بقلاوة قسنطينية خطوة بخطوة من مطبخي

Hinda25 · 2013-07-19, 00:04

البسملة1

مقادير البقلاوة :
للعجينة : -4كيلات فرينة
-1كيلة زبدة ذائبة
-2 بيضات
-قرصة ملح
-ماء ورد +ماء

الحشوة : -3كيلات لوز(انا درت 1/2 لوز و 1/2 جوز)
-1كيلة سكر عادي ناقصة شوية
-ماء ورد
- 2ملاعق اكل زبدة ذائبة

- نبلل الحشو بالماء ورد و نفتلوها كيما الطعام، إنتبهي ماتكثريش ماء الورد و اضيفي ملعقتين زبدة ذائبة انا درت 4 ملاعق لأن الكمية تع البقلاوة كبيرة

- أما بالنسبة للعجينة ذوبي الزبدة انا درت ستار و لابال و خليها تبرد
غربلي الفرينة و ديري 4 كيلات و كيلة زبدة + قرصة ملح + 2 بيصات و بلي بالماء ورد حتى تتحصلي على عجينة طويلة اعجنيها و اعملي 7 كريات و ضعيها في النيلون و خليها ترتاح مدة ساعة إلى ساعتين

- حلي العجينة تاعك و أدهني السنيوة تاعك بالزبدة أو السمن او الإثنين معا و حطي الورقة الأولى و ادهنيها بالزبدة مليح و زيدي العجينة الثانية و الثالثة و ادهنيهم بكل بالزبدة وو زيدي العجينة الرابعة بصح ماتدهنيهاش

ماتدهنيش العجينة الرابعة و حطي الحشوة تاعك و وزعيها بإنتظام و زيدي حطي العجينة الخامسة فوق الحشوة و ادهنيها مليح + العجينة 6 و العجينة 7 و خلاص قطعي بقلاوتك و ادهنيها بالزبدة مليح و من ثم الخباز او الفرن نتاعك طيبيها على نار متوسطة باه ماتتحرقش

لازم العسل يكون سخون كي تخرجيها صبي عليها العسل

Hinda25 · 2013-07-19, 00:14

اسمحول ما حبوش يطلعو الصور رايح نحاول نطلعهم انشاء الله

ام مهدي2010 · 2013-07-19, 00:24

بارك الله عليك على الوصفة ان شاء الله تطلع الصور باش نشوفوها

Hinda25 · 2013-07-19, 01:05

تـــمـــت إضـــافـــة الـــصـــور

الواثقة بالله 23 · 2013-07-19, 01:32

الله يبارك تبان روعة مخدومة باتقان

العجينة نظن لازم ترتاح ياسر باه تعاونك في الخدمة و متتقطعش خاطر الله يبارك تاعك تبان روعة

و تاني حبيت نسقسيك على العسل لي استخدمتيه تجي بيه ملاحة لأني حابة نجربو

و شكراااااااااااااااا غاليتي

ساندي 28 · 2013-07-19, 02:17

يعطيك الصحه

Hinda25 · 2013-07-19, 02:48

[quote=الواثقة بالله 23;1053628734]الله يبارك تبان روعة مخدومة باتقان

العجينة نظن لازم ترتاح ياسر باه تعاونك في الخدمة و متتقطعش خاطر الله يبارك تاعك تبان روعة

و تاني حبيت نسقسيك على العسل لي استخدمتيه تجي بيه ملاحة لأني حابة نجربو

و شكراااااااااااااااا غاليتي

شكرا لكي اختي الفاضلة ،لازم باه متتقطعلكش العجينة تكون الزبدة باردة + تعجنيها شوية ماتقطعيهاش و خليها بين ساعة أو ساعتين ترتاح و غطيها بالنيلون و العسل سان فرانسيسكو راهو راائع انا خلطت كيلو سان فرانسيسكو و نص كيلو عسل الدب، نتي ديري كمية العسل على حساب السني انا درت تاع 3 كيلو