتي زيدي شوي زيت زيتون في الاخير

الشتاء البارد · 2013-11-05, 22:12

السلام عليكم
نعطيك طريقتي شخصيا تعجبني و نتي مانعرف
ديري حبة بصلة كبيرة (علي حتترحى مكان علاه تقسميها صغيرة) حطيها تتقلى مع الزيت و الفلفل الاسود امبعد زيدي راس ثوم (الصح فالثوم) يزيدو يتقلاو شوية ارمي طماطم نورمال مقسمة كبير (انصاف مثلا) 6 و لا 7 حبات لاباس بيهم زيدي الرند الزعيترة(و انا نحبهم كي يكون يابسين) الملح و خليهم يطيبومدة بالما تاع الطماطم كي تحسيهم خثرو زيدي الما و لازم تخليها خاثرة ،كي يطيبو ارحيهم عاودي رجعيهم للنار زيدي كمية معتبرة مالطماطم المصبرة .
ويلا بلحم ديريه كويرات فيونداشي (يخرج بنين بالفيونداشي) ولا بلاكويرات ديراكت حطيه مع التالي كي تكون الطماطم طابت و رحيتيها ،هو بلخف يطيب و انتهى شهية طيبة

الشتاء البارد · 2013-11-05, 22:14

و المقرون لي نحبو لي بقالو شعرة و يتعجن ههه طايب مليح وحد 20د يجي طرييي يذوب بلخف هذاك انا نحبو بزاف

الشتاء البارد · 2013-11-05, 22:15

و الحار فلاصوص نسيتو انا ندير حبة فلفل قناوة و الماقارون شبعيه زبدة

omaymen · 2013-11-06, 08:48

السر اختي كيما قالو الاخوات لازم الصوص تجي عاقدة ماتكتريش الماء وتحبي ديريه حار يجي كثر بنين
والمقارون او السباقيتي ماتطيبيهش حتى يولي معجن
وموفقة اختي ان شاء الله

tiaretia · 2013-11-06, 09:13

اختي انا نطيب صوص بولوناز عادي ونطيب سباقيطي او مكرون عادي ومن بعد نخلط الكل مع بعض او نحط لاصوص غير من فوق وانت وذوقك

melissa lola · 2013-11-06, 12:23

انا نقلي حبة بصل مفرومة مع شوية لحم مرحي 2-3سنات ثوم ملح فلفل اكحل رند نكثر منه زعيترة ان وجدت نضيف طماطم علب نمرق نخليها تغلي نضيف السباقيتي. او المقرون انتاعي نخليها تطيب شوية ولما تولي نص طياب نطفي للنار ونخليها تكمل الطياب في المرقة اللي بقات ونبقى نخلط منين ذاك يجي شارب لاصوص مليح وبنين و السلام

om sisso · 2013-11-06, 16:20

انا نحبها بالبشاميل شحال بنينة

ام نافع · 2013-11-09, 14:48

كما قالولك الاخوات لازم الصوص تجي عااقدة اليوم تغديت مقارون بالتونة

أسومة المتفائلة · 2013-11-09, 18:50

شكرااا لنصائحكم نموت على السباقيتي والمقارون